Kwape idaunia aisisiaun kotoma aisisiaet naatubor, mam erai ebe isiyalaminikitos idiinin kere Edeke. Konye, ipedori oni aima Lokasubaniwok kopone loisiyalamikinit nges. Ani bo “ediini loelai” loisiyalamikinit Edeke? (Yakob 1:27) Kojenu nuisisianakini Ebaibuli.

1. Epone ani ipedoria oni aisisiaun aima Edeke kotoma abeit?

Ibusakinit aimawok korai naelomunit kObaibuli. Abu Yesu kolimok Edeke ebe: “akonikirot nges abeit.” (Yokana 17:17) Idiinin ice ilokonyitos abeit naka Obaibuli naerai Akirot naiyengakinit Edeke. Isiecakinitos kesi abeit ngin keda aisisianakineta ka inonosio luka itunga. Konye mam Yawe iyalama kanuka ngul ‘luengerete . . . aicorakinet naka Edeke.’ (Kosiom Marako 7:9.) Isiyalamikini oni Edeke arai itupakinit oni aisisianakineta keda aicoreta nuka Ebaibuli kotoma aimawok.

2. Epone ani ibusakinitor oni aima Yawe?

Ibusakinit oni aima Yawe bon, naarai nges Lokasuboniwok. (Apukokinio 4:11) Apolouke ebe ibusakinit oni amin ka aima nges bon, komam aitwasam aputosia nuegerer.​—Kosiom Isaia 42:8.

Ekoto aimawok korai “nakalaunan, naisiyalamikinit” Yawe. (Iromayon 12:1) Apolouke ebe ibusakinit oni arimaarit ikisilake. Kwape aanyunet, ngul lueminasi Yawe, eminasi ido ericitos ikisilake luka edukone. Bobo da, esacitos kesi aswamisio nueroko kwape nat aimat esigala, ejae, aitwasam ikee erono, emeret, arai bo aimat ajon nuipu. a

3. Kanuinyo ibusakinitor oni aima Yawe kemorikikina kaluce?

Airiamununetawok nukangolisabiiti einakinitos oni arereng naka aiturit Yawe “kotoma okodet.” (Isabulin 111:1, 2) Epone ediope loiswama oni ngun nges ayoere ikososinei lukaiturit Edeke. (Kosiom Isabulin 104:33.) Ekoto Yawe oni ajaunun airiamununeta naarai emina ngesi oni ido ejeni ebe ingarakinete airiamununeta ngun oni alelakin aijar ikar kere. Kotoma airiamununeta, isinyikokinete luce oni ido oni da isinyikokini kes.

 KISISIAU NUIPU

4. Mam ibusakinit oni aitwasam aputosia nuegerer kotoma aimawok

5. Aima Yawe bon elacakini oni kotoma aisisianakineta nukaisab

 6. Imai Oni Yawe Kotoma Airiamununeta

Ituri oni Yawe ka aisinyikonokin luce kopone loka ayoere ka ainanakin abongonokinetawok kotoma airiamununeta. Kosiom Isabulin 22:22, kosodete aimor aingiseta nuta:

• Ilelakinit kereka ijo aipup abongonokineta kotoma airiamununeta?

• Ikoto kereka ijo aitemonokin tetere ijo da ibongokini?

7. Iyalama Yawe naimoria oni keda luce akiro nuisisiai oni

Ipu iwaitin luipedoria oni aimor kaluce abeit naka Obaibuli. Kosiom Isabulin 9:1 keda 34:1, kosodete aimor aingiset nata:

• Anyoika bo nuisisiau ijo kotoma Obaibuli nuikoto ijo aimor kaluce?

 NUIDAU AISISIAUN

Isiyalamikini oni Lokasubaniwok naimaiya oni ngesi bon, naituritor oni nges kotoma airiamununeta, keda naimoria kaluce nuisisiau oni.

Ainyogoor

• Biai isisiaunia oni aima Edeke kopone kaloekotor ngesi?

• Kanuinyo ibusakinitor oni aima Yawe bon?

• Kanuinyo ibusakinitor oni aima Edeke kemorikikina kangul luepodokinitos aisiyalamikin nges?