Kolap Loikanyetaongon, ibuni oni aswam agogong ainakin itunga arereng naka aisisia Ebaibuli etosomaete aburocua Olelak Aijar Ikar Kere! Kolap angon, epedorete ikalimonokinak aseun araun okisilari paiyonias kanu isawan 30. Epone bo ani ibunio oni aitolot alimonokin na naitegelikina?

• Kotoma Aloset Nasodit: Itosom kau naka aburocua kanu aikeun eipud loka itunganan aisisia Ebaibuli ido otamak aitegear aisisia Ebaibuli keda nges. Iitunite ngul luapotu itodutu eipud loka aisisia Ebaibuli kotoma aloset nasodit ka kotoma abongoret da. Karaida apotu kesi kolo ongeroto aisisia Ebaibuli, aticepak epedorete kesi kwana acamun aisisia itosomaete epone lo loitetet ka aburocua. Mam ijalakini adioburocua oreria luemameete itunga arai bo nat aibwaikin aburocua toma obalua kanu aijukar neejaas ngul lumam lem sek acamunitos aisisia Ebaibuli. Epedori Ekomiiti Loka Aijaanakin Kotoma Atukot aitemokin ainapeta ace nuka airiamun alosit alimonokin kolap angon.

• Arerengusio Ace: Arai itosomaenenei atukotokon akaat kanu alimonokinia, ipikakisi toma akaat ngin aburocua Olelak Aijar Ikar Kere! ido itijenik ngul kere luekotokinos aburocua ebe eyangaasi kesi aburocua ngin, apolouke adumutu kesi arereng naka aisisia Ebaibuli atitai. Kanepe kanen, ipedori jo aitodikin itunganan epone loisisiaere Ebaibuli, arai bo nat itolomunete yes ainapeta kanu aswam ngun kotoma apak ace. Epedori onac loiyait akiro nuka alimonokin aitolomun ainapeta nuka iinacan luemisiaritos alimonokin ejok alosit aiboisio nuejaatar itunga aswamisineikec kanu aanyun epone loinakinet itunga arereng naka aisisia Ebaibuli. Ipedori jo ainakin itunga luiswamaete kajo arai bo idisitunganan yenidumuni jo kotoma aiboisit adio kere, arereng naka aisisia Ebaibuli.

Icorakinit Yesu oni ‘atuuluor [itunga] ikesisiak,’ ka ‘aisisianakin kes.’ (Mat 28:19, 20) Ilipi ingarak alimonokin na naitegelikina oni aitosom jokan Olelak Aijar Ikar Kere!