መዝሙር 57:1-11
ንኣላዪ፣ ብ“ኣይተጥፍእ።” ናይ ዳዊት። ሚክታም።* ካብ ሳኦል ናብ በዓቲ ምስ ሃደመ።+
57 ኦ ኣምላኽ፡ ኣባኻ እምዕቈብ፡*+ሽግራት ክሳዕ ዚሓልፍ ድማ ኣብ ጽላል ኣኽናፍካ እዕቈብ ኣለኹ እሞ፡+ሞገስካ ኣርእየኒ፡ ሞገስካ ኣርእየኒ።
2 ነቲ ልዑል ኣምላኽ፡ነቲ ነዚ መወዳእታ ዚገብረለይ ናይ ሓቂ ኣምላኽ እጽውዖ ኣለኹ።
3 ካብ ሰማይ ረድኤት ኪሰድደለይን ኬድሕነንን እዩ።+
ነቲ ዚነኽሰኒ፡ ኬፍሽለሉ እዩ። (ሴላ)
ኣምላኽ ነቲ ብተኣማንነት ዜርእዮ ፍቕሩን ተኣማንነቱን ኪልእኽ እዩ።+
4 ብኣናብስ ተኸቢበ ኣለኹ፣*+ኣብ መንጎ እቶም ኪውሕጡኒ ዚደልዩ፡ኣስናኖም ኲናውትን ፍላጻታትን ዝዀነ፡ልሳኖም ከኣ በሊሕ ሰይፊ ዝዀነ ሰባት እድቅስ ኣለኹ።+
5 ኦ ኣምላኽ፡ ኣብ ልዕሊ ሰማያት ልዕል በል፣ክብርኻ ኣብ ልዕሊ ዅላ ምድሪ ይኹን።+
6 ንኣእጋረይ ንምጽዋድ መርበብ ኣዳልዮምለይ ኣለዉ፣+ብጭንቂ ጐቢጠ ኣለኹ።*+
ኣብ ቅድመይ ጕድጓድ ኵዒቶም ኣለዉ፣ግናኸ፡ ንሳቶም ኣብኡ ወዲቖም።+ (ሴላ)
7 ኦ ኣምላኽ፡ ልበይ ጽኑዕ እዩ፣+ልበይ ጽኑዕ እዩ።
ክዝምርን ከዝይምን እየ።
8 ክብረየ፡ ንቓሕ።
ኦ በገና፡ ንስኺ እውን ኦ መሰንቆ፡* ንቕሒ።
ንወጋሕታ ኸንቅሖ እየ።+
9 ኦ የሆዋ፡ ኣብ መንጎ ህዝብታት ክውድሰካ፡+ኣብ መንጎ ኣህዛብ ከኣ ውዳሰ ኽዝምረልካ* እየ።+
10 እቲ ብተኣማንነት እተርእዮ ፍቕርኻስ ዓብዪ፡ ክሳብ ሰማያት፡እቲ ተኣማንነትካ ድማ ክሳብ ጠፈር እዩ።+
11 ኦ ኣምላኽ፡ ኣብ ልዕሊ ሰማያት ልዕል በል፣ክብርኻ ኣብ ልዕሊ ዅላ ምድሪ ይኹን።+
እግረ ጽሑፍ
^ ወይ፡ “ነፍሰይ ኣባኻ ትምዕቈብ።”
^ ወይ፡ “ነፍሰይ ብኣናብስ ተኸቢባ ኣላ።”
^ ወይ፡ “ነፍሰይ ብጭንቂ ጐቢጣ ኣላ።”
^ ወይ፡ “ኽራር።”
^ ወይ፡ “ከዚመልካ።”
