Inyoin bo asioman naka Ebaibuli naepupio? Asioman ngin nges iporotoi luikamitai esiomio Ebailiwok loka Amusugun loisiteteunitai New World Translation. Elacununio iporotoi ngun motimot kotoma angajepisinei nuipu. Idiope ibore yeningarakini kotoma asioman angin nges ebe itosomao iporotoi luegitigita kanu abwoikin anginitunganan Obaibuli. Esiomio kopone loikeunit akiro keda epone loipupia itunganan kanu aitodun apolou naka akiro nuko Obaibuli kopone kaloibecokina.

Epone bo ani emedauniata luce kotoma asioman naka Ebaibuli naepupio? Luipu luetapit duc aipup asioman naka Ebaibuli kopone kalo, isiyalamikitos noi epone loengarakinia asioman ngin kes amisiikin iboro luipu. Ebakasi kesi ebe, naipupia jo iporoti luegitigita luebwoikitos nginitunganan kotoma asioman naka Ebaibuli, ijaikini jo aanyun nueswamasi kotoma asioman angin ido imisiikini jo jokan nuiwadikatai. (Awa 4:5) Ido luipu aanyutu ebe aipup asioman naka Ebaibuli kopone kalo, isinapikini kes naepupiatar kesi aiyalongongo.​—Sab 94:19.

Aipup Akirot Naka Edeke esiomio, epedori atiror aijarawok jokan. (2Siit 34:19-21) Arai ejai asioman naka Ebaibuli naepupio kotoma angajep naimisiikinit jo, ipedori jo apupenen asioman ngin duc ka aitaraun ngun ainapetakon nukomoyo?

KOSESENATA EBIDIO AITOLOMIO NAKA ASIOMAN NAKA EBAIBULI NAEPUPIO​—NUETIAKUNITAI, KOSODETA ABONGOKIN AINGISET NA:

Anyoika bo nueminakitos jo kanuikamunitos aitolomio naka asioman naka Ebaibuli naepupio?