1 Воқеанома 14:1-17
14 Ҳироми+ подшоҳи Сӯр ба назди Довуд хабаррасононро фиристод, ҳамчунин барои сохтани қасри ӯ чӯбҳои сидра, сангтарошон* ва дуредгаронро равона кард.+
2 Он гоҳ Довуд фаҳмид, ки Яҳува ӯро чун подшоҳ бар Исроил устувор гардондааст,+ зеро ӯ ба хотири халқаш Исроил подшоҳии вайро хеле бузург карда буд.+
3 Довуд дар Ерусалим якчанд зани дигар гирифт+ ва аз ӯ боз писарону духтарон ба дунё омаданд.+
4 Ин аст номҳои фарзандоне, ки дар Ерусалим барои ӯ таваллуд ёфтанд:+ Шамуа, Шубоб, Нотон,+ Сулаймон,+
5 Ибҳор, Элишуа, Элфолат,
6 Нӯҷа, Нофаҷ, Ёфиа,
7 Элишомаъ, Баалёдоъ ва Элифолат.
8 Вақте фалиштиён шуниданд, ки Довудро тадҳин намуда*, подшоҳи тамоми Исроил кардаанд,+ ҳамаашон берун омаданд, то бо Довуд биҷанганд.+ Довуд аз ин хабардор шуда бар зидди онҳо баромад.
9 Он вақт фалиштиён омада, дар водии Рафоим+ тохтутоз кардан гирифтанд.
10 Довуд аз Худо пурсид: «Оё бар зидди фалиштиён бароям? Оё онҳоро ба дасти ман месупорӣ?» Яҳува ба ӯ ҷавоб дод: «Баро ва ман ҳатман онҳоро ба дасти ту месупорам».+
11 Довуд ба Баал-Фаросим+ омада, онҳоро дар он ҷо шикаст дод ва гуфт: «Худо лашкари душманонамро бо дасти ман рахна зад, чуноне ки селоб рахна мезанад». Аз ин рӯ он ҷоро Баал-Фаросим* номиданд.
12 Фалиштиён худоёни худро дар он ҷо партофта гурехтанд ва бо фармони Довуд онҳоро дар оташ сӯзонданд.+
13 Чанде пас фалиштиён боз дар водӣ тохтутоз карданд.+
14 Довуд боз аз Худо пурсон шуд ва ӯ ҷавоб дод: «Аз пеш ҳамла накун, балки аз ақибашон давр зада, аз тарафи буттаҳои бака бар зидди онҳо баро.+
15 Вақте ки дар сари буттаҳои бака садои қадамҳоро бишнавӣ, ҳамла ор, зеро Худо пешопеши ту рафта, лашкари фалиштиёнро зарба мезанад».+
16 Довуд, ҳамон тавре ки Худо амр фармуд, амал кард+ ва онҳо лашкари фалиштиёнро аз Ҷабъа то Ҷозар+ зарба заданд.
17 Пас аз ин шуҳрати Довуд дар тамоми мамлакатҳо паҳн шуд ва Яҳува дар дили тамоми халқҳо тарси Довудро ҷо кард.+
