Anu bo atiokisio nuetereikina kajo nginipaaran? Irai kereka jo akou naka ekale loipuikinitos akiro nuibusakinit aitodolikin? Irai kereka jo aurian yenirai obonipe yeniswamai agogong kanu aigang ekalekon? Irai kereka jo yenijai osomero ido ikanyi duc amoromoro kaneejaas isiometakon? Iutas kereka jo keda ariebo arai bo nat imojongaarit jo? Nginitunganan ejaasi kationis naetereikina kanges. Iinacan luipu etereikina keda atiokisio nuipu kotoma apak adiopet. Konye, ijeni oni ebe katipet ebunit alacakiniowok kotoma atiokisio angun kere.​—2Kor 4:16-18.

Konye ber kopaana, ipedori oni adumun aitalakario kotoma aijen ebe emisiikinit Yawe atiokisio nuijaatar oni, isiyalamikinit ngesi aiyuuniwok ka atitingikinitewok, ido ebuni ngesi airop oni. (Yer 29:11, 12) Epodokinit Yesu da oni noi. Kotoma aijaanakiniwok, ijaatar oni keda aitogogongoret na ebe: “ajai eong nenipe kayes.” (Mat 28:20) Naipalaria oni kasodete aomoom nuikamunitos alacakinio naebunit kotoma Ajakanut Naka Edeke, itogogongi oni awokamun keda aiyuuniwok ido ingarakinete ngun oni atitingikin atikiosio nuetereikina kaoni.​—Rom 8:19-21.

KOSESENATA EBIDIO KWAPE AAPUNIA EWOLOBOS, KOSESEN YESU!​—ARERENGUSIO NUKOINGAREN NUKA AJAKANUT, KOSODETE ABONGONOKIN AINGISETA NUTA:

• Epone bo ani apotu itunga koraunotor luasurup kakonyen nuka Edeke, ido anyoika bo nuapotu kotakanutu?

• Anyoika bo arerengusio nuedumunete ngul luemonokina Yawe?

• Epone bo ani epedorotor ngun?

• Anu bo arerengusio nueminakinitos jo noi kotama akwap nakitetet?