የሆዋ “ሕጉስ ኣምላኽ” እዩ። (1 ጢሞቴዎስ 1:11) ሕጉሳት ክንከውንን ህይወት ከነስተማቕርን ይደልየና እዩ። ካብ ስራሕ ኣዕሪፍና ኽንዘናጋዕ ከለና ባህ ይብሎ እዩ። ኣብዚ ትምህርቲ እዚ፡ እቲ ኣብ መዘናግዒ እነሕልፎ ግዜ፡ ብኸመይ ሓጐስን ዕግበትን ከም ዜምጽኣልና፡ ብኸመይ ከኣ ንየሆዋ ባህ ከም ዜብሎ ኽንርኢ ኢና።

1. መዘናግዒ ኽንመርጽ ከለና፡ እንታይ ኢና ኽንዝክር ዘሎና፧

ከተዕርፍ ከለኻ እንታይ ምግባር ኢኻ እትፈቱ፧ ገሊኦም ናይ ምዝንጋዕ ግዜኦም ጸጥታ ኣብ ዝሰፈኖ ገዛኦም ኰይኖም መጽሓፍ እናኣንበቡ፡ ሙዚቃ እናሰምዑ፡ ፊልም እናረኣዩ፡ ወይ ኢንተርነት እናዳህሰሱ ኼሕልፍዎ እዮም ዚመርጹ። ገሊኦም ከኣ ምስ ኣዕሩኾም ብእግሮም እናተዛወሩ፡ እናሓምበሱ፡ ወይ ጸወታ እናተጻወቱ ኼሕልፍዎ እዮም ዚመርጹ። እንመርጾ መዘናግዒ እዚ ይኹን እቲ፡ ምርጫና “ብጐይታ ተቐባልነት ዘለዎ” ምዃኑ ኸነረጋግጽ ኣሎና። (ኤፌሶን 5:10) ኣብ ሓያሎ መዘናግዒ ኸም ዓመጻን ጾታዊ ርኽሰትን መናፍስትነትን ዝኣመሰለ የሆዋ ዚጸልኦ ነገራት ስለ ዘሎ፡ ንዕኡ ዜጕሂ ዘይምዃኑ ኸነረጋግጽ ኣሎና። (መዝሙር 11:5 ኣንብብ።) እሞ ደኣ ኣብ መዘናግዒ ጥበባዊ ምርጫ ኽንገብር ዚሕግዘና እንታይ እዩ፧

ንየሆዋ ዜፍቅሩ ኣዕሩኽ እንተ መሪጽና፡ ኣባናን ኣብ ናይ መዘናግዒ ምርጫናን ጽቡቕ ጽልዋ ኺህልዎም ይኽእል እዩ። ከምቲ ኣብ ዝሓለፈ ትምህርቲ ዝረኣናዮ፡ “ምስ ጥበበኛታት ዚመላለስ ጥበበኛ ይኸውን።” በቲ ኻልእ ሸነኽ ግና፡ ምስቶም ንመለክዒታት ኣምላኽ ዘይፈትዉ ሰባት ኣዘውቲርና ግዜ ነሕልፍ እንተ ዄንና፡ ‘ክፉእ ንረክብ’ ኢና።—ምሳሌ 13:20።

2. ስለምንታይ ኢና ነቲ ኣብ መዘናግዒ እነሕልፎ ግዜ ኽንቈጻጸሮ ዜድሊ፧

ዋላ እውን ጥዑይ መዘናግዒ ድሕሪ ምምራጽና፡ ኣብኡ እምብዛ ብዙሕ ግዜ ኸይነሕልፍ ክንጥንቀቕ ኣሎና። እንተ ዘይኰይኑ፡ ብዝያዳ ኣገዳሲ ንዝዀነ ንጥፈታት እኹል ግዜ ኣይህልወናን እዩ። መጽሓፍ ቅዱስ፡ “ንግዜኹም ብዝበለጸ ተጠቐሙሉ” ኢሉ የተባብዓና እዩ።—ኤፌሶን 5:15, 16 ኣንብብ።

 4. ግዜኻ ብጥበብ ተጠቐመሉ

5. ጥዑይ መዘናግዒ ምረጽ

ገሊኡ መዘናግዒ ንየሆዋ ዜጕህዮ እኳ እንተ ዀነ፡ ንዕኡ ዘየጕህዮ ባህ ዜብል ብዙሕ መዘናግዒ ግና ኣሎ። መክብብ 8:15ን ፊልጲ 4:8ን ኣንብብ፡ ድሕሪኡ በዚ ሕቶ ተመያየጡ፦

• እንታይ ጥዑይ መዘናግዒ ኢኻ እትፈቱ፧

 ጽማቝ

የሆዋ ጥዑይ መዘናግዒ ኽንመርጽን ብእኡ ኽንሕጐስን ይደልየና።

ክለሳ

• እንታይ መዘናግዒ እዮም ክርስትያናት ኬወግዱ ዘለዎም፧

• ክንደይ ዚኣክል ግዜ ኣብ መዘናግዒ ኸም እነሕልፍ ክንጥንቀቕ ዘሎና ስለምንታይ ኢና፧

• ስለምንታይ ኢኻ ንየሆዋ ባህ ዜብሎ መዘናግዒ ኽትመርጽ እትደሊ፧