Kanukinyo ilelakinitor oni noi atukonokiniwok nakapolon? Kwape kapakio nuka Isirael, ijaikini atukonokin nakapolon oni arereng naka aima Yawe nepepe keda iinacanawok luipu noi. Ilelakinit oni inyamat lukomoyo luidumununei oni kapak kangin. Ido ilelelakinit bobo oni apak naka ajaut nepepe kaipapero ka lukokale. Naarai isiyalamikinit oni atukonokiniwok nakapolon, ijaikinit ngin oni ajaun apaarasia kere nuka atukonokin.

Naidumunia oni arereng ajaun nepepe keda iinacanawok, ekot oni aomoom epone loimedaunia oni keda epone loipedoria oni aitodikin luce amin. (Gal 6:10; Bur 10:24, 25) Itoduni oni ebe ipodokinit oni luce arai kingarak oni kesi kopone idio kere arai bo nat kiyuwa oni aiboisit tetere onac arai inac edumuni neiboikin. (Pil 2:3, 4) Kotoma atukonokin nakapolon, ejai oni arereng naka adumun ipapero luitetiak. Eringa ainapeta egeara keda akaulo naka ainapeta, keda kosawan luadongun luapaaran, ipedori jo aitosom apak ngin einer keda itunganan yenipejonikit kanekon. (2Kor 6:13) Kapak kangin, ipedori jo adukun epaperone lomam enangi! Nuepolok kakere, naeanyuniata luce ebe itodunit oni amin nakabeit, aticepak epedorete kesi aseun aimorikikin kaoni aijaanakin Yawe.​—Yok 13:35.

KOSESENATA EBIDIO “MAM AMIN ENANGI CUT”! ATUKONOKIN NAKAPOLON NAKA AKWAPIN NUEGELEGELA, KOSODETE ABONGONOKIN AINGISETA NUTA:

• Epone bo ani aponi itodikinere ipejok amin kotoma atukonokin naka akwapin nuegelegela kokaru 2019?

• Kanukinyo eraar aminanara keda aimorikikina naka itunga luka Yawe ibore yeneumokina?

• Anu bo iponesio luka amin luapotu iinacan luka Atukot Naeyait kikeutu?

• Epone bo ani apedoria amin aimorikikin iinacan koGermany keda koSouth Korea?

• Inyoin bo ibusakinit oni akapakina aswam?