Iswamaete iinacan agogong noi kanu aitemonokin akiro nuka atutubet, nuipedori ijo alimun, ido aanyutu iinacan luipu ebe ingarakinitos akiro nu kesi noi kotoma alimonokin. Konye kwape eraar ejautene loegelegela anatar akwap kere, epedorete iinacan aitosom kotoma alimonokinikec, akiro ace nuelelakinitos itunga atutubetekec. Konye, ekot oni kere atupakin aicoreta nueinakinio kanuka alimonokin naitegelikina. Alosikinetewok, nges aitodolikin aicorakinet naka Yesu naka alimonokin akiro nukajokak nuka Ajakanut.​—Mat 24:14.

Naitodolikiniata esisiak atutubenakec kotoma airiamununeta, ibusakinit iinacan aitosom akiro nuejaas atutubet naebala nuipedori ijo alimun kotoma Oitabo Loka Aijarawok ka Alimonokin​. Konye arai emameete nuicorakinitai, epedorete kesi aseun aingiset ace, ekokoro ece, arai ejautene ece loelakinitos itunga kotoma aiboisitikec. Itetenaarete nu aicoreta nuainakinitai apapulai 8 kolap Loikanyetaape okaru 2020 koitabowok loka airiamununeta.