Eyait Yawe aiyapo naka ekiliokit ka aberu kapak naka edukonekec kwape ibore yenepol noi. Abu ngesi kotema ebe ibusakinit ekiliokit keda aberu aimorikikin nepepe. (Mat 19:5, 6) Kotoma otunga luka Edeke, ipu noi aanyuneta nuka idukonosinei luajokak. Konye ejaa ngun da, emamei edukone loedolit. Elomunete atiokisio. Mam ekoto oni acamun aomisio nuka itunga ebe ejok atiakakin arai elacit arai elomutu atiokisio odukone. Epone bo ani epedoriata luedukokina ayuwar edukonekec?

Koany akiro nu akany nuajokak.

1. Koyuwa etaukon kopone lo jo aisac eyala keda itunganan yenimam erai yenikowaikon koipone loka eisupane ka aisac aitelelio naimoriarit akiro nuka adoteu naarai emunaari ngin edukonekon.​—Mat 5:28; 2Pet 2:14.

2. Itogogong eidicanekon keda Edeke, ido iyatak aitogogong eipudikon loka akote aisiyalamikinit nges kotoma odukonekon.​—Sab 97:10.

3. Inyikok anapit etunganane lokitetet, ido iswama iboro luitodunitos asianut karaida eraas luedisiak tetere mam aijar naka yenikowaikon erai naepagal.​—Kol 3:8-10, 12-14.

4. Kinerananas duc kayenikowaikon ido kitodunite ayongit.​—Kol 4:6.

5. Kotacak okilenikon arai aberukon nuibusakinito kotoma amin.​—1Kor 7:3, 4; 10:24.

Arai kitubusikisi luedukokina edukonekec, ijaikinete kesi Yawe loerai etegearan edukone aibuses.

KOSESENATA EBIDIO “IBUSAKINIT ONI ABOLOBOL KATITING”​—KORIMA IKISILA LUKA ABOLOBOL, KOSODETE ABONGONOKIN AINGISETA NUTA:

• Karaida aticepak emina edukone agear kopone kaloejok, anu bo ainingosia nuaticepak epedorete alomun?

• Epone bo ani epedoriata aicoreta nuka Ebaibuli aingarakin ngul luepupete bala mam edukonekec erai loejok?

• Anu bo ikisila einakinit Yawe kanuikamunitos edukone?

• Kanu akerianar kotoma odukone, inyoin bo ibusakinit ekiliokit keda aberu aswam?