Atwanare nges amameu ka aijar. Eputos atwanare ka ajoo nuidulok. (Yokana 11:11-14) Lukatwaka mam epedorete aipup, asesen, ainer, karaida aomoom idio bore kere. (Ekalimonokinan 9:5, 10) Edini lokaisab isisanikini ebe lukatwak elosete akwap naka imoyon aiboi kalu apapaakec. Mam Ebaibuli isisianakini kwangin.

Ngul lukatwakata mam epedorete aingarakin karaida aimusung oni. Etapit itunga aswam inonosio ka asuban nu ecamunitos kes ebe isialamikinete ngun lu atwakata. Erai na ibore yen itakadikini Edeke naraai elibunit kotoma aingal adiopet naka Satan. Mam isialamikinit lukatwak da, kwape emameor kes aijar. Mam ibusakinit oni akuriau karaida aima lukatwak. Ibusakinit oni aima Edeke bon.​—Matayo 4:10.

Ejarunete lukatwak. Ebuni Yawe aitekwenyun lukatwak toma aijar na ejaun paradais nee akwap. Eroko apak ngin ejai ngaren. (Yokana 5:28, 29; Aswamisio 24:15) Epedori Edeke aitekwenyun lukatwak kwape ipedoria ijo aitekwenyun itunganan ejotoi.​—Marako 5:22, 23, 41, 42.

Aomisoit na ebe mam oni itwaki erai aingal na esiaraki Satan Ekejodijodon. Satan ka akejokin ijaikinitos itunga aomit ebe imoyoi kalukatwak ejarete ido eyaunete adeka ka ace atiokisio. Ingalai Satan itunga, kapakio ace kotoma arujasia ka atapoeta. Etubokini Yawe ngul lu etamitos ainer ka lukatwak.​—Ikisila 18:10-12.