1-3. (a) Kanukinyo epodokinitor toto naemina aila naka ikekoku? (b) Kanukinyo ekotor Yawe iketunga araut luelaete?

KOOMOOM ber ijo toto naemina ikekoku, ekwenyuni tupuruc aitemonokin ikekoku kanu alosit osomero. Ilongari ber ngesi ikekoku kosodi aitanapikin igoen luelaete. Ingarakini nges ikokuke araut yenengalei ido ejenunete luce da ebe idario ikoku ngin ejok.

² Ekoto Yawe Papawok lokokuju oni araut luilai.  (Isabulin 18:26) Ejeni ngesi ebe imedauni oni arai irai oni luilai. Ido arai irai oni itunga luilai, eyauni ngin aibuses neejai ngesi.​—Esekiel 36:22; kosiom 1 Petero 2:12.

³ Anyoin bo apolou naka araut luilai? Ido kanukinyo ibusakinitor oni araut itunga luilai? Neisisiaunia oni abongonokineta nuka aingiseta kangun, ibuni ijo aanyun aijulanakineta nuibusakinit ijo aswam.

4, 5. (a) Kanukinyo ibusakinitor oni araut luilai? (b) Anyoika bo nuisisianakinete oni isuban luka Edeke nuikamunitos epone loesesenia Yawe aila?

⁴ Isisiauni oni nuikamunitos aila kaneejai aanyunet naka Yawe. (Ilebin 11:44, 45) Aso, ibore yenisodit yenibusakinitor oni araut luilai erai naarai ikoto oni ‘aputoor Edeke.’​—Ipeson 5:1.

⁵ Isisianakinete oni isuban luka Edeke epone loesesenia Yawe aila. Esubit Yawe ekwam ka akipi keda ainapeta nuepedoriata kesi aitalaunun bon. (Yeremia 10:12) Koomoom ber ijo iponesio luepedoritor akwap asalit erai naelai karaida eutasi itunga aiyat amunaar. Kwape aanyunet, esubit Yawe ikur lueliatos luepedorete acuuman bon aanyun. Epedorete ikur lu aijulakin iboro lueroko araun luelaete. Eraasi nu ainapeta nueumokina. Epedoritos itunga lukasayanis aitosom ikur lu kanu aitemokin amunamunao naka akipi keda ikwamin.​—Iromayon 1:20.

6, 7. Epone bo ani itodunitotor ikisila luka Musa ebe ibusakinit ngul luemaete Edeke Yawe araut luelaete?

⁶ Isisiauni bobo oni ameda naka aila kotoma  okisila luejaikinit Yawe idwe luko Isirael kitosmai Musa. Kwape aanyunet, akoto ngesi itunga araut luelaete kotoma akuan tetere ngesi ecamuni aimakec. Kapaaran naka ailuc, abeit esasedoti ailong irwan aarei. (Ilebin 16:4, 23, 24) Ido eroko isasedotin ijaikina ainanakineta, abeit kesi ailot akanin keda akeje. (Anyoun 30:17-21; 2 Aisiitonokin 4:6) Kojautene ece, ajaasi ikisila ice luekamanara keda ngul luebilete ekisil loka aitalaunio, ebusakinit atubokinio atwanare.​—Ilebin 15:31; Aimario 19:17-20.

⁷ Do bo oni da lolo? Ipedori oni da aisisiaun nuikamunitos aila naekoto Yawe kotoma Okisila. (Malaki 3:6) Etodunit ekisil ebe ekot ejaanakinak luka Yawe araut luelaete. Mam ikisila luka Yawe ijulakina. Lolo da, eroko ngesi ekoto ejaanakinakake araut luelaete.​—Yakob 1:27.

8. Koponesio bo ani ibusakinitor oni aidar aila?

⁸ Kaneejai Yawe, araut luilai mam erai aitala awatewok, igoen keda ireriawok bon. Imoriarit bobo aila ejautene kere loka aijarawok kwape nat aimawok, iponesio ka aomisiowok da. Eebo, ibusakinit oni aidar aila koponesio kere luka aijarawok tetere Yawe eseseni oni kwape itunga luilai.

9, 10. Inyoin bo imoriarit aila kotoma aimawok?

⁹ Aila kotoma aima. Mam ekoto oni alomar odiinin lukaisab kediopone kere. Naajaatar idwe luka Isirael aijorioro koBabulon, alukunitos kes itunga luajaas odiinin lukaisab. Konye abu Isaia kodwarite  ebe epote idwe luka Isirael abongun ore Yerusalem ka aisiteteun aima nakabeit. Abu Yawe kolimok kes ebe: “Konyout kanen, sirikitirosi ibore kere yenimam elai; Konyout kokidingike; Kitalaunos.” Mam ebusakinit kes aimor aisisianakineta, iponesio, arai inonosio luka ediini lokaisab koBabulon.​—Isaia 52:11.

¹⁰ Ajenak Luka Yawe da lolo inacitos idiinin lukaisab. (Kosiom 1 Ikorinton 10:21.) Anatar akwap kere, aiyuununeta ka inonosio luipu elomonitos kotoma aisisianakineta nuka idiinin lukaisab. Kwape aanyunet, kaiboisio nuipu, iyuunitos itunga ebe inyikokini emoyo aijar ketwana itunganan, ido ipu inonosio luiswamaete itunga akaulo naetwania itunganan naarai iyuunitos kes kwangin. (Ekalimonokinan 9:5, 6, 10) Ekoto oni ainac inonosio ngun. Epedorete ipajanawok akote abuikin oni aswam inonosio ngun. Mam oni iswamai inonosio ngun arai ikoto oni Yawe asesen oni kwape itunga luilai.​—Aswamisio 5:29.

11. Anyoin bo apolou naka araut luilai kotoma oponesio?

¹¹ Aila kotoma oponesio. Kanu Yawe asesen oni kwape itunga luilai, ekoto oni ainac adoteu. (Kosiom Ipeson 5:5.) Elimokinit oni Ebaibuli ebe: “Kinacata adoteu.” Itacaunit cut Yawe kane ebe idotea lumam itoronikinos, “mam irumete ajakanut naka Edeke.”​—1 Ikorinton 6:9, 10, 18; koany Nuengesete 22.

12, 13. Kanukinyo ibusakinitor oni araut luilai kotoma aomisio?

¹² Aila kotoma aomisio. Nuiwoomoomoi oni duc nges etapit oni aswam. (Matayo 5:28; 15:18, 19) Aomisio nukajokak ijaikinete oni aswam iboro luejokuka. Erai abeit ebe mam oni irai ikadolitok,  aso elomununete oni da aomisio nuarokok. Arai elomutu aomisio ngun, ekoto oni ainac katipet. Arai mam oni inaci aomisio ngun, epote amunaar itauonowok. Ekaulo, ageunete do oni aswam nuebakasi aomisiowok. Konye ekoto oni aileleb aomisiowok kede iboro luajokak. (Kosiom Ipilipin 4:8.) Aso, ekoto oni ainac iboro kwape nat adoteu arai aitelelio naejai amumu toma. Ekoto bobo oni acoit iboro luisiomi oni, luiseseni oni kede akiro nuinera oni duc.​—Isabulin 19:8, 9.

¹³ Kanu oni asalakin toma amin naka Edeke, ibusakinit oni araut luilai kotoma aima, oponesio ka aomisio da. Ekoto bobo Yawe oni araut luilai kotoma akuan.

14. Kanukinyo ibusakinitor oni araut luilai kotoma akuan?

¹⁴ Arai kitalaa oni awatewok ka aiboisiowok, imedauni oni ka iidunyetawok. Idumuni oni aiyalama, ido luce da eminakini ajaut keda oni. Erai kereka ngun bon ibusakinitor oni araut luilai kotoma akuan? Ailawok eyauni aibuses neejai Yawe. Koomoom ber jo: Arai ianyu jo ikoku yenibakatat, epone bo ani isesenia jo auriakake? Kwape kwangin, arai mam oni da italai awatewok, epote itunga aomoom erono nuikamunitos Yawe. Abu Paul kotema ebe: “Mam kiyaun aiguikinet kere kotoma akirot kere, kinyek akosiijaanakin aitoronio, konye kotoma akiro kere kituro kwape ikejaanakinak luka Edeke.”​—2 Ikorinton 6:3, 4.

15, 16. Anyoika bo nuipedori oni aswam kanu aidar awatewok kolaete?

 ¹⁵ Awatewok keda inapen. Ekoto oni aitala awatewok nginipaaran. Kwape aanyunet, ekoto oni ailongenen duc. Ekoto oni ailot akanin keda esabunyu eroko egeunia aipo arai ainyam keda akaulo naabongun ocolooni arai akaulo nakaiting ibore yenerono. Ailot akanin erai ibore yenepalunitos itunga noi, konye mam ekoto oni apalun naarai itidisiari eikop loka adekasinei. Eyuwari angaleuwok. Ekoto oni ajaut keda acolooni ka aibosit naecakio agasia. Kapakio nuka idwe luka Isirael, amameete kes acoloonin, kanuka ngun, anukenenete kesi ekecebar okutui mere eiduny kede atan naka akipi.​—Ikisila 23:12, 13.

 ¹⁶ Mam erai ekisil ebe ekoto iwokogoen koraas luitetiak ido kopol etiai arai bo nat lualomunak. Konye ibusakinit kes koraasi luedolitos ido kolaete. (Kosiom 1 Timoteo 2:9, 10.) Ikoto oni awatewok ka anapitowok ayaun aibuses neejai Yawe.​—Tito 2:10.

17. Kanukinyo ibusakinitor oni aidar ireriawok kolaete?

¹⁷ Ireriawok. Ekoto oni aidar ireriawok kolaete. Arai ejai ijo emotoka, epikipik arai egaali ka cut loilosiononio jo airiamununeta arai bo alimonokin, ekoto ijo aidar kolai. Naarai neilimonokinia oni, inera oni nuikamunitos aijar kotoma paradais kakwap naelai. (Luka 23:43; Apukokinio 11:18) Aila naka ireriawok, itoduni ebe iuta oni akapakin kanuka aijar kotoma akwap nakitetet.

18. Kanukinyo ikotor oni aibosiowok nukaima kolaete?

¹⁸ Aibosiowok nukaima. Itoduni oni ebe erai aila ibore yenepol arai italai oni aibosiowok nukaima nuimoriaritos eKingdom Hall keda aiboisio neilosesenei oni atukonokin. Tetere itunganan yenerai nasodit abunere oKingdom Hall edumuni elai. Eyangauni na aibuses neejai Yawe. Oni kere kotoma atukot ejai arereng naka aitalaa ka aitemonokin eKingdom Hall.​—2 Aisiitonokin 34:10.

19. Inyoika bo iboro luibusakinit oni ainac?

¹⁹ Arai da mam Ebaibuli inerit aswamisio kere nuibusakinit oni aisac, ijaikinit Yawe oni aicoreta nuepedorete aingarakin oni amisiikin epone loepupia ngesi kanuikamunitos aswamisio ngun. Mam ngesi ekoto oni aimat esigala arai bo nat emeret. Kwape  iraar oni ipapero luka Edeke, ekoto oni ainac iboro ngul. Kanukinyo? Naarai iyait oni ainakinet naka aijar ejok. Epedorete aswamisio nu aituurian aijarawok, amunaar angaleuwok keda naka iidunyetawok da. Itunga luipu atamata ajalakin aswamiso ngun kanuka angaleukec. Konye oni luirai ipapero luka Yawe, ekoto oni ainac aswamisio ngun naarai imina oni nges. Abu aberu adiope kotema atiar: “Abu eong apedoo ajalakin aswam iboro luarokok naarai abu Yawe ingarak eong. . . . Aomit eong ebe mam eong apedori aswam aijulanakineta koiponeka bon.” Etetemoto ber oni aicoreta akany nuka Ebaibuli nuingarakinete oni ainac aswam iboro luarokok.

20, 21. Ani bo aswamisio nuarokok nuekoto Yawe oni ainac?

²⁰ “Naarai kija kaisumuneta ngun, ketesegaaros kotoma asilianut kere naka akuan ka naka emoyo da, ketodoloto alaunit kotoma ayongit Edeke.” (2 Ikorinton 7:1) Ekoto Yawe oni ainac aswamisio nuarokok nuepedorete amunaar aomisiowok arai bo nat awatewok.

²¹ Nuepolok kakere nuibusakinitor oni ‘aitesegaar kotoma asilianut kere’ ejaasi toma 2 Ikorinton 6:17, 18. Ebala Yawe ebe: “Sirikitirosi ibore yenimam elai.” Isumunit ngesi ebe: “Kesukunyuni eong da yes . . . araun eong Papa kamakus, yes da iraunos ikadwe lusap ka lupesur.” Eebo, eminuni Yawe oni kwape eminar papa ikedwe, arai kinac oni idiobore kere yenemunaari oni kakonyen nuka Yawe.

22-25. Ani bo aicoreta nuka Obaibuli nuingarakinete oni ainac aswamisio nuarokok?

²² “Komina Ejakait Ekonideke kekonitau kere,  ka akoniijar kere, ka akonicoa da kere.” (Matayo 22:37) Erai lo ekisil loepol kakere. (Matayo 22:38) Ekoto Yawe oni aijaanakin ngesi keda etau kere. Mam oni ipedori aitodun ebe imina oni Edeke keda etau kere arai iswamai oni iboro luepedorete aituurian aijarawok arai bo amunaar adam. Ngesi ekotor oni aswam nuipedori kere ayait aijar ejok.

²³ “Yawe elopet einakini itunga kere aijar ka eiyengane ka iboro da kere.” (Aswamisio 17:24, 25) Arai ijaik ijo epapero ainakinet, biai, icakari ijo? Erai aijar ainakinet kama ejai Yawe. Ido isiyalamikinit oni ngesi kanu ainakinet kangin. Ekoto do oni ayait aijar ejok tetere ijaikini aibuses mama ejai Yawe.​—Isabulin 36:9.

²⁴ “Komina ikoniidunyet kwape iminar bon.” (Matayo 22:39) Mam aswamisio nuarokok emunaarete oni bon, emunaarete iidunyetawok ka luminanawok da. Kwape aanyunet, epedori itunganan yeniboiete nepepe ka itunganan yenemasi esigala adumun adek naarai iyenganari ngesi da apuru naka esigala. Konye arai itanang oni aswam iboro ngun, itoduni oni ebe imina oni iidunyetawok. ​—1 Yokana 4:20, 21.

²⁵ “Kisiitu kes anonokikin ikayaitok ka lukapolou da, korimasi, kitemokino kanginiswam kere naejok.” (Tito 3:1) Kaiboisio ace, mam ikisila luka apugan ecamakinitos aigwelanar arai bo nat aimat iboro kwape nat esigala keda ejae. Kwape icorakinitor Yawe oni ayongit epugakawok, ibusakinit oni arimaarit ikisilakec.​—Iromayon 13:1.

26. (a) Anyoika bo nuibusakinit oni aswam tetere Yawe itojokaari aimawok? (b) Kanukinyo ejokunar oni asalakin ilai kakonyen nuka Edeke?

 ²⁶ Arai ikoto oni araun ipapero luka Yawe, ekoto oni aswam aijulanakineta kotoma aijarawok. Ido ekoto oni aswam katipet. Arai da mam epatana aitanang aswamisio ngun, ipedori oni. Isumunit Yawe aingarakin oni. Ido ebala ngesi ebe: “Arai eong EJAKAIT Ekonideke, Lokisisianakini jo aimeda, Lokingarenikini jo korot lotikilosio.” (Isaia 48:17) Neiswama oni nuipedori kere aidar aila keda asegara, ijaikini oni Edekewok aibuses.