መዝሙር 29:1-11
ናይ ዳዊት መዝሙር።
29 ኣቱም ደቂ ሓያላት፡ ንየሆዋ ዚግብኦ ሃብዎ፣ስለቲ ኽብሩን ብርታዐኡን ንየሆዋ ዚግብኦ ሃብዎ።+
2 ንየሆዋ እቲ ንስሙ ዚግብኦ ኽብሪ ሃብዎ።
ንየሆዋ ብቕዱስ ስሉም ኣልባሳት* ስገዱሉ።*
3 ድምጺ የሆዋ ኣብ ልዕሊ ማያት ተሰሚዑ፣እቲ ኽቡር ኣምላኽ ኣንጐድጒዱ።+
የሆዋ ኣብ ልዕሊ ብዙሕ ማያት እዩ።+
4 ድምጺ የሆዋ ሓያል እዩ፣+ድምጺ የሆዋ ግሩም እዩ።
5 ድምጺ የሆዋ ንቄድሮሳት ይሰብሮ ኣሎ፣እወ፡ የሆዋ ንቄድሮሳት ሊባኖስ ይሰባብሮ።+
6 ንሊባኖስ* ከም ምራኽ፡ንሲርዮን+ ከኣ ከም ጣዕዋ ጐባይ የሰራስሮም።
7 ድምጺ የሆዋ ብሃልሃልታ ሓዊ ይወቅዕ።+
8 ድምጺ የሆዋ ንበረኻ የንቀጥቅጦ፣+የሆዋ ንበረኻ ቃዴስ+ የንቀጥቅጦ።
9 ድምጺ የሆዋ ንእራብ የንቀጥቅጣን የውልዳን፣ንዱር ከኣ ቃልዕ ይገብሮ።+
ኣብ መቕደሱ ዘሎ ዅሉ እውን፡ “ክብሪ!” ይብል።
10 የሆዋ ኣብ ልዕሊ ዜዕለቕልቕ ማያት* ኣብ ዝፋን ይቕመጥ፣+የሆዋ ንዘለኣለም ነጊሱ ኣብ ዝፋን ይቕመጥ።+
11 የሆዋ ንህዝቡ ብርታዐ ኺህቦ እዩ።+
የሆዋ ንህዝቡ ብሰላም ኪባርኾ እዩ።+
እግረ ጽሑፍ
^ ወይ፡ “ስለቲ ግርማ ቕድስናኡ” ኪኸውን ይኽእል።
^ ወይ፡ “ኣምልኽዎ።”
^ ንሰንሰለት ኣኽራን ሊባኖስ ኪኸውን ኣለዎ።
^ ወይ፡ “ሰማያዊ ውቅያኖስ።”
