የሱስ ንሰለስተ ዓመትን መንፈቕን ምስ ሰበኸን ምስ መሃረን፡ ምድራዊ ህይወቱ ዜብቅዓሉ ግዜ ይቐርብ ከም ዝነበረ ይፈልጥ ነበረ። መራሕቲ ሃይማኖት ኣይሁድ ንኪቐትልዎ ውዲት ይኣልሙሉ እኳ እንተ ነበሩ፡ ኣብቶም ከም ነብዪ ዝርእይዎ ዝነበሩ ህዝቢ ናዕቢ ኸይለዓል ግን ፈርሁ። እዚ ኪኸውን ከሎ፡ ሰይጣን ነቲ ይሁዳ ኣስቆሮታዊ ዚበሃል ሓደ ኻብቶም 12 ሃዋርያት የሱስ፡ ንጐይታኡ ኸም ዚኸድዖ ገበረ። እቶም መራሕቲ ሃይማኖት ንይሁዳ፡ ንየሱስ ምእንቲ ኼትሕዞ ኢሎም፡ 30 ቕርሺ ብሩር ሃብዎ።

ኣብታ ናይ መወዳእታ ምሸት፡ የሱስ ምስ ሃዋርያቱ ብሓባር ፋስጋ ኣብዓለ። ንይሁዳ ድሕሪ ምስጓጉ ኸኣ፡ ድራር ጐይታ ዚበሃል ሓድሽ በዓል ኣተኣታተወ። እንጌራ ኣልዒሉ፡ ጸልዩ፡ ነቶም ዝተረፉ 11 ሃዋርያቱ ሃቦም። “እዚ ምእንታኹም ዚውሀብ ዘሎ ስጋይ እዩ፡ እዚ ንመዘከርታይ ግበርዎ” በሎም። ወይኒ ኣልዒሉ እውን፡ “እዛ ጽዋእ እዚኣ እቲ ምእንታኹም ብዚፈስስ ዘሎ ደመይ እተገብረ ሓድሽ ኪዳን እያ” በለ።—ሉቃስ 22:19, 20።

የሱስ በታ ለይቲ እቲኣ ንሃዋርያቱ ብዙሕ ዚነግሮም ነገራት ነይርዎ እዩ። ንሓድሕዶም ጥቕሚ ርእሳ እትስውእ ፍቕሪ ንኼርእዩ፡ ሓድሽ ትእዛዝ ሃቦም። “ነንሓድሕድኩም ፍቕሪ እንተላትኩም፡ በዚ ደቀ መዛሙርተይ ምዃንኩም ኵሉ ኺፈልጥ እዩ” በሎም። (ዮሃንስ 13:34, 35) ልቦም በቲ ቐሪቡ ዝነበረ ዜሕዝን ፍጻመ ኸይሽበር ኣተባብዖም። ምእንታኦም ድማ ካብ ልቡ ጸለየ። ብሓባር መዝሙር ምስጋና ምስ ዘመሩ፡ ብለይቲ ኻብታ ዝነበርዋ ቤት ወጹ።

ኣብ ስፍራ ኣታኽልቲ ጌተሴማኔ ምስ በጽሑ፡ የሱስ ተምበርኪኹ ኣብ ልቡ ዘሎ ዅሉ ብጸሎት ኣፍሰሰ። ነዊሕ ከይጸንሐ፡ እተዓጥቁ ወተሃደራትን ካህናትን ካልኦት ሰባትን ኪሕዝዎ መጹ። ይሁዳ ንየሱስ ምእንቲ ኺፈልጥዎ ኢሉ፡ ናብኡ ቐሪቡ ሰዓሞ። እቶም ወተሃደራት ንየሱስ ኪኣስርዎ ኸለዉ፡ ሃዋርያቱ ሃደሙ።

የሱስ ኣብ ቅድሚ ላዕለዋይ ቤት ፍርዲ ኣይሁድ ምስ ቀረበ፡ ወዲ ኣምላኽ ምዃኑ ገለጸ። እቲ ቤት ፍርዲ ንየሱስ፡ ንኣምላኽ ከም እተጻረፈ ገይሩ ስለ ዝረኣዮ፡ ብሞት ኪቕጻዕ ፈረዶ። ድሕሪኡ፡ ንየሱስ ናብቲ ሮማዊ ምስለኔ ጶንጥዮስ ጲላጦስ ወሰድዎ። ንሱ ድማ ንየሱስ ካብ ዝዀነ ይኹን ገበን ንጹህ ኰይኑ እኳ እንተ ረኸቦ፡ ናብቶም ኪመውት ዚደልይዎ ዝነበሩ ህዝቢ ግን ኣሕሊፉ ሃቦ።

ድሕሪኡ ናብ ጐልጎታ ወሰድዎ፡ ኣብኡ ድማ ወተሃደራት ሮሜ ኣብ ዕንጨይቲ ሸንከርዎ። ኣብቲ ግዜ እቲ፡ ቀትሪ ምድሪ፡ ብተኣምራዊ መገዲ ጸልመተ። በታ መዓልቲ እቲኣ፡ ድሕሪ ቐትሪ የሱስ ሞተ፡ ዓብዪ ምንቅጥቃጥ ምድሪ ድማ ዀነ። ስጋኡ ኣብ በዓቲ ተነብረ። ንጽብሒቱ፡ ካህናት ነቲ መቓብር ዓጸውዎ፡ ኣብ ኣፍ ደጊኡ ድማ ሓለውቲ ገበሩሉ። እሞኸ ኣብቲ መቓብር ተዓጽዩ ተሪፉዶ፧ ኣይፋል። ካብ ኵሉ ዝዓበየ ተኣምር ዚፍጸመሉ ግዜ ቐሪቡ ነበረ።

—ኣብ ማቴዎስ ምዕራፍ 26ን 27ን፣ ማርቆስ ምዕራፍ 14ን 15ን፣ ሉቃስ ምዕራፍ 22ን 23ን፣ ዮሃንስ ምዕራፍ 12 ኽሳዕ 19 እተመስረተ።