Kangol karu, ejaununos iinacan luajoniasi Aiitun Atwanare Naka Yesu. Apotu kesi kogeutu akerit kotoma abolobolo naka aijar konye ajoniasi kesi kanuka atiokisio nuegelegela, itetemitai acekakesi kotoma oitabo Return to Jehovah. (Bur 12:1) Konye eroko ngul luajoniasi eraasi luketiai kama ejai Yawe loabu kogwel kesi keda aokot nuka Okokuke. (Asw 20:28; 1Pet 1:18, 19) Epone bo ani ipedoria oni aingarakin kesi abongun atukot?

Ibusakinit imakio luka atukot aimo ka aingarakin iinacan ngul luajoniasi kwape iswama ekecokon kagogong aimo amerekekin nukosipanike luaoliosi. (Luk 15:4-7) Itodunit ngin amina naka Yawe. (Yer 23:3, 4) Ibusakinit oni kere aisinyikokin luajoniasi mere imakio bon. Aisianutuwok keda amin kanejaasi iinacan luajoniasi, isiyalamikinite Yawe ido eyauni ameda naepol. (Awa 19:17; Asw 20:35) Kanuka ngun koomoom ber jo itunganan yenebeit ijo aisinyikokin, ido kiswama ngun katipet!

KOSESENATA EBIDIO KISINYIKOK LUAJONIASI, KOSODETE ABONGONOKIN AINGISETA NU:

• Anyoika bo nuabu Abbey kiswama naeriamunotor ngesi keda adiope Ajenak Luka Yawe namam ngesi kejeni?

• Kanuinyo ibusakinitor oni aingitun ber ekimat arai ejai itunganan yenajonia ido kokoto aingarakinio?

• Epone bo ani abu Abbey kitemokinio alosit aipejokin bobo Laura?

• Epone bo ani abu Abbey kitodunia ainyikokinit, atitingikin, keda amin naesinyikokinia nges Laura?

• Anyoika bo nuisisiauni oni kotoma awaragan naka Yesu naejai toma Luka 15:8-10?

• Anyoika bo arerengusio nuapotu kotakanut naemorikikinotor iinacan aingarakin Laura?