Koomoom ber jo bala ijai ijo apakio nuajaar Yesu toma akwap. Ido ilosit ijo Yerusalem ainumunum epucit loka iswamin. Ileleba itunga lueponitos aima kaiboisio nuegelegela. Ikoto kwani ijo aijaikin Yawe ainakinetekon. Irikit kwana ijo akinei ido ikoto ijo aridar kaneejaas ikodeta alosit oyekalu. Idolo ijo oyekalu, ileleba itunga luekotosi kesi da aijaikin ainanakinetakec. Kodoli do jo apak aijaikin esasedoti akonikinei. Kosawa kangon, kiituni do ijo ebe ejaasi ijo akiro konacekon loaticepak ejai nepenen arai bo nat esalakit ore. Itetemit Yesu nuibusakinit ijo aswam. (Kosiom Matayo 5:24.) Epone bo ani ipuconorotor ijo konacekon kwape ineritor Yesu? Kakiro kere nuiwadikatai ne, kokweta naibecokina.

IBUSAKINIT IJO . . .

• einerakin keda onacekon arai iwomit ijo ebe erai abeit ebe enyunyura teni ngesi

• aitoronar ngesi kanu akenyunyuranut ido ekoto ber ngesi da acamun akediakar

• apupokin onacekon kaiyapaara ido arai da mam ijo imisiikinit ejok, ibusakinit ijo ailip aitimio kanuapotu kotakanutu

IBUSAKINIT ONACEKON . . .

• airimokit alimonokin iinacan kotoma atukot nuikamunitos aibucaretekon

• areseikin ijo, aitatam epone loageunotor akiro ka aiketakin ebe ekoto ijo acamun adiakaretekon

• aiitun aitasonokon keda atititingukon adolikon nges ailip aitimio

Anyoika bo nuesisianakini Yesu kanuikamunitos acamanar keda onacekon kanu Edeke acamun aimakon arai da mam oni ijaanakini ainanakineta nuka itiang kotoma aimawok lolo?