Abu Yesu kolimonok “akiro nukajokak nuka Ajakanut Naka Edeke.” (Luk 4:43) Abu bobo ngesi isisianak itunga ailip kanuka Ajakanut kangin. (Mat 6:9, 10) Kolap Loitomonetaadiop, ibuni oni aswam kagogong kotoma alimonokin kopone loitegelikina kanuka aitejenaar Ajakanut Naka Edeke. (Mat 24:14) Itemonok jo da ainapetakon tetere ipedori alimonokin kopone kalo loitegelikina. Ngul kere luijaanakinete kwape okisiliari paiyonias kes epedorete aseun isawan 30 arai 50 kolap angon.

Komorata keda itunga kere luipedori jo adumun, ediokokoro loikamunit Ajakanut Naka Edeke kotoma aiboisit nailimonokinia jo. Naiseunia jo ekokoro, opodokinite ediini loka ikapuponikon. Arai ekoto itunganan aisisiaun nuipu akaulo naka aloset nasodit, ijaik nges Watchtower No. 2 2020. Kosodi abongor neejai itunganan ngin katipet, ido kotam aitegear aisisia Ebaibuli itosomai idiopet kotoma Oborowok Luka Aisisianakin. Ideuna kwana apak naedit noi kanu Ajakanut Naka Edeke amudiar apuganisinei kere nuitepegitos nges. (Dan 2:44; 1Kor 15:24, 25) Kanuangun, etosomata alimonokin na naitegelikina kwape arereng na oni aitodun ebe igangit oni Yawe ka Ajakanutuke!