Akiro mama ejaasi ngul lueminasi Edeke Yawe keda Ebaibuli:

Abu Yesu kotema atiar: “Ijenunete yesi abeit, ido kilacakini yes abeit.” (Yokana 8:32, NW) Koomoom ber jo epone loabu jo kopupio apak nasodit naisisiaunia jo abeit kotoma Obaibuli! Kobu jo kiyalamikin noi ajenun ebe karaida ijai oni akwap naileleba aisab, ipedori oni aisisiaun abeit.​—2 Timoteo 3:1.

Ekoto Yawe oni ajenun abeit. Ido naarai imina oni itunga, ilimonokini oni kes nuikamunitos abeit nako Obaibuli. Konye ejaasi bobo ace nuibusakinit oni aswam kanu aijaanakin Edeke. Kanu aitodun ebe isiyalamikinit oni aicoreta nuka Yawe, ibusakinit oni aijar kwape Ikristayon. Abu Yesu koinak oni epone loibusakinitor oni aitodun ebe, imina oni Edeke. Abala nges ebe: “Arai iricete akaicorakineta, isalete toma aminaka, kwape aricitor eong aicorakineta nuka Papaka, asalit da toma aminake.”​—Yokana 15:10.

Amina Yesu Papake noi ido eswamaenenei nges idisibore kere yenakoto Papake nges aswam. Arai kiputo oni Yesu, ebuni Yawe aminun oni ido iyalamikin nges noi kanuwok. Abala Yesu ebe, “Arai kijenutu ngun, isirerengitoi yes arai kiswamata.”​—Yokana 13:17.

Kimuno ebe ebuni eitabo lo aingarakin yes aisisiaun epone loepedoriata aijar kotoma abeit naka Ebaibuli ka araun ipapero luka Edeke. Ilipi sio ebe, kiyatak aminakus naka Edeke apoloor ido kosalakis toma “amin naka Edeke . . . kiton aijar naka ikar kere.”​—Yuda 21.