KANUKINYO EJOKUNAR: Yawe nges itopoloi ikinyom luka abeit kotauon luka ngul ‘luelosikinitos aijar naka ikar kere.’ (Asw 13:48; 1Kor 3:7) Iswamai oni nepepe kanges arai kinyikok oni apodokinit ngul luipudasi aisisiaun Ebaibuli kosodete atupakin. (1Kor 9:26) Ibusakinit esisiakawok amisiikin ebe erai aibatisao ibore yenepol kanu adumun aitajario. (1Pet 3:21) Ekoto oni aingarakin kesi kopedosi aiswamaunun aijulanakineta kotoma aijar tetere epedorete alimonokin ka aisisianakin luce kosodete ainakin aijarakec neejai Yawe.​—Mat 28:19, 20.

EPONE LOISWAMAET:

• Kitijenik esisiakakon ebe alosikinet naka aisisia Ebaibuli erai kanu ‘ajenun’ Yawe ka aswam nuisiyalamikinitos nges.​—Yok 17:3

• Ingarak kesi apol kotoma omoyo koipone lo kesi apedor atereikin keda atiokisio kwape nat, aisac iponesio luarokok ka aupa naronon

• Kitogogong kes ido kisinyikok kes eroko ibatisauna ka akaulo naka aibatisaun.​—Asw 14:22

KOSESENATA EBIDIO INGARAKINI YAWE JO, KOSODETE ABONGONOKIN AINGISETA NU:

• Inyoin bo emina ainakin itunganan akurianar ainakin akeijar ka aibatisaun?

• Epone bo ani epedoriata imakio aingarakin esisian apol kotoma omoyo?

• Anyoika bo nuisisiauni oni kanuikamunitos Yawe kotoma Isaia 41:10?

• Ani bo iponesio epedorete aingarakin oni aijaanakin Yawe kwape ekotor ngesi karaida mam oni irai luidolit?