1. Inyoin bo apodokinit Yesu atibong ngin eroko nges etwana?

ATIBONG ngin eroko Yesu etwana, ajeni ngesi ebe ayapie ngesi ajalakin ikesisiakake ido apodokinit ngesi nuebeit atakanikin kesi koingaren. Abu kolimok kesi ebe: “Mam iraas lukakwap.” (Yokana 15:19) Ekaulo, abu kilip neejai Papake kobala ebe: “Mam kes eraas luka akwapin, kwape mam eong araar loka akwapin.” (Yokana 17:15, 16) Inyoin bo apolou naelipia Yesu epone ngol?

2. Anyoika bo “akwapin” nuenerit Yesu?

² Kane, akirot “akwapin” apolouke ebe itunga lumam ejenete Yawe ido ipugat Satan. (Yokana 14:30; Ipeson 2:2; Yakob 4:4; 1 Yokana 5:19) Epone bo ani ‘mam oni iraar luka akwapin’? Kosula kalo, ibuni oni aanyun iponesio luta: Asalakin imunokina neejai Ajakanut naka Edeke ka amamut araut luka akwapin kwape nat ainac politikis. Ainac emoyo loka akwap. Ainap ejok ka aitala iwokitim. Ayait ikapun ejok keda epone loinapia oni lujiis kere luka Edeke.​—Koany Nuengesete 16.

3. Epone bo ani ayaitor Yesu akiro nuka politikis?

³ Naajaar Yesu toma akwap, abu nges koany ebe ipu itunga atiokisio ido mam aijar epatana. Apodokinit nges kes noi ido kokoto ngesi aingarakin kes. Abu kereka nges koloma toma akiro nuka politikis? Mam. Ajeni nges ebe ibore yenipudas itunga nges apugan arai bo Ajakanut naka Edeke. Yesu nges Ekabaka loka Ajakanut kangin ido arai Ajakanut akou naka akirot naka alimonokinike. (Daniel 7:13, 14; Luka 4:43; 17:20, 21) Mam Yesu abu koloma toma akiro nuka politikis naarai mam nges arai loka akwapin. Naengisingisia ngesi ekayaiton loko Rome loanyaritai Pontio Pilato, abu Yesu kobongok ebe: “Akajakanut mere naka akwapin kanu.” (Yokana 18:36) Mam ikesisiak da araasi luka akwapin. Ebala eitabo On the Road to Civilization ebe Ikristayon lukolo “mam alomaritos akiro nuka politikis.” Iswamaete Ikristayon lualolo da kwangin. Igangit oni Ajakanut naka Edeke ido mam oni ilomari akiro nuka politikis.​—Matayo 24:14.

4. Epone bo ani igangitotor Ikristayon lukabeit Ajakanut naka Edeke?

⁴ Ebwoikinitos icetunga akwapukec kwape ikiyakia kakwap ace, nges mam kes elomariata akiro nuka politikis nuka akwap kangin. Iinacan da luinyonyoikinitai kojaas ka amuno naka aipuga kotoma akuj keda Yesu eputos kwangin. Ewadikat ekiyakia Paul ebe: “Nges kiraar ikiyakia kanuka Kristo.” (2 Ikorinton 5:20) Ebwoikinitos Ikristayon luinyonyoikinitai apugan naka Edeke. Mam kes elomarete  akiro nuka politikis luka akwap kana. (Ipilipin 3:20) Ingarakinitos Ikristayon luinyonyoikinitai imilionin luka itunga aisisia nuikamunitos Ajakanut naka Edeke. Ingarakinitos “amerekekin ace” Ikristayon luinyonyoikinitai. Kes da, mam eraasi luka akwapin. (Yokana 10:16; Matayo 25:31-40) Kabeit, mam Idiokristayot ibusakinit alomar toma akiro nuka politikis.​—Kosiom Isaia 2:2-4.

5. Kanukinyo mam Ikristayon elomariata toma akiro nuka ejie?

⁵ Esesenete Ikristayon lukabeit ejaanakinak luka Yawe kere kwape iinacan luka ekale ediope ido imorikikina kesi karaida elomunitos kesi kakwapin ka aiboisio nuegelegela. (1 Ikorinton 1:10) Arai iloma oni toma ojie, apolouke ebe itijie oni iwokiinacan luecorakinit  Yesu oni amin. (Yokana 13:34, 35; 1 Yokana 3:10-12) Abu bobo Yesu kolimok ikesisiak amina lukasurup da.​—Matayo 5:44; 26:52.

6. Epone bo ani eseseniata ejaanakinak luka Yawe apugan?

⁶ Karaida mam oni Ikristayon kirai luka akwapin, ekoto oni aswam nuejokuka kotoma atutubet. Kwape aanyunet, itoduni oni ebe iyongit oni apugan koipone lo oni arimaarit ikisila luka akwap ka aitac isolosinei. Konye ekoto oni aijaikin “Edeke . . . nueraas nuka Edeke.” (Marako 12:17; Iromayon 13:1-7; 1 Ikorinton 6:19, 20) “Nueraas nuka Edeke” imoriaritos oni amin ngesi, arimaarit ka aima ngesi. Irai oni luikapakina atwanare itia aimwang Yawe.​—Luka 4:8; 10:27; kosiom Aswamisio 5:29; Iromayon 14:8.

7, 8. Inyoin bo “emoyo loka akwap” ido anyoika bo nuijaikinit ngesi itunga aswam?

⁷ Amamut araut luka akwapin, erai apolouke ebe mam ekoto oni acamakin “emoyo loka akwap” aipuga oni. Emoyo ngon ngesi iponesio ka aomoom naka Satan, ido ipugat emoyo ngon ngul lumam ijaanakinete Yawe. Konye ibusakinit Ikristayon ainac iponesio ngun. Kwape abalar Paul ebe, ‘konye oni, mam kidumunit emoyo loka akwap, dimarai emoyo loebuni kama ejai Edeke.’​—1 Ikorinton 2:12; Ipeson 2:2, 3; koany Nuengesete 17.

⁸ Ijaikini emoyo loka akwap itunga araut luibitioko, luepogasi ido omengeraka. Ekoto Satan itunga aomit ebe mam ibusakinit kesi arimaarit Edeke. Ijaikinit Satan itunga aswam nuekotosi kesi komam  epodokinitos atiokisio nuelomunete. Ekoto bobo ngesi itunga aiyuun ebe “aingobel naka akuan, aingobel naka akonye” kesi iboro luepolok kotoma aijar. (1 Yokana 2:16; 1 Timoteo 6:9, 10) Iswamai Ekejodijodon nuepedori kere aingalaar ejaanakinak luka Yawe.​—Yokana 8:44; Aswamisio 13:10; 1 Yokana 3:8.

9. Epone bo ani epedoria emoyo loka akwap aitapaar oni?

⁹ Eyapie emoyo loka akwap kaneijai oni kwape ekwam loiyenganari oni. Arai mam oni iswamai kagogong ainac emoyo ngon, itapaari oni. (Kosiom Awaragasia 4:23.) Epedorete nu ageun motimot, kwape nat, acamakin aomisio ka iponesio luitunga lumam ijaanakinete Yawe aitapaar oni kotoma aima Yawe. (Awaragasia 13:20; 1 Ikorinton 15:33) Epedorete iboro kwape nat, asesen aputosia nuimujalalasi, aipup itunga luisisianakinete akiro nuka aisab ka ace da aitapaar oni.​—Koany Nuengesete 18.

10. Epone bo ani ipedoria oni ainac emoyo loka akwap?

¹⁰ Epone bo ani ipedoria oni ainac emoyo loka akwap? Ekoto oni aikunyakin neejai Yawe ka acamakin nges aingarenikin oni. Ibusakinit oni ailip emoyo lokalaunan ka asalakin ikukuraka kotoma aijaanakiniwok. Erai Yawe Lokapedor kere. Ebuni Yawe aingarakin oni ainac emoyo loka akwap.​—1 Yokana 4:4.

11. Epone bo ani emunaaria emoyo loka akwap epone loenapiata itunga?

¹¹ Epone bobo loinapetori oni ka epone loitalaa oni itima epedori aitodun ebe mam oni kirai luka  akwapin. Enapete itunga luipu igoen luegelegela kanu adumun aiturio, kanu aisidik aomisio nuka aelo, ka aitodun emwangit arai bo kanu aitodikin luce ebe ebaritos kesi. Mam icetunga epodokinitos ikecenapen. Aticepak enapete kesi igoen lumam elaete. Mam ekoto oni acamakin iponesio lu amunaar ewokonape keda epone loitalaa oni itimawok.

12, 13. Ani bo aicoreta nuka Ebaibuli nuingarakinete oni aseun igoen luinapi oni?

¹² Kwape ejaanakinak luka Yawe, ibusakinit  anapitowok koraasi nuibusiak, kolaete ido kiriamara keda ejautene loaiboisit kana ijai oni. Ekoto oni ainap “anapito nuibusak . . . ka acoit,” tetere itoduni ‘anyongit Edeke.’​—1 Timoteo 2:9, 10; Yuda 21.

¹³ Epone loinapia oni, einakini luce asesen oni ejok ka ainakin Yawe aibuses. Ekoto oni aswam iboro kere “kanuka aibuses naka Edeke.” (1 Ikorinton 10:31) Nuibusak imoriarit apodokinit epone loeseseniata luce keda nuebakasi kesi kanuikamunitos ijo. Aso, naiseuna oni igoenewok, ibusakinit oni aiitunit ebe esesenete luce.​—1 Ikorinton 4:9; 2 Ikorinton 6:3, 4; 7:1.

14. Anyoika bo nuibusakinit oni aomoom naiseunia oni igoen luinapi oni kilosi airiamununetawok ka alimonokin?

¹⁴ Epone bo ani ibusakinitor oni ainap kilosi toma airiamununeta ka alimonokin? Inapi kereka oni igoen kanu adumun aiturio? Isurumitos kereka ikonigoen itunga ileic? Iwomit kereka ijo ebe mam ibusakinit luce apodokinit epone loinapia ijo? (Ipilipin 4:5; 1 Petero 5:6) Kabeit, ekoto oni ainap ejok, konye, iboro luijaikinete oni araut luibusiak kesi iponesio luka Ekristayone. Iponesio lu kesi eseseni Yawe kaneijai oni. Itoduni oni “etunganane loibwaa lokotau, . . . loerai loketiai loepol kakonyen nuka Edeke”​—1 Petero 3:3, 4.

15. Kanukinyo mam Yawe eseikinitor oni igoen luibusakinit oni ainap?

¹⁵ Mam Yawe eseikinit oni igoen luibusakinit oni ainap arai lumam ibusakinit ainap. Konye ejaik ngesi oni aicoreta nuka Ebaibuli nuepedorete aingarakin oni aitolomunun aseununeta. (Iburanian 5:14) Ekoto  ngesi aseununetawok nuepolok arai nuedisiak koraasi nuelomunitos kotoma amina ngesi keda luce. (Kosiom Marako 12:30, 31.) Kakwap kere, enapete Ajenak Luka Yawe igoen luegelegela kotupitos einono loka aiboisitikec ka epone loeminakinitor kesi. Ibusiak kesi ido iyalamasi.

16. Anyoin bo atiaketait naejai kiding epone loeyaitotor itunga luka akwapin ikapun kede akiro nuesisianakini Yesu? Ani bo aingiseta nuipedori oni aomoom?

¹⁶ Ekoto Satan oni aomit ebe isirigin keda abar  kesi ijaikinete itunga aiyalama, konye ejenete Ajenak Luka Yawe ebe mam ngun eraasi abeit. Icamunit oni akiro nuka Yesu ebe: “Aijar naka itunganan mere iboro luipu luejaatar ngesi.” (Luka 12:15) Mam ikapun einakinete oni aiyalama nakabeit. Mam ijaikinete oni ipapero lukabeit, ainapakin naka aomisio, arai bo nat aijar naka ikar kere. Kabeit ipuda oni ajaut keda ikapun arai iboro idis kanu ailel kotoma aijar. Konye abu Yesu kolimunite ebe idumuni oni aiyalama arai ejai oni eidicane loejok keda Edeke ka aisingaren aimawok kwape ibore yenepol kakere kotoma aijarawok. (Matayo 5:3; 6:22) Koomoom ber ijo: ‘Aseseni kereka eong ikapun kwape eseseniata itunga luka akwapin? Aomoomoenenei kereka eong ka einerenena nuikamunitos ikapun duc?’​—Luka 6:45; 21:34-36; 2 Yokana 6.

17. Inyoin bo ajokis naka ainac amoot abar?

¹⁷ Arai ikokak oni aijaanakin Yawe ka ainyeikin amoot abar, ejokunar awokoijar. (Matayo 11:29, 30) Ilakara oni keda iboro luijaatar ido idumuni aomisio nuinapakina. (Matayo 6:31, 32; Iromayon 15:13) Itidisiari ngin aiyalongong naka aijar. (Kosiom 1 Timoteo 6:9, 10.) Idumuni oni aiyalama kotoma aikor. (Aswamisio 20:35) Ido ijaikini ngin oni apak naka ajaut keda luce. Bobo da, idumuni oni ajo nuedolito.​—Ekalimonokinan 5:12.

18. Inyoin bo euta Satan aiswamakin oni?

¹⁸ Ekoto Satan amunaar eidicanewok keda Yawe, nges ibusakinitor oni aswam nuipedori kere ayuwar  edicanewok keda Yawe. Ekoto oni aitijii “ajoresio nuka imoyon.” (Ipeson 6:12) Mam Satan keda akejokin ekotosi oni araut luiyalama ka aijar ikar kere. (1 Petero 5:8) Eutasi ajoresio nu aitijii oni konye ingarakini Yawe oni aipikor ejie ngon!

19. Epone bo ani itetemitotor Ipeson 6:14-18 anapito “lujiis” nuka Ikristayon?

¹⁹ Kolo sek, anapete isirikaalei lujiis kanu ayuwara kotoma ojie. Kwape kwangin, ibusakinit oni da ainap “lujiis” lueinakinit Yawe oni. (Ipeson 6:13) Eyuwarete oni. Isiomi oni nuikamunitos “lujiis” kotoma Ipeson 6:14-18: ‘Aso kobwaata, koenito akusingabes kabeit, konapito yenikatorob yenika adolit, konapito da amuk nuka akapakina naka Akiro Nukajokak nuka ainapakin; aitelekarit kere, kolemutu ebuku loka aiyuun, loipedoriata aitudeng imalia kere luenokete luka lokaronon. Kijautu da akopira naka aitajario, ka ekileng loka emoyo, nges akirot naka Edeke. Kilipenenete apakio kere komoyo, kailip kere ka aingainga. Kanuka ngin kokwenyenenete kainyikokin kotoma aingaingaanakin lukalaunak kere.’

20. Anyoika bo nuibusakinit oni aswam tetere ingarakinete oni anapito “lujiis”?

²⁰ Arai imurokisi esirikaalet anapitoke lujiis, ido komam eyuwarit akekuan, epedori lokasurup aimusung nges. Arai ikoto oni “lujiis” ayuwar oni, ibusakinit oni aitosom kesi kere. Ibusakinit oni anapit kes isawan kere ido edaritos ejok. Ibuni oni ainyikokin ejie lo kitoni neemudiarere akwap naka Satan ka akejokin. (Apukokinio 12:17; 20:1-3) Aso, arai iuta oni  aitiji ipudesia luarokok mam ibusakinit oni apalar​—1 Ikorinton 9:27.

21. Epone bo ani itelekaaria oni ejiewok?

²¹ Mam oni igogong adepar Ekejodijodon. Konye kanu Yawe aingarakin oni asalakin imunokina neejai ngesi, ibusakinit oni ailip, aisisia akekirot ka alosenen airiamununeta. (Iburanian 10:24, 25) Ingarakinete oni iboro lu asalakin imunokina neejai Edeke ka ayuwar aiyuuniwok.

22, 23. (a) Epone bo ani ipedoria oni araut luikapakina ayuwar aiyuuniwok? (b) Anyoika bo nuibuni oni aisisiaun kosula loetupakini?

²² Ibusakinit oni akapakina ayuwar aiyuuniwok apaarasia kere. (Yokana 15:19) Acepakio inacete Ajenak Luka Yawe akiro nuetapit itunga luipu aiswamaenen. Ingitakin ber ijo: ‘Kanukinyo ibusakinitor eong ayuwar aiyuunika? Acamunit kereka eong ebe nuinera Ebaibuli ka ebulesit lomunot ebe eraasi nuka abeit? Eyalama kereka eong araut idiope kotoma Ajenak Luka Yawe? (Isabulin 34:2; Matayo 10:32, 33) Apedorit kereka eong aitatamikin luce nuikamunitos aiyuunika?’​—Matayo 24:45; Yokana 17:17; kosiom 1 Petero 3:15.

²³ Kotoma akiro nuipu, epatana oni asalakin mam irai luka akwapin. Konye acepakio, mam epatana. Itosomai Satan iponesio luegelegela aitapaaria oni. Ediopepone loitosomai ngesi erai aitelelio. Epone bo ani ipedoria oni aseun aitelelio naejok? Ibuni oni aisisiaun ngun kosula loetupakini.