AISISIAET NA 39
Epone Loeyaitor Edeke Aokot
Epol aokot ajokis noi. Mam oni ipedori aijar komameete aokot. Naarai ngesi Lokasuban, ejaatar Edeke keda apedor naka alimokin oni nuikamunitos eitwasamae loka aokot. Anyoika bo nuebala ngesi nuikamunitos aokot? Ibusakinit kereka itunga ainyam arai bo aiyasio aokot? Epone ani ipedoria ijo aitolomun aseuneta nuejok kotoma akiro angun?
1. Epone ani eyaitor Yawe aokot?
Abu Yawe kolimok ejaanakinakake lukolo sek ebe: “Aijar naka akuan kere nges aokotoke.” (Ilebin 17:14) Kaneejai Yawe, ebwoikinitos aokot aijar. Kwape eraar aijar ainakinet naitegelikina naijaikinit Yawe oni, eraasi aokot da nuitegelikina.
2. Ani eitwasamae loka aokot lomam Edeke ekoto?
Abu Yawe kicorak ikejaanakinakake lukolo sek mam ainyam aokot. (Kosiom Ageun 9:4 keda Ilebin 17:10.) Abu ngesi kitogogongoo aicorakinet na kapak naabu atukot naeyait kapakio nuka ikiyakia kicorakinia ebe “kinaca . . . aokot.”—Kosiom Aswamisio 15:28, 29.
Inyoin bo apolou naka ainac aokot? Kelimok ijo emuron aitaleor ajon inyikokini kereka ijo aimat? Icamuni kereka jo ainyam inyamat luinyalakinitai ajon arai bo nat aicumakin ajon akuanakon? Mam cut. Kwape kwangin da, aicorakinet naka Edeke naka ainac aokot, erai akepolou ebe mam ibusakinit oni aimat aokot arai bo ainyam akiring naamam aokot eyiunitos ejok. Bobo da mam ibusakinit oni ainyam inyamat luinyalakinitai aokot.
Do bo amukian naitwasamaere aokot? Iponesio ice luka amukian ebilitos ikisila luka Edeke. Imoriarit amukian ngin aiyasio aokot, arai bo aiyasio naka atutubena nuepolok nuka aokot kwape nat—red cells, white cells, platelets, keda plasma. Iceponesio luka amukian mam isideleleunitos cut arai ebilitos aicorakinet naka Edeke naikamunit aokot. Kwape aanyunet, koponesio ice luka amukian itwasamao itutubena ludidik luka aokot. Amukian bobo ace imoriarit aitwasam aokot nuka itunganan kangipe kangin yenimukeo. Naitereikinor oni keda amukian naepone kangon, ibusakinit nginitunganan kaoni aitolomun aseuneteke ilopet. a—Igalatian 6:5.
KISISIAU NUIPU
Kisisiau epone loitolomunet aseuneta nuka amukian naimoriarit aitwasam aokot.
3. Kitolom aseuneta nuka amukian naisiyalamikinit Yawe
Epone ani ipedoria oni aitolomun aseuneta nuka amukian naecamanara keda nuicorakinit Yawe? Koboliak EBIDIO, kosodete aitetem ajokis naka atupakin akiro nuitodiaritai kokwap.
-
Kilip acoa.—Yakob 1:5.
-
Komoo aicoreta nuka Ebaibuli ido koomoom epone loibwaikinet kes toma aswamisioit.—Awaragasia 13:16.
-
Kojenu iponesio luka amukian luejaasi aiboisitikon.
-
Kojenu iponesio luka amukian lumam ijo icamunit.
-
Koany ebe einakini aseunetekon ijo asalakinit keda aomisio nuelaete.—Aswamisio 24:16. b
-
Kiitu ebe mam idiotunganan—aimoriarit yenikowaikon, ekimat, arai bo yenisisianakini ijo Ebaibuli ibusakinit aseikin ijo nuiswama kotoma akiro kanu nuekotosi nginitunganan aitwasam aomisioke.—Iromayon 14:12.
-
Kiwadik aseunetakon.
4. Ekotosi Ajenak Luka Yawe amukian naejok noi
Atupakinit ikisila luka Edeke luikamunitos aokot keda adumun amukian naejok naamam itwasamaere aokot, epedor. Koboliak EBIDIO.
Kosiom Tito 3:2, kosodete aimor aingiset nata:
-
Kanuinyo ibusakinitor oni einer keda imurok luka adekis kotoma aitasono ido ketodunitos ayongit?
|
Nuebeit Ainger |
Ikristayot Ilope Eseuni |
|---|---|
|
A. Plasma |
Itutubena ludidik luka aokot luelemunitai kotoma plasma |
|
B. White cells |
Itutubena ludidik luka aokot luelemunitai kotoma white cells |
|
C. Platelets |
Itutubena ludidik luka aokot luelemunitai kotoma platelets |
|
D. Red cells |
Itutubena ludidik luka aokot luelemunitai kotoma red cells |
5. Naitwasamaere itutubena ludidik luka aokot kotoma amukian
Ejaatar aokot keda atutubena aongon nuapolok—red cells, white cells, platelets, keda plasma. Ejaatar atutubena nu keda itutubena bobo ice ludidik luenyaritai blood fractions. c Itutubena ngul ice imorikikinio keda iboro ice aiswamaunia ikee luingarakinete aitijii adekasinei ace arai bo aitikokin aii.
Konye kanuikamunitos itutubena ludidik luka aokot, ibusakinit Nginikristayot aseun kitwasamai akeomisio nuituutoorit Ebaibuli. Epedorete ice aseun ainger amukian naimoriarit aitwasam itutubena ludidik luka aokot. Konye ice epedorete aomisiokec acamakin kesi adumun amukian naimoriarit aitwasam itutubena ngul ludidik.
Naitolomunia ijo aseunetekon, kingitakin ber ijo ebe:
-
Epone ani etetemikinia eong emuron kanuinyo acamunitor eong arai bo angeritor eong amukian adio naimoriarit itutubena ludidik luka aokot?
EPEDORI ICE AINGIT EBE: “Inyo aronis itunganan acamun aiyatakinio aokot?”
-
Iwomit ijo biai?
NUIDAU AISISIAUN
Mam Yawe ekoto oni aitwasam aokot kopone lomam ebeitor.
Ainyogoor
-
Kanuinyo eyaitor Yawe aokot kwape ibore yenikalaunan?
-
Epone ani ijenunia oni ebe aicorakinet naka Edeke naka ainac aokot, imoriarit ainger aiyasio aokot?
-
Epone ani ipedoria jo aitolomunun aseuneta nuejokuka nuikamunitos amukian naimoriarit aitwasam aokot?
ISISIAU BOBO NUTA
Anyoika bo akiro nuebeit ijo aomoom eringa jo itolomuna aseunet naikamunit amukian naimoriarit aitwasam aokotokon?
“Aingiseta Kaneejaasi Ikasiomak” (Watchtower, Elap Loitomonet 15, 2000)
Anu bo akiro nuebeit ijo aomoom eringa itolomuna aseunet naikamunit amukian naimoriarit aitwasam itutubena ludidik luka aokot?
“Aingiseta Kaneejaasi Ikasiomak” (Watchtower, Elap Loikanyetaape 15, 2004)
Inyo ainakini emuron acamun ebe ejokuna epone loeyaitor Yawe aokot?
“Abu Eong Acam Ebe Ejokuna Epone Loeyaitor Edeke Aokot” (Awake!, Elap Loitomonetaarei 8, 2003)
Kisisiau epone loingarakinitotor imakio luijaanakinete Kokomitin Luerucokinitos Akiro Nuka Amukian iinacan keda ainacan.
a Koany Aisisiaet Na 35, “Epone Loipedoria Oni Aitolomunun Aseuneta Nuejokuka.”
b Koany akirot na 5, “Naitwasamaere Itutubena Ludidik Luka Aokot Kotoma Amukian”; Nuengesete 3, “Iponesio Luka Amukian Luimoriaritos Aitwasam Aokot”; keda Our Kingdom Minisitry Lo Olap Loitomonetadiop apapulai 3-6.
c Imurok ice eyaitos atutubena aongon nuapolok nuka aokot kwape itutubena ludidik. Kanuangun, ibusakinit ijo aitetemikin imurok abwoetaitikon naka ainger aiyatakinio aokot arai bo atutubena aongon nuapolok nuka aokot nuimoriaritos red cells, white cells, platelets, keda plasma.
