Irai kereka jo atumunan yenilimonokini kwape yeneroko ibatisauna arai bo irai jo esisian Ebaibuli? Ijaatar kereka jo keda alosikinet naka aibatisaun? Ainakin akoniijar neejai Yawe kosodi aibatisaun nges ageunet naka eidicanekon keda Yawe. (Sab 91:1) Bobo da, epedorete ngun ainakin oni adumun aitajario. (1Pet 3:21) Epone bo ani ipedoria jo apol kotoma omoyo kitoni aibatisaun?

Ekoto jo ilopet aitogogong ebe erai na abeit. Arai ejaas jo aingiseta, kinyikok aimo abongonokinetakec. (Rom 12:2) Kongic aijulanakineta nuibusakinit jo aitolomun, ido iswama ngun naarai ikoto jo aisiyalamikin Yawe. (Awa 27:11; Pes 4:23, 24) Ilipenenei Yawe duc tetere ingarakini jo. Kojen ebe, ebuni Yawe aitogogong ka aigang jo keda emoyoke lokalaunan. (1Pet 5:10, 11) Imedauni jo noi kanuka aswam ngun. Aijaanakin Yawe nges ibore itelekaarit kakere kotoma aijar!​—Sab 16:11.

KOSESENATA EBIDIO EROT LOEBEI TOMA AIBATISAUN, KOSODETE ABONGONOKIN AINGISETA NUTA:

• Anu bo ainingosia nuapedosi ice aipikor tetere ibatisaunos?

• Epone bo ani ipedoria jo adukun aiyuun naisipedori jo ainakin akoniijar neejai Yawe?

• Inyoin bo abu koinak ice aswam aijulanakineta kotoma aijarakec tetere ibatisaunos?

• Anu bo arerengusio nuedumunete ngul luijaanakinete Yawe?

• Inyoin bo apolou naka ainakin akoniijar neejai Yawe ka aibatisaun?