ኣብ JW Library፡ ትርኢት እቲ እተንብቦ ጽሑፋት ከተተዓራርየሉ እትኽእል እተፈላለየ መገዲ ኣሎ። ነዚ ኣገልግሎት እዚ፡ ሓደ ምዕራፍ ወይ ዓንቀጽ ከፊትካ ኸተንብብ ከለኻ ብሸነኽ ላዕሊ እቲ ስክሪን ኣብ ዘሎ ሽራጥ ክትረኽቦ ትኽእል ኢኻ።

ትርኢት ጽሑፋት ከተተዓራሪ እንተ ደሊኻ፡ ነዚ ዚስዕብ መምርሒታት ስዓብ፦

•  ቋንቋ ቐይር

•  መሳርዕ ጽሑፍ ቀይር

•  ምስሊ ወይ ጽሑፍ ርአ

•  Open in . . .

•  እትርእዮ መጽሓፍ ቅዱሳት ኣተዓራሪ

ቋንቋ እቲ እተንብቦ ዘለኻ ምዕራፍ ወይ ዓንቀጽ ክትቅይሮ ትኽእል ኢኻ።

• እቲ እተንብቦ ዘለኻ ጽሑፍ በየናይ ቋንቋታት ከም ዚርከብ ንምፍላጥ፡ ነታ ምልክት ቋንቋታት ጠውቃ። ብዙሕ ሳዕ እትጥቀመሉ ቛንቋታት ኣብ ላዕሊ ተሰሪዑ ኺጸንሓካ እዩ። እቲ ብቕልል ዝበለ እንግሊዝኛ እተዳለወ ግምቢ ዘብዐኛ እውን ኣብዚ ኽትረኽቦ ትኽእል ኢኻ። ስም እቲ ዝደለኻዮ ቛንቋ ምስ እትጽሕፍ ድማ፡ ኣብቲ ዝርዝር ክትረኽቦ ትኽእል ኢኻ።

• ዛጊት ዘየራገፍካዮ ቛንቋታት ምልክት ደበና ኣለዎ። ነቲ ቛንቋ ጠዊቕካ ዝደለኻዮ ሕታም ከተራግፍ ትኽእል ኢኻ። እቲ ሕታም ምስ ተራገፈ፡ እቲ ምልክት ደበና ኺጠፍእ እዩ። ነቲ ቛንቋ ደጊምካ ምስ እትጥውቖ ድማ፡ ነቲ ሕታም ከተንብቦ ትኽእል ኢኻ።

መጠን እቲ ጽሑፍ ንምንባብ ከም ዚጥዕመካ ጌርካ ኽትቀያይሮ ትኽእል ኢኻ።

ገሊኡ ዓንቀጻት ብትርኢት ምስሊ ወይ ጽሑፍ ኪኽፈት ይከኣል እዩ። ነቲ ምልክት ጠዊቕካ ድማ ክትቀያይሮ ትኽእል ኢኻ።

• ምስሊ ርአ፦ እቲ ትርኢት ምስሊ ተባሂሉ ዘሎ፡ ከምቲ ብወረቐት እተሓትመ ጽሑፍ ዘለዎ ምስሊ የርኢ። ገሊኦም ኣብ ከም መጽሓፍ መዝሙር ዝኣመሰለ ጽሑፋት ነዚ ኺጥቀሙ ይደልዩ እዮም፣ ኣብኡ ምልክት ኖታ ዝሓዘ ጽሑፍ ኣሎ።

• ጽሑፍ ርአ፦ እቲ ትርኢት ጽሑፍ ተባሂሉ ዘሎ፡ ንጥቕስታት መጽሓፍ ቅዱስ ጠዊቕካ ኸተንብብን መጠን እቲ ጽሑፍ ከተተዓራርን የኽእለካ።

እታ Open in . . . እትብል ምልክት፡ ነቲ ትሕዝቶ ካብ JW Library ወጺእካ ኣብ ካልእ ኣፕሊኬሽን ክትርእዮ ተኽእለካ።

ኣብ ሓደ ጽሑፍ ዘሎ ጥቕሲ መጽሓፍ ቅዱስ እንተ ጠዊቕካ፡ ነቲ ፍቕድታት ኸተንብቦ ትኽእል ኢኻ። ነታ ኣብ ትሕቲ እቲ ፍቕድታት ዘላ Customize እትብል ምልክት ጠዊቕካ፡ ካብቲ ዘራገፍካዮ ትርጉማት መጽሓፍ ቅዱስ ናብቲ ዝርዝር ከተእቱ ትኽእል ኢኻ።

ተወሳኺ መጽሓፍ ቅዱስ ብኸመይ ከም እትረክብ ክትፈልጥ እንተ ደሊኻ፡ ነታ “መጽሓፍ ቅዱሳት ኣራጊፍካ ተጠቐም—ኣንድሮይድ” ዘርእስታ ዓንቀጽ ርአ።