ASISIAET 8
Ajaatar Yosia Ka Ipapero Lukajokak
Kiwomit ijo ebe etiono kereka aswam nukajokak?— Ewomitos itunga ebe erai kwangin. Elimokinit oni Ebaibuli ebe ationikit noi esapat lo enyaritai Yosia aswam nukajokak. Konye ajatatar ipapero luapotu kingarakis nges. Aso esisautu nuipu nuikamunitos Yosia keda ipapero ke.
Papake Yosia arai Amon, ekabaka loko Yuda. Arai Amon loarono noi ido komaenenei aputosia. Ne atwania papake Yosia, abu Yosia korau ekabaka loko Yuda. Konye arai nges ikar ikanyauni luapolou! Kiwomit ijo ebe arono nges bala papake?— Mam, nges arono!
Abu Sepania kikwenya itunga mam aima aputosia
Karaida ne adisiar nges noi, akoto Yosia arimar Yawe. Aso abu koseu epaperone keda itunga luaminasi Yawe bon. Apotu kingarakis Yosia aswam nukajokak. Lubangai ice kopapero ke Yosia?
Ediopet kotoma opapero ke nges arai Sepania. Arai Sepania enabi lo ekwenyanari itunga luko Yuda ebe epote iboro lukarokok atakanikin kesi arai kemaenenete aputosia. Abu Yosia kopupok nuenera Sepania kosodi amaenen Yawe, mere aputosia.
Ece bobo kopapero ke Yosia nges arai Yeremia. Arai nges lo ejopojoposi keda Yosia kotoma okar ido iboitos kidunyanara ne apolotor. Araas ipapero lu edicasi noi ido da natwania Yosia abu Yeremia kiwadik ekosio lo etegelikina lo etodunit eipone loabu nges kotwaniaritor Yosia. Apotu Yeremia keda Yosia kingaranakinos bonik kanu aswam nukajokak ka arimarite Yawe.
Apotu Yeremia keda Yosia kingaranikinos bonik kanu aswam nukajokak
Nuinyoika bo ipedori ijo aisisiaun kanejai aanyunet ke Yosia?— Karaida ne araar Yosia isapat yen adit, akoto aswam nukajokak. Ajeni nges ebe ebusakinit nges epaperone keda itunga lu eminasi Yawe. Koany ebe kiseuni ijo ipapero ngul lueminasi Yawe ka luepedorete aingarakin ijo aswam nukajokak!
