AISISIAET NA 22

Epone bo Ani Ipedoria Ijo Alimonokin Akiro Nukajokak?

KOBOLIAK

Nainyikokinia ijo aisisia akiro nukajokak, ipedori ijo aomoom ebe, ‘Ibusakinit itunga kere apupun akiro nu!’ Eebo cut, ibusakinit itunga kere aiirar akiro nukajokak! Konye epedorete ice aipup akuriau kanuikamunitos alimonokin luce akiro nuesisiautu kesi. Amorata ber oni nuikamunitos epone loipedoria ijo aipikor akuriau ngin kosodi alimonokin akiro nukajokak kaiyalama.

1. Epone ani ipedoria ijo aimor akiro nuajokak nuisisiau ijo keda itunga luijeni jo?

Apotu ikesisiak luka Yesu kotemasi atiar: “Mam kipedori ainyein einer akiro nukianyunit ka nukiirarit da.” (Aswamisio 4:20) Aminasi kesi abeit naesisiaunitos ido akotosi kesi aimor kitunga luipu akiro ngun. Ipupi kereka ijo da epone ngon? Arai erai kwangin, kotam aimor keda lukokalekon ka ipaperokon akiro nuisisiau ijo.—Kosiom Ikolosain 4:6.

Epone loipedoria ijo ageun

Naineratar ijo keda lukokalekon, kitegea aimor keda kesi akiro nuka Obaibuli kobala ebe: “Ejaasi akiro nuajokak nuesisiaunit eong kosabiiti kalo.”
Komorata keda ipapero yenedeka arai bo yeniyalongongo ekokoro loisinyikokini.
Komorata keda itunganan yeniswamaete kajo ido kokoto ajenun epone loelositor ekonisabiiti, nuisisiaunit ijo koBaibuli arai bo kairiamununeta.
Itodik ikonipapero elago loka jw.org.
Kolimok luce abunere aiboikin neisisia ijo Ebaibuli kanu apupokin, arai bo kitodik kesi epone loingitunere aisisia kojw.org.

2. Kanuinyo eraar alimonokin nepepe keda atukot alosikinet naejok noi?

Apotu ikesisiak luka Yesu kiswamata kagogong alimonokin akiro nukajokak mere otunga bon luajenete kesi. Abu Yesu “kiyakia kes iarei iarei aingarenikin nges alosit ngolire” alimonokin. (Luka 10:1) Alimonokin na naetupitere ainapeta abu koinak itunga luipu arereng naka aiirar akiro nukajokak. Apotu bobo ikesisiak kodumutu aiyalama kotoma alimonokin nepepe kaluce. (Luka 10:17) Ipedori kereka ijo da aitolomun alosikinet naka alimonokin nepepe keda atukot?

KISISIAU NUIPU

Kisisiau epone loipedoria ijo aipikor akuriau kosodi adumun aiyalama kotoma alimonokin akiro nukajokak.

3. Ingarakini Yawe ijo

Epedorete icetunga luekotosi alimonokin akurianikin epone loaticepak eseseniata itunga kes ka nueminasi atakanun.

Ikuriana kereka ijo aimor keda luce akiro nuisisiau ijo? Kanuinyo, arai bo kanuinyo mam?

Koboliak EBIDIO, kosodete aimor aingiset naetupakini.

EBIDIO: Abu Eong Elip Yawe Ainakin Eong Atiting (4:05)

Epone ani apotu atumunak lu kipikoriata akuriau?

Kosiom Isaia 41:10, kosodete aimor aingiset nata:

Epone ani epedoria ailip aingarakin ijo naejaar ijo akurian?

Ijeni kereka jo?

Ajenak Luka Yawe luipu aomitos sek ebe mam kesi apedorete adumun atiting naka aimor keda luce akiro nukajokak. Kwape aanyunet, kotoma apolounike akuriana Sergey noi ido ationikit nges einer keda luce. Konye abu ngesi kisisia Ebaibuli. Abu ngesi kotema atiar: “Karaida akuriana eong, abu eong agea einer keda itunga akiro nuesisiau eong. Nukaumokin, abu alimonokin koinak eong araun loatiting. Ido abu kitogogong akaiyuun.”

4. Kitodu ayongit

Eroko ijo emora akiro nukajokak keda luce, koomoom ber nuibusakinit ijo alimun ka epone loipedoria alimun ngun jokan ido kitodunite ayongit. Kosiom 2 Timoteo 2:24 keda 1 Petero 3:15, kosodete aimor aingiseta nuta:

Epone ani ipedoria ijo aibwaikin ikokoron ngul toma aswamisioit naimoriata ijo kaluce akiro nuko Obaibuli?
Aticepak mam icetunga lukokale arai bo icepapero epedorete acamun nuinera ijo. Anyoika nuipedori ijo aswam? Inyo mam ibusakinit ijo aswam?
Kanuinyo ejokunar jo aitwasam aingiseta nuibecokina itia aikenyakin itunganan nuibusakinit ngesi aiyuun?

5. Aimor kaluce akiro nukajokak eyauni aiyalama

Abu Yawe kijaik Yesu aswam naka alimonokin akiro nukajokak. Epone ani ayaitor Yesu aswam ngin? Kosiom Yokana 4:34, kosodete aimor aingiseta nuta:

Inyamat luinyami oni itogogongitos akuan ido einakinitos oni aiyalama. Kanuinyo etupusitor Yesu aswam akote naka Edeke keda inyamat?
Iwomit ijo ani bo ajokis naidumuni ijo kotoma aswam naka alimonokin?

Aomisio nuijaikinitai

Kotoma airiamununeta nukokiding naka esabiiti, kotam aanyun epone loipedoria jo aitegear einer keda itunganan nuikamunitos akiro nukajokak.
Kinerakinos keda esisianakinanikon nuikamunitos epone loipedoria ijo araun esisian kotoma airiamununeta nukokiding naka esabiiti. Atutubena nuijaanakinete esisiak kotoma airiamununeta ingarakinete ijo akapakin aimor keda luce akiro nuisisiau ijo.
Kitwasam akiro nuka atutubet “Ebakasi Icetunga Ebe” arai bo “Epedori Ice Aingit Ebe” nukotoma oitaabo kalo aitetemonoria epone loipedoria ijo abongokin akiro nuelimunete itunga nuepedorete aitukurwoor ijo kotoma alimonokin.

EPEDORI ICE AINGIT EBE: “Anyoika bo nuitetiak?”