1, 2. Kanukinyo iminar ijo Yawe?

IMINA kereka ijo Edeke? Ipedori ijo komina nges noi nges iinakinia ijo akoniijar aijaanakin nges. Imina ijo nges kwape epaperokon loejok noi. Konye eroko jo eminuna Yawe, amina nges ijo. Ebala Ebaibuli ebe: “Kimina oni, naarai nges kigei amin oni.”​—1 Yokana 4:19.

² Koomoom ber ijo iponesio luegelegela luetodikinia Yawe oni akemina. Ejaiki nges oni akwap naibus ka iboro kere luipuda oni kanu ailel kotoma aijar. (Matayo 5:43-48; Apukokinio 4:11) Ekoto nges oni ajaut keda eidicane loejok keda nges, ido esipedoo nges oni aisisiaun nuipu nuikamunitos nges. Naisiomia oni Ebaibuli, ipupokinit oni Yawe. Ido kilip oni, epupokini nges oni. (Isabulin 65:2) Itosomai ngesi emoyo lokalaunan ainagarenikinio ka aitogogongio oni. (Luka 11:13) Abu ngesi kijuk Okokuke loteluna alakun oni kotoma adiakar ka atwanare.​—Kosiom Yokana 3:16; Iromayon 5:8.

3. Epone bo ani inyikokinia oni ajaut keidicane loajokan keda Yawe?

 ³ Iitu ber ijo epaperokon lotau, loidicasi kajo apakio nuka ican ka apakio da nuka ailel. Kwape kwangin da, kanu eidicane aisal icasit, ibusakinit aswam kagogong. Epone ngol ejaar eidicane keda Yawe da, epaperowok loitelekaarit kakere. Ejaenena eidicanewok keda nges ikar kere. Elimokinit oni Ebaibuli ebe: “Kidaras bonik toma amin naka Edeke.” (Yuda 21) Epone bo ani ipedoria oni aswam ngun? Ebongokinit Ebaibuli ebe: “Na nges amin naka Edeke, ebe kiricit aicorakinetake. Ido mam aicorakinetake elangir.”​—1 Yokana 5:3.

4, 5. (a) Anyoin bo apolou naka “amin naka Edeke”? (b) Epone bo ani abu ijo kogeunia aminun Yawe?

⁴ Anyoin bo apolou nainerar Ebaibuli nuikamunitos “amin naka Edeke”? Mam erai Edeke amin oni konye erai oni amin nges. Iitunit ijo apak naigeunia ijo aminun Yawe?

⁵ Kiitu ber ijo epone lobu ijo kopupunio naisisiauna ijo ebe ekoto Yawe ijo aijar kakwap nakitetet ikar kere. Obu ijo kisisiau nuadau ngesi aswam kanu aitodolikin ngun, ido idau ijo amisiikin ebe abu Yawe kijuk Okokuke toma akwap kwape ainakinet naketiai kanuwok. (Matayo 20:28; Yokana 8:29; Iromayon 5:12, 18) Naisisiaunia jo ebe emina Yawe ijo, abu ekonitau kiyalamikin noi, ido kobu jo da kominu nges.​—Kosiom 1 Yokana 4:9, 10.

6. Inyoin bo itoduni ebe imina jo itunganan? Anyoika bo nuiswamau jo kanu amin Edeke?

 ⁶ Konye aipup epone ngon erai ageunet naka amin Edeke. Kwape aanyunet, arai imina ijo itunganan mam ijo inera bon ebe, “amina eong jo.” Amin nges einakini oni aswam iboro luisiyalamikinitos itunganan. Kwape kwangin, abu amin naka Yawe koinaki jo akote aijar koipone loisiyalamikinit ngesi. Naeyatakinor amin ngin, kobu jo koinak akoniijar neejai nges kosodi aibatisaun. Kanuka ngun, kobu jo kisumunik aijaanakin Yawe ikar kere. (Kosiom Iromayon 14:7, 8.) Epone bo ani itodolikinia ijo aisumunet ngin?

7. Anyoika bo nuebeit oni aswam arai imina oni Yawe? Anyoika bo aicorakinetake?

⁷ Naarai imina oni Yawe, “kiricit aicorakinetake.” Epone bo ani kiricia oni aicorakinetake? Nes oni arimaar nges. Isisianakini Ebaibuli oni ajaut kiponesio luekoto Yawe. Kwape aanyunet, elimokinit nges oni ebe erono emeret, akoko, aisab, aelo kitunganan yenimam ijo imanyit arai da aima aputosia itia Yawe.​—1 Ikorinton 5:11; 6:18; 10:14; Ipeson 4:28; Ikolosain 3:9.

8, 9. Epone bo ani ijenunia oni nuekoto Yawe oni aswam? Kijaik aanyunet.

⁸ Mere arimaar aicorakineta nuka Yawe bon ekotoi konye ejaasi ace nuibusakinit oni aswam kanu aisiyalamikin nges. Mam nges ijaikinit oni ikisila luebeit atupit kotoma ojautene kere loka aijar duc. Aticepak ejaun ejautene loemameor ekisil loka Ebaibuli loibusakinit oni aitoswam. Epone bo ani iseunia  oni aswam nuedolitos? (Ipeson 5:17) Ejaasi aicoreta nukabeit toma Obaibuli, nuisisianakinete oni epone loeyaitor Yawe iboro. Kisiomenen oni Ebaibuli, ijenuni oni Yawe jokan. Ijenuni oni aomisioke, iboro lumam nges ekoto ka luemina ngesi.​—Kosiom Isabulin 97:10; Awaragasia 6:16-19; koany Nuengesete 1.

⁹ Kwape aanyunet, epone bo ani iseunia jo iboro luibusakinit asesen kotelebision arai nuibusakinit aite kolago? Mam Yawe elimokinit oni nuibusakinit aswam kojautene kalo. Konye ingarakinitos aicorakineta nuijaikinit Edeke oni aitolomunun aseuneta nuejok. Aitelelio naka lolo naepol erai naileleba amumu kede aelo. Elimokinit oni Yawe kotoma Obaibuli ebe, “elait” ngesi ngul luekotos nuka amumu ido da ‘etubokini ngesi ludotea.’ (Isabulin 11:5; Iburanian 13:4) Epone bo ani ingarakiniata oni aicoreta nu aseun aswam nuejokuka? Arai ijeni oni ebe elait Yawe idisibore, ido erai ibore ngin yenisidiki akiro nuka aelo, ibusakinit oni aisac.

10, 11. Kanukinyo irimaria oni Yawe?

¹⁰ Kanukinyo irimaaritor oni Yawe? Mam erai kanuka akurian alecorioke arai bo kanu aiku atiokisio nuelomunete arai kiswama oni nueroko. (Igalatian 6:7) Konye, irimaari oni Yawe naarai imina oni nges. Kwape ekototor idwe aisiyalamikin papakec, ikoto oni da aisiyalamikin Papawok lokokuju. Emamei idiobore yenitelekaarit itia oni aijen ebe iyalama Yawe noi kanuwok!​—Isabulin 5:12; Awaragasia 12:2; koany Nuengesete 2.

 ¹¹ Mam oni irimaari Yawe naepatanar bon arai bo naemameotor nuipedori oni aswam kilema arimaar. Ido mam oni iseuni ikisila ka aicoreta nuikoto oni arimaar. (Ikisila 12:32) Konye irimaari oni nges keda etau kere, kwape abalar ekayoon Isabulin ebe: “Esiyalamikini eong aicorakinetakon, nuamina.” (Isabulin 119:47; Iromayon 6:17) Ekoto oni aputoor Noa loabu kitodu akemina kaneejai Yawe kopone lo nges aswam iboro kere lualimokinit Yawe nges aswam. Ebala Ebaibuli ebe, “kiswama Noa kwangin.” (Ageun 6:22) Ikoto kereka ijo Yawe asesen ijo kwangin?

12. Epone bo ani ipedoria oni aisiyalamikin Yawe?

¹² Epone bo ani epupio Yawe arai irima oni nges? Isiyalamikini oni eketau. (Awaragasia 11:20; 27:11) Koomoom ber ngun! Oni aisiyalamikin Lokasuban akuj ka akwap ka arimaar nges. Konye mam nges ebuikinit oni aswam ngun. Kilema, ijaikinit ngesi oni ailajaara naka aseun nuikoto oni aswam. Apolouke ebe ijaatar oni ailajaara aseun nuajokak arai nuarokok. Ekoto Yawe oni aitodun aminawok kanuke kopone lo oni aitolomunun aseununeta nuajokak tetere oni idumuni aijar naejok.​—Ikisila 30:15, 16, 19, 20; koany Nuengesete 3.

13, 14. Epone bo ani ijenuna oni ebe mam etiono arimaar ikisila luka Edeke? Kijaik aanyunet.

¹³ Do bo do arai iwomit oni ebe etiono arimaarit ikisila luka Yawe arai bo elemari ailajaarawok?  Ebala Ebaibuli ebe: “Mam aicorakinetake elangir.” (1 Yokana 5:3) Kokokoron ice, itosomatai akirot na kanu aitetem ikisila luetioko arai bo itunga luekotosi ayait luce erono ka aridakinit kes. (Matayo 23:4; Aswamisio 20:29, 30) Itetemit Ebaibuli loka New English Translation, ebe: “Mam aicorakinetake ilangirikinitos oni.” Mam aicorakineta nuka Yawe “elangir,” apolouke ebe mam etiono oni arimaar. Mam nges ipuda oni aswam adepar nuipedorit oni aswam.

¹⁴ Kwape aanyunet, arai iuta ijo aingarakin opaperokon aibwot. Edaunit ngesi ainapakin iboro kere toma asaduku. Ebenen ice ido opatana aidak, konye ice elangir ido ekoto itunga iarei kes epedorete aidak. Ibusakinit kereka opaperokon alimokin ijo bon aidak asaduku naelangir? Mam cut! Kanukinyo? Naarai mam nges ekoto aimusung ijo. Kwape epapero kangon, mam Yawe elimokini oni aswam iboro luetioko. (Ikisila 30:11-14) Emisiikinit Yawe oni. “Ejeni asubunetewok; Iitunit ebe kirai oni apua.” ​—Isabulin 103:14.

15. Kanukinyo icamunitor oni ebe ejokuka aicoreta nuka Yawe?

¹⁵ Abu Musa kolimok ateker naka Isirael ebe arai kerimaasi kesi ikisila luka Yawe, “ejaunos ejok” ido ‘ejarete.’ (Ikisila 5:28-33; 6:24) Lolo da, idisibore kere yenelimokini Yawe oni aswam, erai kanuka ajokisiwok. (Kosiom Isaia 48:17.) Ejeni Papawok Yawe iboro luejokuka kanuwok. (Iromayon 11:33) Elimokinit oni Ebaibuli ebe “erai Edeke amin.” (1 Yokana  4:8) Apolouke ebe nginibore kere yenelimokini nges oni aswam, erai kanuka akemin.

16. Epone bo ani ijenunia oni ebe ipedori oni araut luirimaari arai da mam oni irai luidolit ido eboiete kakwap nakaronon?

¹⁶ Mam duc epatana oni arimaar Edeke. Ijai oni akwap nakaronon naipugat Ekejodijodon. Ijaikinit ngesi itunga aswam iboro luarokok. (1 Yokana 5:19) Ibusakinit oni aitiji aomisiowok nuarokok naarai epedorete ainakin oni aimwang Edeke. (Iromayon 7:21-25) Konye aminawok kanuka Yawe, ijaikinit oni agogong aswam nuajokak. Eseseni ngesi epone loiwutar oni arimaar nges ido ingarakini ngesi oni keda emoyo lokalaunan. (1 Samuel 15:22, 23; Aswamisio 5:32) Ingarakini emoyo lokalaunan oni adumun iponesio luisipedorete oni arimaar nges.​—Igalatian 5:22, 23.

17, 18. (a) Anyoika bo nuibuni oni aisisiaun koitabo kalo? (b) Anyoika bo nuibuni oni aisisiaun kosula kaloetupakini?

¹⁷ Koitabo kalo, ibuni oni aisisiaun epone loijaria kesiyalamikinitos Yawe. Isisiauni oni epone loipedoria aitup aicoretake ka iponesioke kotoma aijarawok. Kiitu ebe mam Yawe ebuikinit oni arimaarit nges. Arai kiseu oni arimaarit nges, ejokunar aijarawok kwape kwana ka koingaren da. Aitelekaarit kakere, itoduni arimaaritewok ebe imina oni Edeke.​—Koany Nuengesete 4.

¹⁸ Kanu aingarakin oni atiakun nuajokak keda nuarokok, ijaikinit Yawe nginidiopet kaoni apedor naka aomoom. Arai kituutoono oni aomisiowok, epedori ngin aingarakin oni ‘airic aicorakinetake.’ Kaanyutu ber oni ngun.