ናይ ሓቂ ክርስትያናት፡ ዝዀነ ይኹን ነገር ነቲ ንየሆዋ ዜቕርብዎ ኣምልኾ ኺዓግቶ ኣይፈቕዱን እዮም። ከምኡ ኸም ዚስምዓካ መሸም ኣየጠራጥርን እዩ። የሆዋ ንተኣማንነትካ ኣኽቢሩ እዩ ዚርእዮ። (1 ዜና መዋእል 28:9 ኣንብብ።) እሞ ደኣ እንታይ ኵነታት እዩ ነቲ ንዕኡ ዘሎካ ተኣማንነት ኪፍትኖ ዚኽእል፧ ከመይ ጌርካኸ ኢኻ ነዚ ኽትሰግሮ ትኽእል፧

1. ሰባት ነቲ ንየሆዋ ዘሎና ተኣማንነት ብኸመይ ኪፍትንዎ ይኽእሉ፧

ገሊኦም ሰባት ንየሆዋ ምግልጋል ክንሓድጎ ይፍትኑና እዮም። መን ከምኡ ኺገብር ይኽእል፧ ገሊኦም ካብ ሓቂ ዝወጹ ሰባት፡ እምነትና ኼፍርሱ ኢሎም ብዛዕባ ውድብ ኣምላኽ ሓሶት ይነዝሑ እዮም። ንሳቶም ከሓድቲ ይብሃሉ። ገሊኦም መራሕቲ ሃይማኖት እውን ንገርህታት ካብ ሓቂ ኼውጽኡ ኢሎም ብዛዕባና ናይ ሓሶት ሓበሬታ ይነዝሑ እዮም። ምስ ተጻረርቲ ምምጓት፡ መጻሕፍቶም ምንባብ፡ ናብ ወብሳይቶም ምእታው፡ ወይ ቪድዮታቶም ምርኣይ ሓደገኛ እዩ። የሱስ ብዛዕባ እቶም ንየሆዋ ኸይተገልግል ዕንቅፋት ዚዀኑ ሰባት፡ “ሕደግዎም፡ ዕዉራት መራሕቲ እዮም። ዕዉር ንዕዉር እንተ መሪሕዎ፡ ክልቲኦም ኣብ ጕድጓድ ይወድቁ” ኢሉ ተዛሪቡ እዩ።—ማቴዎስ 15:14።

2. እንታይ ብሕታዊ ውሳነታት እዩ ነቲ ንየሆዋ ዘሎና ተኣማንነት ኪፍትኖ ዚኽእል፧

ንየሆዋ ዘላትና ፍቕሪ ምስ ናይ ሓሶት ሃይማኖት ፈጺምና ኸይንተናኸ ትድርኸና እያ። ምስ ናይ ሓሶት ሃይማኖት ምትሕሓዝ ኣብ ዘለዎ ስራሕ፡ ውድብ፡ ወይ ንጥፈት ክንሳተፍ ኣይግባእን እዩ። የሆዋ፡ “ኣቱም ህዝበይ፡ . . . ካብኣ [ካብ ዓባይ ባቢሎን] ውጹ” ኢሉ ኣጠንቂቑና እዩ።—ራእይ 18:2, 4።

 ኣዕሚቝካ ዅዓት

3. ካብ ናይ ሓሶት መምህራን ተጠንቀቕ

ብዛዕባ ውድብ የሆዋ ኣሉታዊ ነገር እንተ ሰሚዕና፡ እንታይ ክንገብር ኣሎና፧ ምሳሌ 14:15 ኣንብብ፡ ድሕሪኡ በዚ ሕቶ ተመያየጡ፦

• ዝሰማዕናዮ ዅሉ ኽንኣምን ዘይብልና ስለምንታይ ኢና፧

ካልኣይ ዮሃንስ 9-11 ኣንብብ፡ ድሕሪኡ በዚ ሕቶታት ተመያየጡ፦

• ምስ ከሓድቲ ርክብ ኪህልወና ይግባእዶ፧

• ምስ ከሓድቲ ብቐጥታ ዘይንራኸብ እኳ እንተ ዀንና፡ ምስ ትምህርትታቶም ብኸመይ ክንራኸብ ንኽእል፧

• የሆዋ ነቲ ብዛዕባኡ ወይ ብዛዕባ ውድቡ ዚውረ ኣሉታዊ ዘረባ ነቕልበሉ እንተ ዄንና፡ ከመይ ዚስምዖ ይመስለካ፧

4. ሓደ ሓው ኪሓጥእ ከሎ፡ ንየሆዋ እሙን ኩን

ኣብ ጉባኤ ዘሎ ሰብ ከቢድ ሓጢኣት ከም ዝገበረ እንተ ፈሊጥና፡ እንታይ ግዴታ እዩ ዘሎና፧ ኣብቲ ንጥንታዊት እስራኤል እተዋህበ ሕጊ ኣምላኽ ዚርከብ ስርዓት እስከ ንርአ። ዘሌዋውያን 5:1 ኣንብብ።

ኣብዛ ፍቕዲ እዚኣ ተሓቢሩ ኸም ዘሎ፡ ሓደ ሰብ ከቢድ ሓጢኣት ከም ዝገበረ እንተ ፈሊጥና፡ ንሽማግለታት ክንነግሮም ኣሎና። ከምኡ ቕድሚ ምግባርና ግና፡ ነቲ ኣባሲ ባዕሉ ናብ ሽማግለታት ከይዱ ሓጢኣቱ ኺናዘዝ እንተ ኣተባባዕናዮ ጽቡቕ እዩ። ከምኡ እንተ ዘይገይሩ፡ በቲ ንየሆዋ ዘሎና ተኣማንነት ተደሪኽና ንሽማግለታት ክንነግሮም ኣሎና። ከምዚ ምግባርና ነዞም ዚስዕቡ ብተኣማንነት ከም እነፍቅሮም ዜርኢ ብኸመይ እዩ፧

• ንየሆዋ ኣምላኽ

• ነቲ ዝሓጥአ ሰብ

• ኣብ ጉባኤ ንዘለዉ ኻልኦት

 5. ካብ ዓባይ ባቢሎን ውጻእ

 ጽማቝ

ወትሩ ንየሆዋ እሙን ንምዃን፡ ምስቶም ኬስሕቱና ዚጽዕሩ ኽንሓብር የብልናን።

ክለሳ

• ሓሳባት ከሓድቲ ኽንሰምዕ ዘይብልና ስለምንታይ ኢና፧

• ሓደ ሓው ከቢድ ሓጢኣት ከም ዝገበረ እንተ ፈሊጥና፡ እንታይ ኢና ኽንገብር ዚግባእ፧

• ነቲ ኻብ ናይ ሓሶት ሃይማኖት ክንወጽእ እተዋህበና መጠንቀቕታ ብኸመይ ክንስዕቦ ንኽእል፧