እዚ ኽፋል እዚ ንክርስትያናዊ ቕዱሳት ጽሑፋት ግሪኽኛ የፋልጠና። የሱስ ኣብ ሓንቲ ንእሽቶ ኸተማ ኻብ ዚነብሩ ትሑታት ስድራ ቤት ተወልደ። ምስቲ ጸራቢ ዝነበረ ኣቦኡ እውን ይዓዪ ነበረ። የሱስ ንደቂ ሰብ ኬድሕን እዩ መጺኡ። የሆዋ ኸኣ ንዕኡ፡ ንጉስ መንግስተ ሰማያት ኪኸውን ሓረዮ። ወላዲ እንተ ዄንካ፡ የሆዋ ነቲ የሱስ ዚዓብየሉ ስድራ ቤትን ሃዋህውን ከመይ ገይሩ ተጠንቂቑ ኸም ዝመረጾ ንውሉድካ ኣረድኣዮ። የሆዋ ንየሱስ ካብቲ ሄሮድስ ኪቐትሎ ዝገበሮ ጻዕሪ ብኸመይ ከም ዘዕቈቦን ንዕላማ የሆዋ ደው ኬብሎ ዚኽእል ነገር ከም ዘየልቦን ከኣ ግለጸሉ። የሆዋ ንዮሃንስ፡ ንየሱስ መገዲ ኼዳልወሉ ብኸመይ ከም ዝመደቦ ድማ ምሃሮ። የሱስ ካብ ንእስነቱ ኣትሒዙ ጥበብ የሆዋ ብኸመይ ይፈቱ ኸም ዝነበረ እውን ኣጕልሓሉ።