AISISIAET NA 59
Ipedori Ijo Atitingikin Areio
Ediosawa kere epedorete itunga aitepeg arai bo areun oni. Ibusakinit kereka ngun ainakin oni akurianar?
1. Kanuinyo kijenia ebe edoikini areio oni?
Itacaunit Ebaibuli cut ebe: “Ereunio kere luekotos aijar kayongit Edeke kotoma Kristo Yesu.” (2 Timoteo 3:12) Areunitai Yesu naarai mam ngesi arai loka akwap naka Satan. Oni da mam irai luka akwapin, kanuangun mam oni iriengunit naidumunia areio kama ejaasi epugak luka akwap kana arai bo engarenok luka idiinin.—Yokana 15:18, 19.
2. Epone ani ipedoria oni akapakin kanu atereikin keda areio?
Ibusakinit oni kwape kwana aitogogong amunokinawok neejai Yawe. Koridu apak nginipaaran kanu ailip neejai Yawe keda asiomenen Akirotoke. Ojaunun airiamununeta nuka atukot. Aiswamaenen ngun, isipedoori jo adumun agogong ka atiting naipuda jo kanu atereikin keda areio, karaida ebunit areio ngin kaneejaasi lukokale. Abu ekiyakia Paul loareunitai kotema ebe: ‘Ejakait nges erai ekengarakinanika, mam akurianar.’—Iburanian 13:6.
Ipedori bobo oni adukun atiting kotoma adunyakinit alimonokin. Alimonokin, isisianakini oni amunokina Yawe ido isipedoori oni alemar akurian itunga. (Awaragasia 29:25) Kititingoor oni alimonokin kwape kwana, ingarakini ngin oni akapakina ainyikokinit alimonokin karaida kimik adiopugan oni aswam ngun koingaren.—1 Isesalonikan 2:2.
3. Epone ani ipedoria oni aimedaun kotoma angirikinit areio?
Erai abeit ebe, mam oni ilelakinit areio, konye naititingikinia oni areio, iyatakin aiyuuniwok agogongoor. Inyikokini oni aikunyakin neejai Yawe naiwanyunia oni ebe ingarakinit ngesi oni aipikor areio. (Kosiom Yakob 1:2-4.) Epupi Yawe erono naesesenia ngesi oni iwanyunit ican, konye eleli ngesi naeyanyunia ngesi oni ititingikinit atiokisio. Ebala Ebaibuli ebe: ‘Arai kiswamata nuejok, kisiriebi, kotitingikinitos, itojokitai ngun kama ejai Edeke.’ (1 Petero 2:20) Eropit loeinakini Yawe ngul luatitingikisi kotoma amunoonut, nges aijar naka ikar kere kotoma akwap naemameunotor ngul luitepegitos aima nakabeit.—Matayo 24:13.
KISISIAU NUIPU
Kisisiau kanuinyo ipedoria oni asalakin imunokina Yawe karaida kotoma areio keda epone loeropia Yawe oni.
4. Ipedori ijo atitingikin areio naelomunit kokale
Ajeni Yesu cut ebe epedorete ice lukokaliawok areun oni kanu aseunetewok naka aijaanakin Yawe. Kosiom Matayo 10:34-36, kosodete aimor aingiset nata:
-
Inyo epedorete ice kotoma okale aswam arai bo einer naiseunia ijo aijaanakin Yawe?
Kanu aisisiaun kotoma aanyunet adiopet naepone kangol, koboliak EBIDIO, kosodete aimor aingiset naetupakini.
-
Inyo bo iswamauni ijo ketamata ipajan arai bo ipaperokon aimik ijo aijaanakin Yawe?
Kosiom Isabulin 27:10 keda Marako 10:29, 30. Akaulo naka aisiom kangolikokoro, komorata aingiset nata:
-
Epone ani ingarakinia aisumunet na ijo naitereikinotor kareio kokale arai bo kaneejaasi ipapero?
5. Kinyikok aijaanakin Yawe karaida kotoma areio
Ipuda oni atiting naepol kanu aijaanakin Yawe kacut naetamitotor ice aimikit oni aswam ngun. Koboliak EBIDIO, kosodete aimor aingiset naetupakini.
-
Epone ani itogogongiata ijo aanyuneta nuitodiaritai kobidio kalo?
Kosiom Aswamisio 5:27-29 keda Iburanian 10:24, 25. Akaulo naka aisiom kangolikokoro, komorata aingiset nata:
-
Kanuinyo ibusakinitor oni ainyikokinit aima Yawe karaida kimik apugan oni alimonokin arai bo airiamunun nepepe?
6. Ingarakini Yawe ijo atitingikin
Anatar akwapin kere inyikokinitos Ajenak Luka Yawe luka aturio nuegelegela aijaanakin Yawe karaida kotoma areio. Kanu ajenun nuapotu ingarakisi kes, koboliak EBIDIO. Kosodete aimor aingiset naetupakini.
-
Kotoma obidio, inyo abu ingarak Ajenak ngul atitingikin?
Kosiom Iromayon 8:35, 37-39 keda Ipilipin 4:13. Akaulo naka aisiom kangolikokoro, komorata aingiset nata:
-
Epone ani itogogongitor ekokoro lo ebe ipedori ijo atitingikin adioitemisioit kere?
Kosiom Matayo 5:10-12, kosodete aimor aingiset nata:
-
Kanuinyo ipedoria ijo asalakin iyalama karaida itereikina keda areio?
Apedosi Ajenak Luka Yawe luipu atitingikin areio. Ipedori ijo da!
EBAKASI ICETUNGA EBE: “Mam eong apedori atitingikin areio.”
-
Anu bo ikokoron luepedorete ainakin kes atiting naipudasi?
NUIDAU AISISIAUN
Eyait Yawe aijaanakiniwok kwape ibore yenepol ajokis karaida itereikina oni kareio. Kingarakinite ngesi oni, ipedori oni atitingikin areio!
Ainyogoor
-
Kanuinyo ejeniata Ikristayon ebe epedori areio ajaun ediosawa kere?
-
Inyo ipedori ijo aswam kanu araut yenikapakina kebu areio?
-
Inyo epedori aingarakin ijo atitingoor karaida itereikina keda adioitemisioit?
ISISIAU BOBO NUTA
Kosesen kobidio kalo, onac loerai atumunan itetemi epone loengarakinia Yawe nges atitingikin kapak naawenitere ngesi kanuka amamut araut yenikakwapin.
Kisisiau nuapotu kingarakisi onac ka akeberu aijaanakin Yawe kamunoonut adaun ikar luipu karaida kotoma areio.
Kisisiau epone loipedoria ijo atereikin keda areio katiting.
“Itemonokin Kwape Kwana Kanuka Areio” (Watchtower, Elap Loikanyetaarei 2019)
Epone ani ibusakinitor oni ayait areio naelomuni kaneejaasi lukokale ido anyoika bo nuibusakinit oni aswam kanu ajaut kainapakin ka asalakinit imunokina Yawe?
“Eyaunit Abeit ‘Ekileng Mere Ainapakin’” (Watchtower, Elap Loitomonet 2017)
