AISISIAET NA 46
Kanuinyo Ibusakinitor Ijo Ainakin Akoniijar Neejai Yawe ka Aibatisaun?
Iinakini ijo akoniijar neejai Yawe kopone loka aisumunikin nges kotoma ailip ebe ibuni jo aima ngesi bon ka aisingarenit aswam akoteke. (Isabulin 40:8) Kidau jo ainakin akoniijar neejai Yawe, ipedori ijo aibatisaun. Naibatisaunor ijo, itodikini ijo luce ebe idau jo ainakin akoniijar neejai Yawe. Aseunet naka ainakin akoniijar neejai Yawe, erai aseunet naepol kakere naipedori ijo aiswamaun kotoma aijarakon. Inyo aticepak epedori ainakin ijo aitolomun aseunet naepol kwape kangin?
1. Inyo epedori aijaikin itunganan ainakin akeijar neejai Yawe?
Erai amin ngesi ijaikini itunganan ainakin akeijar neejai Yawe. (1 Yokana 4:10, 19) Elimokinit Ebaibuli oni ebe: “Komina Ejakait Ekonideke kekonitau kere, ka akoniijar kere, ka akonicoa kere, ka akonigogong kere.” (Marako 12:30) Itoduni oni ebe imina oni Edeke mere kotoma oiner bon, konye kotoma aswamisio da. Kwape edukokinotor aberu keda ekiliokit lueminanara, kwape kwangin da, amina Yawe ijaikini oni ainakin awokoijar neejai ngesi kasodete aibatisaun.
2. Anu bo arerengusio nueinakini Yawe ejaanakinakake luibatisauna?
Naibatisaunor ijo iraun jo yenikokale loiyalama loka Yawe. Eminuni ngesi ijo koponesio luegelegela, ido inyikokini jo aikunyakin neejai ngesi adepar nelem sek. (Kosiom Malaki 3:16-18.) Eraun Yawe Papakon ido idumuni jo ekale loka iinacan luka akwap kere lueminasi Yawe ido kominasi ijo da. (Kosiom Marako 10:29, 30.) Konye ejaasi nuibusakinit ijo aswam eroko jo ibatisauna. Ibusakinit ijo aisisia nuikamunitos Yawe, amina nges, ka aiyuun Okokuke. Kosodi konyet ijo ainakin akoniijar neejai Yawe. Arai kiswama jo ngun kosodi aibatisaun, apolouke igeu kwana ijo alosenen korot loebei toma aijar namam edaun. Ebala Akirot Naka Edeke ebe: erai ‘aibatisao, naitajari yes kwana.’—1 Petero 3:21.
KISISIAU NUIPU
Kisisiau kanuinyo eraar ibore yenepol ijo ainakin akoniijar neejai Yawe kosodi aibatisaun.
3. Oni kere ibusakinit aseun ingai ebeit oni aima
Aomitos icetunga kolo sek koIsirael ebe apedorete kesi aijaanakin Yawe ka Baal da, edeke loka aisab. Konye abu Yawe kijuka ekenaabi Eliya aitetenaar eomoomoekec loaronon. Kosiom 1 Ikabakan 18:21, kosodete aimor aingiset nata:
-
Anyoika bo nuebusakinit Isiraelin aseun?
Kwape ka Isiraelin, oni da ibusakinit aseun Edeke loebeit oni aijaanakin. Kosiom Luka 16:13, kosodete aimor aingiseta nuta:
-
Kanuinyo mam oni ipedoria aijaanakin Yawe nepepe kidekesio ice da?
-
Epone ani itodikinia oni Yawe ebe iseunit oni aima nges?
4. Koomoom nuikamunitos epone loeminar Yawe ijo
Ainaki Yawe oni ainakineta nuketiai loepol. Inyo ipedori oni da aijaikin nges? Koboliak EBIDIO.
Anu bo iwaitin luetodikinia Yawe jo akemin? Kosiom Isabulin 104:14, 15 keda 1 Yokana 4:9, 10, kosodete aimor aingiseta nuta:
-
Anu bo ainakineta nuijaikinit Yawe oni nuiyalamar ijo noi?
-
Epone ani ijaikinitotor ainakineta ngun ijo aipup kanuikamunitos Yawe?
Naijaikinere oni ainakinet naeminakinit oni noi, isiyalamikini oni itunganan yenainakini oni ainakinet ngin. Kosiom Ikisila 16:17, kosodete aimor aingiset nata:
-
Naiwoomooma ijo nuikamunitos iboro kere lueswamaki Yawe ijo, inyoin bo ikotokin ijo ainakin nges?
5. Ainakin akoniijar neejai Yawe eyauni arerengusio nuipu
Itunga luipu eomitos ebe ajenara, ajaut kaswam naejok, arai bo abar einakini kesi ajaut kaiyalama. Eraasi kereka ngun abeit? Koboliak EBIDIO, kosodete aimor aingiseta nuetupakinete.
-
Karaida amina abolobolon ngol abolia emopiira, kanuinyo ajalakinia ngesi abolobol aipet emopiira?
-
Abu ngesi koseu aisingarenit aijaanakin Yawe ketau kere itia abolia emopiira. Iwomit kereka ijo ebe ajok aseuneteke? Kanuinyo?
Eroko Paul erauna Ekristayot, ajaatar ngesi keda aswam naekeara adoketait. Isisiat ngesi ikisila luka Iyuudayan kaneejai esisianakinan loajenara noi. Konye abu ngesi kojalak ngun kere kanu araun Ekristayot. Apupi kereka Paul bala abu akeseunet kitwatania nges? Kosiom Ipilipin 3:8, kosodete aimor aingiseta nuta:
-
Kanuinyo atemaria Paul ebe nuabu ngesi kiswamate eroko erauna Ekristayot araasi “acin,” arai bo nat agasia?
-
Anu bo ajokisio nuabu ngesi kodum?
-
Ejai kereka ecepone loipedoria jo aitwasam akoniijar ejok adepar aijaanakin Yawe?
Naaraunor Paul Ekristayot, abu ngesi kimedau noi adepar nuabu ngesi kopal
EBAKASI ICETUNGA EBE: “Mam ejok itunganan aitwasam akepak kere aijaanakinia Edeke.”
-
Iwomit ijo kanuinyo ibusakinitor ijo ainakin akoniijar neejai Yawe?
NUIDAU AISISIAUN
Ijaikini amin oni ainakin aijarawok neejai Yawe kasodete aibatisaun.
Ainyogoor
-
Kanuinyo ibusakinitor oni aima ka amina Yawe?
-
Epone ani eropia Yawe Ajenakake luibatisauna?
-
Ikoto kereka ijo ainakin akoniijar neejai Yawe?
ISISIAU BOBO NUTA
Koany kanuinyo apotu ayoon ka abolobolon koseuniata ainakin akeceijar neejai Yawe.
Aingiseta Nuingisitos Atumunak—Epone Ani Akotor Eong Aitwasam Akaijar?—Aiitor (6:54)
Kisisiau bobo akiro ace nuibusakinitor ijo ainakin akoniijar neejai Yawe.
“Kanuinyo Ibusakinitor Ijo Ainakin Akoniijar Neejai Yawe?” (Watchtower, Elap Losodit 15, 2010)
Kotoma obidio kalo loka emiusik, kowany aiyalama naedumunete ngul lueinakinete akeceijar neejai Yawe.
Kotoma akou naka akirot naebala ebe “Ikar Ngul Kere Aomoomoi Eong ebe, ‘Inyo Alosikinet Naka Aijar?’” kisisiau ibore yenainakini aberu adiopet aijulakin.
“Ijulakini Ebaibuli Itunga” (Watchtower, Elap Loitomonetadiop 1, 2012)
