Katipet, ebuni atitingikinit naka Yawe kanuka akwap na ainang. Emudiario idiinin lukaisab, imorikikinos akwapisinei asurokin itunga luka Edeke, ido emudiari Yawe ikarokok kojie loka Arumagedon. Idaritos Ikristayon iboro ngul aitodolikin.

Kabeit, mam oni ijeni kaidules akiro kere kwape ejaunotor kapak naka ican lukos. Kwape nat mam oni ijeni apak naegeunotor ngun. Mam oni ijeni akiro nueinakinete apuganisinei asurokin idiinin. Mam oni ijeni apak naeyangaikinete apuganisinei esurokinitos itunga luka Edeke keda nuimoriarit asurokinio ngin. Mam oni ijeni epone loemudiaria Yawe ikaronok kojie loka Arumagedon.

Ejaa ngun da, einakinitos oni ikokoron akiro kere nuipuda oni ajenun tetere ijai katiting ka amun atereikin kanueponitos koingaren. Kwape aanyunet, ijeni oni ebe ijai oni toma “apaarasia nukawasia.” (2Tim 3:1) Ijeni oni ebe “ingongario” apaarasia nuka asurokinio naka idiinin tetere mam emudiario ediini lokabeit. (Mat 24:22) Ijeni oni ebe eyuuni Yawe iketunga. (2Pet 2:9) Ido ijeni bobo oni ebe loeseunit Yawe kanu amudiar ikaronok kojie loka Arumagedon ka aitajar ekodet loepol noi, erai ekadoliton ido egogong.​—Apu 19:11, 15, 16.

Akiro nuepote atakanun koingaren einakinete itunga “ipirisiaros itauon . . . kanuka akurian.” Konye arai isiomenen oni ka ainyabuk akiro nuikamunitos aswamisio nuka Yawe nukaitajar nueswamat ngesi kolosek, keda akiro nuinerit ngesi kanuikamunitos ngaren, ipedori oni aidarit kamun alakuniowok, kwape ebalar ekokoro ebe “kikeutu akwesikus, kosesenata kuju, naarai aapu alakuniokus.”​—Luk 21:26, 28.