1, 2. Anyoika bo nuipedori oni aswam kanu aitogogong eidicanewok keda Yawe?

IKOTO oni kere agogong keda angaleu. Ngesi inyamia oni, aijaikinit akuan aswam duc ka apodokinit aidar aijar. Karaida ipu nuebeit aswam, ejokuka nuidumuni oni arai mam oni itapalikin. Ikoto bobo oni agogong keda angaleu kopone ece.

² Arai da idaunit oni ajenun Yawe, ekoto oni ainyikokin aidar eidicanewok keda ngesi korai loegogong. Naesinyikokina Yuda Ikristayon ebe, “kidarasi bonik toma amin naka Edeke,” abu ngesi kitetem epone loiswamaunet ngun. Abu ngesi kolimok kesi ebe: “Kodukonoros kaiyuunikus nakalaunan noi.” (Yuda 20, 21) Aso epone bo ani idukunia oni aiyuun naegogong ka aidarakin toma amin naka Edeke?

3-5. (a) Epone bo ani ekotor Satan oni aomit kanuikamunitos aicoreta nuka Yawe? (b) Epone bo ani ipupio ijo kanuikamunitos ikisila ka aicoreta nuka Yawe?

³ Ibusakinit ijo ilopet amunokin ebe eraasi iponesio luka Yawe luejokuka noi. Ekoto Satan ijo aomoom ebe eraasi aicoreta nuka Edeke nuetioko ido ebe ipedori  ijo adumun aiyalama arai iseu ijo ilopet aswam nuikoto. Ameun komanikor loka Eden, ingalingali Satan itunga. (Ageun 3:1-6) Toni lolo, eroko nges ingalingali itunga.

⁴ Inera kereka Satan abeit? Eraasi kereka aicoreta nuka Yawe nueridakinitos? Mam. Kwape aitupuset, koomoom ber jo bala ijai ijo omanikor loibus noi. Kosodi jo aanyun ebe ejai aiboisit ace naebwaunitai. Aticepak ipedori jo abuonokin ebe, ‘Kanukinyo ebwaunitere aiboisit na?’ Konye kosodi jo apupun engatuny egatuni kojuwai. Epone bo ani ibunio ijo aipup kosawan kangun? Ibuni ijo aiyalamikin noi naarai ebawaunitai ijo kaneejai engatuny. Esubitos aicoreta nuka Yawe da bala abwaunet, ido esubit Satan bala engatuny. Ikwenyarit oni akirot naka Edeke ebe: “Kinyeis amer, kokwenyenenete. Lokasurupikus Satan irimirimi kwape engatuny loegat, emoot yenenyamari.”​—1 Petero 5:8.

⁵ Ekoto Yawe oni adumun aijar naejok. Mam nges ekoto Satan aingalingal oni. Nges ijaikinitor nges oni ikisila keda aicoreta kanu ayuwar ka aitalakaar oni. (Ipeson 6:11) Iwadikat Yakob ebe: “Yenirerei ikisila luedolito, luka aosikinio, kodunyakinite kotomakec . . . isirerengitoi itunganan ngin kotoma kanuiswamai.”​—Yakob 1:25.

6. Inyoin bo epedori aingarakin oni amisiikin ebe edolitos irotin luka Yawe?

⁶ Ibuni oni aitojokaar ejautene loka aijarawok ka aitogogong eidicanewok keda Yawe arai kitup oni aitetenaarioke. Kwape aanyunet imedauni oni arai ilipenenei oni duc neejai ngesi. (Matayo 6:5-8; 1 Isesalonikan  5:17) Idumuni oni aiyalama arai kirimaa oni aicoretait naka Edeke naka airiamunun nepepe aima nges ka aisinyikonokin bonik keda ajaun toma aswam naka alimonokin ka aisisianakin luce. (Matayo 28:19, 20; Igalatian 6:2; Iburanian 10:24, 25) Arai kiwomoom oni duc epone loengarakiniata iboro ngul oni, ebuni ngin aitogogong aiyuuniwok, ka aijaikin oni amisiikin jokan ebe edolitos irotin luka Yawe.

7, 8. Inyoin bo epedori aingarakin oni ainac aiyalongong kanuikamunitos atiokisio nuepote koingaren?

⁷ Aticepak imina oni agear abuonokin ebe ibuni oni atereikin keda atiokisio koingaren nuetioko noi numam oni ipedori aipikor. Arai iwomoomotor ijo kwangin, kiitu nuta nuebala Yawe: “Arai eong EJAKAIT Ekonideke, lokisisianakini jo aimeda, lokingarenikini  jo korot lotikilosio. Wu okwe, tikiirasi aicorakinetaka! Nges konyet esubia ainapakinikon kwape ecor, akonidolit da kwape akailan nuka angolol.”​—Isaia 48:17, 18.

⁸ Arai kirimaa oni Yawe, esubi ainapakiniwok bala ecor lomam eonikini. Ebuni adolitewok da aisub bala akailan nuka angolol nuilapanakinos odoket ido ipedori oni asalakin imunokina neejai ngesi ikar kere. Arai da ejaasi atiokisio nuetakanunete, isumunit oni Ebaibuli ebe: “Kowoik EJAKAIT alangirukon, nges da kigangununei jo: mam ecamakinit ikadolitok aijanganario.”​—Isabulin 55:22.

9, 10. Inyoin bo apolou naka akirot apoloor?

⁹ Neitogogongia ijo eidicanekon keda Yawe, ibuni do jo aiyatakin “apoloor.” (Iburanian 6:1) Anyoin bo apolou naka akirot apoloor?

¹⁰ Mam apoloor naka Ikristayon erai naka ikar. Kanu araut luipolok, ekoto oni adukun epaperone keda Yawe ka asesen iboro kwape esesenia Yawe. (Yokana 4:23) Abala Paul ebe: ‘Ngul luetuparete akuan eomitos nuka akuan, konye ngul luetuparete emoyo, eomitos nuka emoyo.’ (Iromayon 8:5) Itunganan yenapoloor mam idulokina toma aitelelio arai bo nat aimo iboro luka akuan. Konye erai ngesi itunganan yenepodokinit aijaanakin Yawe ka aitolomunun aseununeta nuajokak kotoma aijar. (Awaragasia 27:11; kosiom Yakob 1:2, 3.) Mam ngesi ecamakini ediojautene arai bo nat aomisio nuka itunga aijaikin nges aswam nuarokok. Itunganan yenapoloor ejeni nuajokak ido ekapakina nges aswam ngun.

11, 12. (a) Anyoika bo nuabu Paul kolimunite nuikamunitos Ikristayon “luituutooritai acoakec”? (b) Epone bo ani eputotor apoloor kwape Ikristayon keda araun akeran?

 ¹¹ Eyangaikini agogong naepol kanu araun itunganan yenapoloor. Abu ekiyakia Paul kiwadikate ebe: “Inyamat luenyakao eraas luka lukapolok, ngul luituutooritai acoakec kanuka aitwasam, tetere etiakete nuejok ka nueroko da.” (Iburanian 5:14) Akirot “luituutooritai” ijaikini oni aomoom nuikamunitos akeran.

¹² Neianyunia oni akeran kotoma abolobol, imisiikini oni ebe abu ngesi koyangaik apak aituutoor akekuan tetere itelekaari kotoma akerit. Mam ngesi eurunitai erai akeran. Naidounere ikoku, mam ngesi ejeni aitosom akekanin keda akekeje ejok. Konye etubor apak, isisiauni ngesi alosit keda aiting iboro keda akekanin. Arai kituutoor, eraun ngesi akeran loejok. Kwape kwangin, kanu oni da araun Ikristayon luipoloor, ebuni ayangaikin apak.

13. Inyoin bo epedori aingarakin oni aomoom kwape ka Yawe?

¹³ Kotoma oitabo kalo, idau oni aisisiaun epone loewomooma Yawe ka epone loesesenia ngesi iboro. Kisisiau bobo oni epone loipedoria oni aminun Ikisila ka aicoreta nuka Yawe. Naiwutar oni aitolomunun aseuneta, ekoto oni aingitakin ebe, ‘Ani bo ikisila arai aicoreta nuka Ebaibuli nuapedori eong aitosom kojautene kalo? Epone bo ani apedoria eong aitosom aicoreta ngun ejok? Anyoika bo nuekoto Yawe eong aswam?’​—Kosiom Awaragasia 3:5, 6; Yakob 1:5.

14. Anyoika bo nuipuda oni kanu adukun aiyuuniwok?

¹⁴ Emamei esange loka adukun aiyuun kede Yawe. Kwape ingarakiniata inyamat oni adukun awate nuegogong,  ingarakini oni aisisia nuikamunitos Yawe adukun aiyuun naegogong. Naigeunia oni aisisia, apotu oni esisiautu abeit nasodit ka irotin luka Yawe. Konye ketubor apak, ekoto oni amisiikin iboro luidulok luka Yawe. Ngesi abalar ekiyakia ebe: “Inyamat luenyakao eraas luka lukapolok.” Arai ibwaik oni akiro nuidau aisisiaun toma aswamisioit, ibuni oni araun luicoak. Elimokinit oni Ebaibuli ebe: “Acoa ngesi ibore yenepol kakere.”​—Awaragasia 4:5-7, NW; 1 Petero 2:2.

15. Kanukinyo ibusakinitor oni amina Yawe ka iinacanawok da?

¹⁵ Epedori itunganan araut yenegogong ido kongalei, konye kanu asalakin epone ngon ibusakinit ngesi aidar akekuan ejok. Kwape kwangin da, ibusakinit itunganan yenepoloorit aswam kagogong kanu aidar eidicaneke keda Yawe egogong. Elimokinit ekiyakia Paul oni ebe: “Kongicas arai ijaas toma aiyuun; kitemos.” (2 Ikorinton 13:5) Konye mam erai aiyuun naegogong bon ngesi ibore yenepol. Ibusakinit oni ainyikokinit aitogogong aminawok kanuka Yawe keda iinacanawok. Abala Paul ebe: “Arai ajai . . . ka aijen kere, arai da ajai kaiyuun kere naepedori aitwobot irongan, komamei eong amin . . . mam arai ibore.’​—1 Ikorinton 13:1-3.

16. Epone bo ani ekotor Satan oni aipup?

¹⁶ Ekoto Satan oni aomit ebe mam oni ipedori aisiyalamikin Yawe. Ekoto ngesi aipirisiar itauonowok ka ainakin oni aomit ebe emamei ibore epedori aitemokin atiokisiowok. Mam ngesi ekoto oni amunokina iinacanawok, ido mam ngesi ekoto oni ajaut kaiyalama.  (Ipeson 2:2) Ejeni Satan ebe epedorete aomisio nuarokok aitakadikin oni ka amunaar eidicanewok keda Edeke. Konye ijaikinit Yawe oni ibore yenepedori aingarakin oni aipikor aomisio nueroko. Ijaikinit ngesi oni amuno.

17. Kanukinyo ejokunar amuno?

¹⁷ Kotoma 1 Isesalonikan 5:8, itupusit Ebaibuli amunowok keda akopira naeyuwari esirikalet kojie, ido enyaritai “amun naka aitajario.” Amunokin aisumununeta nuka Yawe, epedori ayuwar aomisiowok ka aingarakin oni aipikor aomisio nuarokok.

18, 19. Epone bo ani etogogongia amuno Yesu?

¹⁸ Abu amuno itogogong Yesu. Atibong eroko Yesu ketwana, abu ngesi kotereikinos keda atiokisio nuagelegela. Abu opaperoke kobilak nges ebotet. Abu ediope konger nges. Apotu ice kokerata ajalakin nges. Apotu itunga lukobukec kosurokis nges, kokotosi da  ebe koarai nges. Inyoin bo abu ingarak nges atitingikin ngun kere? “Loabu kotitingik [aibubukinio okitoi], komen ileic, kanuka aiyalama naebwaikinitai kakonyeneke, iboie kakan nakoteten naka eicolong loka Edeke.”​—Iburanian 12:2.

¹⁹ Ajeni Yesu ebe arai esalaki ngesi emunokina neejai Yawe, eyauni ngin aibuses neejai Papake ido itoduni ebe erai Satan ekengalan. Amuno ngin nges ainakinit ngesi aiyalama naepol noi. Ajeni ngesi ebe ayapie nges alosit kuju neejai Papake. Abu amuno ngin ingarak nges atitingikin atiokisio. Kwape ka Yesu, ibusakinit oni da asesen amunowok. Ebuni aingarakin oni atitingikin atiokisio kere nuepote.

20. Inyoin bo epedori aingarakin ijo asalakin keda aomisio nuejok?

²⁰ Eseseni Yawe aiyuunikon keda atitingikinikon. (Isaia 30:18; kosiom Malaki 3:10.) Isumunit ngesi  ainakin “jo nuimiela ekonitau.” (Isabulin 37:4) Aso kosalak iseseni amunokon. Ekoto Satan ijo alemar amunokon kosodi aomit ebe mam aisumununeta nuka Yawe epote aitodolikin. Konye sirikicam aomisio nueroko alomakin ijo. Arai kianyu ijo ebe adisiar amunokon, kilip Yawe kingarak ijo. Kiitu nuebakasi Ipilipin 4:6, 7: “Siriyalongongoete akirot kere, konye kotoma akiro kere toma ailip kaingainga nepepe kaimal, kitejenut Edeke nuikotosi. Ainapakin da naka Edeke naedeparit ajenun kere, kidarenenei itauonokus ka aomisiokus kotoma Kristo Yesu.”

21, 22. (a) Inyoin bo amunokon? (b) Anyoika bo nuikapakina ijo aswam?

²¹ Ibusakinit ijo aomoomoenen duc nuikamunitos ajokisio nukoingaren. Eyapie apak naebeitor itunga kere aijaanakin Yawe. (Apukokinio 7:9, 14) Koomoom ber ijo epone loejaunor aijar kotoma akwap nakitetet. Eraasi nu nuejokuka noi adepar idiobore kere. Emudiario Satan ka akejokin kere, ido elemario atiokisio kere. Mam bobo oni idekakin karaida atwanare. Konye irauni oni luigogong ido keyalamasi kanginipaaran. Epote itunga aswam nepepe aitaraun akwap paradais. Ejaunos inyamat ka ayuwara kanuka itunga kere. Mam itunga eraunos luededeng arai bo luemumu konye eraunos kesi luesiaka. Koingaren epote itunga kere luejaasi toma akwap “alomar aosikinio naka aibuses naka idwe luka Edeke.”​—Iromayon 8:21.

²² Ekoto Yawe ijo araun opaperoke. Aso kinyikok arimaarit Yawe kosodi aitogogong eidicanekon keda nges kanginipaaran. Eebo, asalakis oni kere toma amin naka Edeke ikar kere!​—Yuda 21.