AISISIAET NA 44
Isiyalamikinitos Kereka Ipucino Kere Edeke?
Ekoto Yawe oni alelakin aijar ka ainumunum apakio ace. Konye ipucino kere ka apaarasia kere nuapolok isiyalamikinitos kereka Yawe? Epone ani itodunia oni ebe imina oni Yawe kotoma akiro kanu?
1. Kanuinyo mam ipucino luipu isiyalamikinitotor Yawe?
Ipedori ijo aumokin aisisiaun ebe ipucino luipu mam ecamanara keda aisisianakineta nuka Ebaibuli, ido elomunitos kaiyuununeta nuka ikapirin. Ipucino kwape kangul, eraasi aticepak luelomunitos kodiinin luka aisab. Ido aticepak erucokina kecudet arai bo elomunitos kotoma kanuiyuunitos itunga ebe mam emoyo etwani. Elomunitos bobo ipucino ice kotoma amuroonut arai bo aiyuuneta nukaisab kwape nat nuebalare ebe etakanunete nueroko arai mam etupitai einono. (Isaia 65:11) Ikwenyakit Yawe luemaete nges ebe: “Kotiakas kakes, sirikitirosi ibore yenimam elai.”—2 Ikorinton 6:17. a
2. Epone ani epupio Yawe kanuikamunitos ipucino luijaikinitos itunga aibuses namam ebeit kes?
Ikwenyarit Yawe oni acoit alomar oic loka araut “yenemunokina itunganan.” (Kosiom Yeremia 17:5.) Icepucino, itopolooritos epugak arai isirikalei. Ice itopolooritos ijenuneta luka akwapukec ka apaarasia nuka aipugaikin bon. (1 Yokana 5:21) Ido ice itopolooritos politikis keda atukono nuka itunga. Epone ani epupio Yawe arai kijaik oni itunga arai bo atukona aibuses namam ebeit kes kacut ngul lumam iswamaete akote naka Edeke?
3. Anu bo aswamisio nuepedorete ainakin ipucino araut lueroko?
Itoronit Ebaibuli “emeret, aboliasio [nueroko, ka] edengo.” (1 Petero 4:3) Kotoma opucino ice, epedorete itunga aitodun amamut aitikokina ido edotiete. Kanu oni araut ipapero luka Yawe, ekoto oni aisac aswamisio nueroko.
KISISIAU NUIPU
Kisisiau epone loipedoria ijo aisiyalamikin Yawe kotoma aitolomunun aseuneta nuejok nuikamanara keda apaarasia nuapolok ka ipucino.
4. Kosac ipucino lumam isiyalamikinitos Yawe
Kosiom Ipeson 5:10, kosodete aimor aingiseta nuta:
-
Anu bo nuibusakinit oni aiitunit naiseunia arai inumunumei apaaran naapolon arai mam?
-
Anu bo apaarasia nuapolok nuetapit itunga ainumunum katutubetekon?
-
Iwomit kereka jo ebe apaarasia ngun nuapolok nuinumunumete itunga isiyalamikinitos Yawe?
Kwape aanyunet, iwomoomotor kereka ijo epone loepupio Edeke kanuikamunitos ainumunum apaaran naka aurio? Mam Ebaibuli inerit nuikamunitos idiotunganan yenejaanakini Edeke Yawe yeninumunumitor apaaranike naka aurio, konye itejenunit nuikamunitos itunga iarei lumam ejaanakinete Yawe luapotu inumunumata apaarasiakec nuka aurio. Kosiom Ageun 40:20-22 keda Matayo 14:6-10. Kosodete aimor aingiseta nuta:
-
Anyoika bo nuapotu iswamaunos kapaarasia kanu aarei nuka ainumunum aurio?
-
Katupitos akiro nu nuitejenunit Ebaibuli, iwomit ijo epone ani esesenia Yawe ainumunum apaarasia nuka aurio?
Aticepak, ipedori ijo aingitakin ebe, ‘Epodokinit kereka Yawe arai kenumunum eong apaaran naka aurio ka acepaarasia da nuapolok numam Ebaibuli itojokit?’ Kosiom Anyoun 32:1-8. Kosodete, aboliakin EBIDIO ido komorata aingiseta nuetupakinete.
-
Kanuinyo ibusakinitor oni aijen nuekoto Yawe?
-
Epone ani ipedoria oni aswam ngun?
Epone lojenunet arai erai ediopucit lomam isiyalamikinit Edeke
-
Erai kereka epucit ngol loelomunit kotoma aisisianakineta nukaisab? Kanu ajenun, kongic neelomunitor epucit ngol.
-
Itopoloorit kereka epucit ngol itunga, atukono, ka ijenuneta luka adiokwap? Itopoloorit oni Yawe adepar idiotunganan arai idiobore kere ido imunokina oni ngesi kanu aitemokin atiokisio nuka itunga.
-
Ecamanara kereka inonosio ka aswamisio nuka opucit kangol keda aicoreta nuka Ebaibuli? Ibusakinit oni asalakinit ilai koponesio kere.
5. Ingarak luce amisiikin nuiyuunit ijo
Epedori aticepak araut ibore yenetiono ijo agirokin itunga luitingaikinitos ijo ainumunum ipucino lumam isiyalamikinitos Yawe. Itetem aseunetakon kopone loitodunit atitingikinit ka ayongit. Kwape aanyunet kanu aisisiaun epone loiswamaet nu, koboliak EBIDIO.
Kosiom Matayo 7:12, kosodete aimor aingiseta nuta:
-
Katupitos ekokoro ngon, ibusakinit kereka jo alimokin luokalekon lumam ijaanakinete Yawe ainyekin ainumunum apaarasia nuapolok?
-
Inyo ipedori ijo aswam kanu aitacaikin kesi ebe karaida mam ijo inumunumei kakes apaarasia nuapolok, imina ido ipodokinit ijo kes?
6. Ekotor Yawe oni aiyalama
Ekoto Yawe oni ailel keda lukokalewok ka ipapero. Kosiom Ekalimonokinan 8:15, kosodete aimor aingiset nata:
-
Epone ani itodunitor ekokoro lo ebe ekoto Yawe oni eyalamasi?
Ekoto Yawe iketunga adumun apak naka alakanar ka ailel nepepe kaluce. Koboliak EBIDIO kanu aisisiaun epone loiyalamatar itunga kotoma atukonokinikosi nakapolon naka akwapin nuegelegela.
Kosiom Igalatian 6:10, kosodete aimor aingiseta nuta:
-
Kanu ‘aiswamakin luce nuejok,’ ibusakinit kereka oni ainumunum apaarasia nuapolok nuetapit itunga ainumunum?
-
Aikor naepone ani einakini ijo aiyalama, aikor kanu aitodolikin einono loka apaarasia nuapolok arai bo aikor naelomunit kotau?
-
Acepakio, Ajenak Luka Yawe luipu iswamanakinete ikecedwe iboro luitegelikina ka akoranakin kes ainakineta. Arai ejaasi ijo idwe, anyoika bo nuitegelikina nuipedori ijo aiswamakin kes?
EBAKASI ICETUNGA EBE: “Neelomunitor ainumunumio naka apaaran nakapolon, mam erai ibore yenepol. Konye ibore yenepol ngesi ikalia ailel nepepe ka ikecepapero.”
-
Itemari bo jo ai?
NUIDAU AISISIAUN
Ekoto Yawe oni adumun apak naka ailel nepepe keda lukokalewok ka ipapero. Konye ekoto bobo ngesi oni aisac ipucino lumam isiyalamikinitos nges.
Ainyogoor
-
Anu bo aingiseta nuipedori oni aingitakin kanu ajenun arai erai ediopucit loisiyalamikinit Yawe?
-
Epone ani ipedoria oni aingarakin lukokalewok ka ipapero amisiikin aseunetawok nuikamanara keda ainumunum apaarasia nuapolok?
-
Epone ani ipedoria ijo ajenun ebe ekoto Yawe oni ajaut kaiyalama arai bo alakanar?
ISISIAU BOBO NUTA
Kisisiau nuikamunitos ace kotoma apaarasia nuapolok numam Ikristayon lukabeit inumunumete.
“Kanuinyo Mam Ajenak Luka Yawe Inumunumiata Acepaarasia Nuapolok?” (Aisisiaet naka olago)
Koany akiro aongon nuepolok nuiyuunitor sio ebe acepaarasia nuapolok nuinumunumio mam isiyalamikinitos Edeke.
“Kanuinyo Mam Ajenak Luka Yawe Inumunumiata Apaarasia Nuka Aurio?” (Aisisiaet naka olago)
Kisisiau epone loabu atumunan kopedoria atereikin jokan ka luakwenatar ngesi osomero kanu amamut ainyam Ebaga.
Aseutu Ikristayon luipu amamut ainyam Ebaga. Ipupi jo biai kanu aseunetekec?
“Apotu Kesi Kodumutu Ibore Yenejok Noi” (Watchtower, Elap Loitomonetaarei 1, 2012)
a Koany Nuengesete 5 kanu aisisiaun nuibusakinit aswam nainumunumiata icetunga apaarasia nuapolok.
