1-3. (a) Anyoika bo nuisisiauni oni kotoma Awaragasia 13:20? (b) Kanukinyo ibusakinitor oni aseun ipaperowok kotoma acoa?

IWANYUNITOR kereka ijo epone loeseseniata idwe auriakakec? Arai da eroko ejenunia einer, esesenete kesi kosodete atupakin nuiswamaete auriakakec. Ido kepolooros kesi, etupakinete nuiswamaete auriakakec. Itunga luapolok da etapit atupaar nuiswamaete icetunga luetapit aupa keda kesi.

² Isisiauni oni kotoma Awaragasia 13:20, ebe: ‘Yeneupenenas kalukacoa, ecouni ngesi da.’ Kane, ‘aupenena’ keda itunganan imoriarit ajaut keda nges ayangaikin apak. Mam erai ngun bon. Ebala epirioit ediopet loesiomit noi akiro nuka Ebaibuli ebe aupanenaa keda itunganan nes ijo aminun nges ka adukun eidicane keda nges. Idila duc oni aputoor itunga lueupasi keda oni, kacut arai kejaun oni eidicane keda kes.

³ Epedorete ipaperowok ainakin oni iponesio luejok arai bo nat aitapaar oni. Iyatakitos Awaragasia 13:20 [NW] ebe: “Yeneupananasi kede ibangiok, eswalario.” Kotoma Aburanian, ‘aupanana kede’  apolouke ngesi jo adipa kede itunganan kwape opaperokon. (Awaragasia 22:24; Ikatubok 14:20) Ipapero lueminasi Edeke, isinyikokinete oni asalakin imunokina nges. Esisiata ber oni nuikamunitos itunga luabu Yawe koseu araun ipaperoke tetere oni da ipedori aseun ipapero luejok.

4. Kanukinyo eraar arereng naepol noi oni araun ipapero luka Edeke? Kanukinyo anyara Yawe Aburaam “opaperoka”?

⁴ Yawe nges Edeke Lokasuban akuj ka akwap, ijaikinit nges oni arereng naka araun ipaperoke. Erai na arereng naepol noi. Esei Yawe ikepapero ejok. Esei ngesi ngul lueminasi nges ido luiyuunitos ngesi. Koomoom ber ijo nuikamunitos Aburaam. Akapakina ngesi aswam idiobore kere kanuka Edeke. Irwan ipu, abu Aburaam kitodu ebe eyuunit ido arimaarit ngesi Edeke. Acamunit ngesi aipal okokuke, Isaak. Eyuunit Aburaam ebe “epedori Edeke aitajarun” ngesi kotoma okatwak da. (Iburanian 11:17-19; Ageun 22:1, 2, 9-13) Eyuunit Aburaam ido arai nges loarimaarit kanuka ngun, abu do Yawe konyara nges “opaperoka.”​—Isaia 41:8; Yakob 2:21-23.

5. Epone bo ani esesenia Yawe ngul luemunokina nges?

⁵ Eseseni Yawe ikepapero kwape luka etiai. Eraasi ikepapero luepodokinitos noi asalakin emunokina neejai ngesi adepar neejai idiotunganan kere. (Kosiom 2 Samuel 22:26.) Emunokina kesi ka arimaarit naarai eminasi kesi nges. Ebala Ebaibuli ebe: “ipaperikini [Edeke] kaluitenara kotauon,” apolouke  ebe ngul luerimaaritos nges. (Awaragasia 3:32) Ekoto Yawe aisipeje ipaperoke ‘kowemake.’ Ekoto ngesi kes aima nges ka ailipenen duc.​—Isabulin 15:1-5.

6. Epone bo ani itodunia oni ebe imina oni Yesu?

⁶ Abu Yesu kotema atiar: “Arai kamina itunganan, erici da akakirot, eminuni Papaka.” (Yokana 14:23) Aso kanu araun ipapero luka Yawe ibusakinit oni aminun Yesu ka aswam nuisisianakini ngesi oni. Kwape aanyunet, ibusakinit oni arimaarit akiro nuabu Yesu kicorak kanuikamunitos alimonokin ka aituluor itunga ikesisiak. (Matayo 28:19, 20; Yokana 14:15, 21) Itupaari oni ‘ikukut’ luka Yesu naarai imina oni ngesi. (1 Petero 2:21) Iyalama Yawe noi aanyun oni iswamai nuipedori kere kanu aputoor Okokuke kotoma oineriwok keda aswamisiowok da.

7. Kanukinyo ibusakinitor oni aitaraun itunga lueraasi ipapero luka Yawe ipaperowok?

⁷ Eraasi ipapero luka Yawe luiyuunitos nges, luemunokina, luerimaaritos ido eminasi Okokuke. Isei kereka oni ipapero bala Yawe? Arai eraasi ipaperokon lueputoorito Yesu ido kokukuraka alimonokin akiro nuka Ajakanut naka Edeke, epedorete aingarakin ijo da araun itunganan yenajokan ka asalakin imunokina neejai Yawe.

8. Anyoika bo nueminakinitos ijo kotoma opaperone loka Rusi ka Naomi?

⁸ Isiomenenei oni kotoma Obaibuli nuikamunitos  itunga luipu luaraasi ipapero, kwape nat Rusi keda tataake Naomi. Alomunitos angor nu kotoma aiboisio nuegelegela, ido amojongit Naomi kaneejai Rusi. Konye apotu kes koraunos ipapero naarai kesi kere, araasi luaminasi Yawe. Naakotor Naomi anyoun koMoab abongor Isirael, apotu Rusi “kimorikikinos . . . kanges.” Kobala atiar: “Eraunos ikonitunga ikatunga, Ekonideke da Ekadeke.” (Rusi 1:14, 16) Arai Rusi aberu naetodunit asianut noi kama ejai Naomi. Naaponiata kesi Isirael, abu Rusi kiswama kagogongu noi aingarakinit apaperoke. Amina Naomi Rusi noi ido abu ijaik nges aicoretait najokan. Abu Rusi kotupak ngun, ido apotu kesi kodumutu arerengusio nuipu.​—Rusi 3:6.

9. Anyoika bo nueminakinitos ijo kotoma opaperone loka Daudi keda Yonatan?

⁹ Daudi ka Yonatan da araasi ipapero luedicasi noi ido komunokina neejai Edeke. Apolokinit Yonatan Daudi nepetai ikar 30 ido ngesi abeit araun ekabaka loko Isirael. (1 Samuel 17:33; 31:2; 2 Samuel 5:4) Konye, naajenunia ngesi ebe abu Yawe koseu Daudi araun ekabaka, mam ngesi abu kitokokol arai bo nat agear abolobol ka Daudi. Konye abu ngesi kiswama nuapedori kere aigang Daudi. Kwape aanyunet, naajaar Daudi toma ationis, abu Yonatan “kitogogong” akan naka Daudi ka aingarakin nges. Akapakina ngesi aipal akeijar kanuka Daudi. (1 Samuel 23:16, 17) Arai Daudi da epapero lomunot. Abu kisumun aidar ekale loka Yonatan, ido abu ngesi kitodolik aisumuneteke karaida adaunit Yonatan  atwanare.​—1 Samuel 18:1; 20:15-17, 30-34; 2 Samuel 9:1-7.

10. Anyoika bo nuisisiauni ijo kaneejaasi Iburanian iuni kanuikamunito epaperone?

¹⁰ Araasi Sadurak, Mesak ka Abed-nego ipapero luaponi kitonyounai koreriakec eroko edisiak. Apotu kesi kingarakinos aitogogong aiyuunikec ka asalakin emunokina neejai Yawe karaida elwaka kesi koreriakec. Kedautu kes apoloun, abu Ekabaka Nebukadenesar kitem akeceiyuun kosodi aicorakin kes aima aputo naka esabu. Apotu Sadurak, Mesak ka Abed-nego kongeroto aima aputo ngin kosodete alimokin ekabaka ebe: ‘Mam sio kijaanakini idekesiokon karaida aima aputo naka esabu naibu kosipok.’ Nakitemere aiyuunikec apotu ipapero lu iuni kosalakisi emunokina neejai Ekecedeke.​—Daniel 1:1-17; 3:12, 16-28.

11. Epone bo ani ijenia oni ebe araasi Paul ka Timoteo ipapero luedicasi?

¹¹ Naeriamunotor ekiyaikia Paul ka atumunan loenyaritai Timoteo, abu ngesi kojen ebe amina Timoteo Yawe ido apodokinit noi nuikamunitos atukot. Aso abu Paul kituutoono Timoteo aingarakin iinacan kaiboisio nuegelegela. (Aswamisio 16:1-8; 17:10-14) Eswamai Timoteo nuejok noi kitoni Paul atemar ebe: “Abu kijaanakini Akiro Nukajokak nepepe” kanges. Ajeni Paul ebe erai Timoteo “loepodo” nuikamunitos iinacan kotoma atukot. Naeswamaata kesi nepepe aijaanakin Yawe, apotu Paul ka Timoteo koraunos ipapero luedicasi noi.​—Ipilipin 2:20-22; 1 Ikorinton 4:17.

12, 13. (a) Kanukinyo ibusakinitor oni aise ipapero kacoitos karaida kotoma atukot? (b) Kanukinyo ainakina ekiyakia Paul aicoretait naejai toma 1 Ikorinton 15:33?

¹² Isisiauni oni kaneejaasi iinacanawok kotoma atukot aingarakin luce asalakin emunokina. (Kosiom Iromayon 1:11, 12.) Konye ekoto oni acoit kotoma atukot da kanuikamunitos itunga luiseuni oni araun ipaperowok. Ejaasi oni iinacan luegelegela kolomunitos akwapin nuipu. Eraasi ice luitetiak kotoma atukot konye ice ejaanakisi Yawe ikaru  luipu. Eyangaikini epaperone loka itunganan keda Yawe apak apoloor kwape eyangaikinia araito da apak ationore. Kanuka ngun, ibusakinit oni araut luititing ido ketodikinitos luce amin keda ekoto oni aseunun duc ipapero luajokak.​—Iromayon 14:1; 15:1; Iburanian 5:12–6:3.

¹³ Acepak, epedori ationis naepol noi alomun toma atukot kanuka ngun ibusakinit oni acoit noi. Aticepak, epedori onac aswam iboro luicorakinit Ebaibuli ebe eroko. Arai bo nat epedori ice angurian ka aigurokin atukot da. Mam nu eraasi nuitetiak naarai agear apakio nuka ikiyakia da ajaasi atiokisio toma atukot. Kotoma abeit, abu Paul kicorak Ikristayon kapakio kangun ebe: “Sirikingalas; ‘Aup kalueroko emunaari iponesio luejok.’” (1 Ikorinton 15:12, 33) Abu bobo Paul kicorak Timoteo aseun ngul lueraasi ipapero luidicasi kanges bon. Ekoto oni da lolo aswam kwangin.​—Kosiom 2 Timoteo 2:20-22.

14. Epone bo ani eyuwara aise ipapero eidicanewok kede Yawe?

¹⁴ Ibusakinit oni ayuwar eidicanewok keda Yawe. Erai ibore yenepol. Aso ekoto oni aisac araun ipapero keda ngun luepedorete aitonokok aiyuuniwok keda amunaar eidicanewok keda Yawe. Kwape ibwaikinia ijo emugati toma akile mam ijo ipedori aomit ebe epedori emugati ngol amatun akipi aibois naka akile, kanuka ngun, mam oni ipedori aup keda itunga luarokok aomitos ebe ipedori oni aswam nuejokuka. Ibusakinit oni aseun ipaperowok kacoitos.​—1 Ikorinton 5:6; 2 Isesalonikan 3:6, 7, 14.

15. Anyoika bo nuipedori ijo aswam kanu adumun ipapero kotoma atukot?

 ¹⁵ Ipedori ijo adumun ipapero lukabeit lueminasi Yawe kotoma atukot. Eraunos kesi ipaperokon luejok. (Isabulin 133:1) Mam imoi ipapero luka aturikon arai bo luka adoketaitikon bon. Kiitu ebe amojongit Yonatan kaneejai Daudi, Rusi da adit kaneejai Naomi. Ekoto oni atupakin aicoretait naka Ebaibuli naebala ebe: ‘Kitalalasi da itauonokus.’ (2 Ikorinton 6:13; kosiom 1 Petero 2:17.) Kinyikok ijo aputoor Yawe, nges eraunotor luce da ikonipapero.

16, 17. Anyoika bo numam ibusakinit oni aswam arai kitakadiki idiotunganan oni kotoma atukot?

¹⁶ Kangolikale, ejaasi aomisio ka iponesio luegelegela kopone loeminakinitor itunga aswam iboro. Epone ngon ejaar atukot da. Ajaut kede aitegelinikineta kwape kanu eraasi nuitalakaarito naarai isisiauni oni nuipu kaneejaasi luce. Konye acepakio epedorete ingungeta ainakin oni amamut amisiikin iinacanawok kasodete oni aila kes. Epedori akadakin oni noi kagearete aomoom nueroko. (Awaragasia 12:18) Ibusakinit kereka oni acamakin ingungeta ainakin oni aijal atukot?

¹⁷ Mam. Arai kitakadiki idiotunganan oni kotoma atukot, mam ibusakinit oni aijal atukot. Mam erai Yawe nges itakadikinit oni. Ainaki nges oni aijar keda iboro kere luipuda oni. Ekoto oni amin ka amunokina nges. (Apukokinio 4:11) Erai atukot ainakinet kama ejai Yawe ido ingarakini oni aitogogong  aiyuuniwok. (Iburanian 13:17) Mam oni kijali aiyuuniwok arai da itakadikinitos luce oni.​—Kosiom Isabulin 119:165.

18. (a) Inyo bo ingarakini oni acamanar keda iinacanawok? (b) Kanukinyo ibusakinitor oni aisioni luce?

¹⁸ Ekoto oni acamanara keda iinacanawok naarai imina oni kesi. Ejeni Yawe ebe mam oni irai luidolit, kanuka ngun, ekoto oni aputoor nges. (Awaragasia 17:9; 1 Petero 4:8) Oni kere idiakanari, konye, ingarakini amin oni, ebala Ebaibuli ebe: “kisionionoros.” (Ikolosain 3:13) Einakini amin oni ainyekin aitubuun akiro nuetakanunete kanuka amamut amisiikin. Kotoma abeit mam epatana oni aimurokin arai kitakadiki itunganan oni. Epedorete ngun ainakin oni anyunyura noi ka aikokotikin itunganan ngin. Kejaa ngun da, arai isioni oni idiotunganan yenibucarit kamawok, inapakinos aomisiowok, imorikikin oni kotoma atukot, aiyatakin bobo, idumuni oni eidicane loejok kama ejai Yawe.​—Matayo 6:14, 15; Luka 17:3, 4; Iromayon 14:19.

19. Anyoika bo aswamisio nuijaikinete oni aisac aupa keda itunganan kotoma atukot?

¹⁹ Kotoma okale loeminanara itunga, nginitunganan iswamai nuitalakaritos luce. Do bo do arai emengerik idiopetunganan. Arai da ketam nginitunganan kotoma okale aingarakin nges kosodi aigir. Aticepak epedori nges aseun anyoun ore arai bo nat irengiari nges loerai akou naka ere. Epone ngopongol ejaar atukot da. Keseu itunganan aswam  iboro luitakadikinitos Yawe, emunaari do ngesi atukot. Kenger nges apupokin aicoreta, itodunete akeswamisio ebe mam bobo nges ekoto ajaut atukot. Eseuni do nges aijal atukot arai bo nat elemario nges kotoma atukot. Arai erai kwangin, itacaunit Ebaibuli cut ebe: “Sirikimorianakinos . . . kanges.” (Kosiom 1 Ikorinton 5:11-13; 2 Yokana 9-11) Etioko akiro nu noi kacut arai erai itunganan ngin opaperokon arai bo nat yenikokalekon. Konye kojautene kalo, ibusakinit oni amunokina noi neejai Yawe itia amunokina idiotunganan.​—Koany Nuengesete 8.

20, 21. (a) Epone bo ani itodunitotor ainapeta nuka alemar itunganan amin? (b) Kanukinyo ibusakinitor oni aseun ipaperowok kotoma acoa?

²⁰ Ainapeta nuka alemar itunganan kotoma atukot eraasi nuka amin kama ejai Yawe. Eyuwari atukot kama ejaa ngul lumam ekotosi aricit ikisila luka Yawe. (1 Ikorinton 5:7; Iburanian 12:15, 16) Ingarakinete oni aitodun amin kanuka ekiror lokalaunan loka Yawe keda iponesioke. (1 Petero 1:15, 16) Ido bobo itodunitos ainapeta nuka alemar itunganan katukot ebe eminai itunganan ngin. Epedori alecorio aingarakin itunganan yenadiakaa ido kokoto aijulakin. Luipu luadautu apak elemaritai, apedosi abongun atukot ido ejai aiyalama naepol noi.​—Iburanian 12:11.

²¹ Epedorete ipaperowok aituutoor oni koponesio luegelegela. Kanuka ngun, nges ibusakinitor oni aseun ipaperowok kacoitos. Arai imina oni itunga lueminasi Yawe, iupanana oni keda kes ido ingarakinete kesi oni asalakin imunokina neejai Yawe.