AISISIAET NA 17

Arai Yesu Etunganan Loepone Ani?

KOBOLIAK

Naisisia oni nuikamunitos akiro nuinerit Yesu ka nuiswamat ngesi kotoma akwap, ijenuni oni iponesioke lueinakinete oni aikunyakin neejai ngesi keda neejai Papake, Yawe. Anu bo ice koponesioke? Ido epone ani ipedoria oni aputoor Yesu kotoma aijarawok?

1. Epone ani eputotor Yesu ka Papake?

Naajaar Yesu toma akuj, abu ngesi kosesen Papake loemin ido abu kisisiau iponesioke adaun ikar luipu noi. Kanuangun epone loeomooma, loepupia, ido loiswama Yesu iboro eputosi keda Papake. (Kosiom Yokana 5:19.) Eebo, eputoorit Yesu Papake ejok noi kotoma oponesio ido ngun abalar nges ebe: “Yenikaanyunit eong, eanyunit Papa.” (Yokana 14:9) Naisisiaunia jo iponesio luka Yesu, ibuni ijo ajenun Yawe jokan. Kwape aanyunet, epone loapodokinitor Yesu itunga itodunit epone loepodokinitor Yawe ijo.

2. Epone ani itodunitor Yesu ebe emina ngesi Yawe?

Abala Yesu ebe: “Konye eswamai eong kwape kecorakinitor Papa, tetere ejenunete akwapin ebe amina eong Papa.” (Yokana 14:31) Naajaar ngesi toma akwap, abu Yesu kitodu amin naepol neejai Papake kopone loka arimaarit nges karaida kojautene loationor nges aswam ngun. Bobo da, naarai amina Yesu Papake noi, alimonokini itunga nuikamunitos Nges, ido abu ingarak kes adukun epaperone keda Yawe.—Yokana 14:23.

3. Epone ani itodunitor Yesu ebe emina ngesi itunga?

Inera Ebaibuli kanuikamunitos Yesu ebe “ajai akaiyalama neejaas idwe luka itunga.” (Awaragasia 8:31) Abu ngesi kitodu aminake kopone kalo aisinyikonokin ka aingaranakin itunga. Abu kiswama aumonokineta nuetodunitos mere akepedor bon konye akepodokinit da. (Marako 1:40-42) Ayait Yesu itunga kotoma asianut ido mam nges asei ikur kobaale. Apotu akekiro kitalakaasi ikapupokoke luajokuka itauon ka ainakin kes amun. Abu Yesu kocam aiticanio ka atwanare naarai emina ngesi itunga kere. Konye kanoinoi emina ngesi ngul luerimaaritos aisisianakinetake.—Kosiom Yokana 15:13, 14.

KISISIAU NUIPU

Kisisiau nuipu nuikamunitos iponesio luka Yesu. Ido kojenu epone loipedoria ijo da aitodun amin keda asianut kwape ka Yesu.

4. Emina Yesu Papake

Aanyunet naka Yesu isisianakini oni epone loitodunet ebe imina oni Edeke. Kosiom Luka 6:12 keda Yokana 15:10; 17:26. Akaulo naka aisiom ngolikokoro, komorata aingiset nata:

Atupitos aanyunet naka Yesu, epone ani ipedoria oni aitodun ebe imina oni Yawe?

Amina Yesu Papake lokotoma akuj ido enerenenas kanges kotoma ailip

5. Epodokinit Yesu itunga lukican

Apodokinit Yesu nuka luce adepar nuke. Karaida naapasitor nges, etwasamai ngesi apakike keda akegogong aingarakinia itunga. Kosiom Marako 6:30-44, kosodete aimor aingiseta nuta:

Kotoma akiro kangun, anu bo iwaitin luabu Yesu kitodunia ebe apodokinit ngesi itunga?—Koany ikokoron 31, 34, 41, keda 42.
Inyo abu koinak Yesu aingarakin itunga?—Koany ekokoro lo 34.
Kwape itodunitor Yesu iponesio luka Yawe, anyoika bo nuisisiauni ijo kaneejai ngesi nuikamunitos Yawe?
Anu bo iwaitin luipedoria oni da aputoor Yesu kotoma apodokinit itunga?

6. Erai Yesu loekori

Arai Yesu loakori karaida ekidioko ngesi iboro luajaatar, ido isinyikokinit ngesi oni da araut luikori. Kosiom Aswamisio 20:35, kosodete aimor aingiset nata:

Katupitos nuabala Yesu, epone ani ipedoria oni araut luiyalama?

Koboliak EBIDIO, kosodete aimor aingiset naetupakini.

EBIDIO: “Epol Aiyalama Kotoma Aikor”—Nuetiakunitai (4:00)

Anu irotin luipedoria oni aikor karaida ikidioko iboro luijaatar oni?

Ijeni kereka jo?

Isisianakini Ebaibuli oni ailip neejai Yawe kokiror loka Yesu. (Kosiom Yokana 16:23, 24.) Nailipia oni kopone kangol, itoduni oni ebe isiyalamikinit oni nuabu Yesu kiswama kanu aingarakin oni araun ipapero luka Yawe.

EBAKASI ICETUNGA EBE: “Mam Edeke epodokinit nuikamunitos aiticanitoiwok.”