Kotoma olap Loikanyetaongon, ibuni oni aswam kagogong aitijenikin itunga ebe Ajakanut Naka Edeke nges bon epedori alemar atiokisio kotunga. (Mat 24:14) Epone bo ani ipedoria jo aswam ngun? Kosiom ekokoro loikamunit Ajakanut Naka Edeke ido komorata kaitunga luipu kwape ipedoria jo kolap Loikanyetaongon. Arai itodu itunganan akote aisisiaun nuipu, okorak nges Watchtower No. 2 2020. Akaulo kangun, kobongo bobo neejai itunganan ngin katipet ido otam agear aisisia Ebaibuli itosomai aburocua Olelak Aijar Ikar Kere! Ngul kere luelimonokinete kwape okisilari paiyonias kolap Loikanyetaongon, epedorete asekun isawan 15 arai 30.

Katipet, ebuni Ajakanut Naka Edeke amudiar ajakanuto kere nuitepegitos ngesi. (Dan 2:44; 1Kor 15:24, 25) Eswamata oni da kagogong aigang aswam na naitegelikina kanuka aitodun ebe igangit oni Yawe ka Ajakanutuke!