መዝሙር 86:1-17
ጸሎት ዳዊት።
86 ኦ የሆዋ፡ ውጹዕን ድኻን እየ እሞ፡እዝንኻ ኣድንን፡* መልሰለይ እውን።+
2 እሙን እየ እሞ፡ ንህይወተይ* ሓልዋ።+
ኣምላኸይ ኢኻ እሞ፡ነቲ ብኣኻ ዚእመን* ጊልያኻ ኣድሕኖ።+
3 ምሉእ መዓልቲ እጽውዓካ እየ እሞ፡+ኦ የሆዋ፡ ሞገስ ኣርእየኒ።+
4 ኦ የሆዋ፡ ናባኻ እየ ዘብል* እሞ፡ንጊልያኻ ኣሐጕሶ።*
5 ኦ የሆዋ፡ ንስኻስ ሕያዋይን*+ ንይቕረታ ድልውን ኢኻ፣+ንዅሎም እቶም ዚጽውዑኻ፡ ኣብዚሕካ ብተኣማንነት ተፍቅሮም ኢኻ።+
6 ኦ የሆዋ፡ ጸሎተይ ስማዕ፣ናብ ልማኖይ ኣቕልብ።+
7 ንስኻ ኽትምልሰለይ ኢኻ እሞ፡+ብመዓልቲ ጭንቀይ ክጽውዓካ እየ።+
8 ኦ የሆዋ፡ ካብ ኣማልኽቲ ኸማኻ ዝበለ የልቦን፣+ከም ግብርታትካ ዝበለ እውን የልቦን።+
9 ኦ የሆዋ፡ ኵሎም እቶም ዝገበርካዮም ኣህዛብ ኪመጹ፡ኣብ ቅድሜኻ ድማ ኪሰግዱ፡+ንስምካ እውን ኬኽብርዎ እዮም።+
10 ንስኻስ ዓብይን ዜደንቕ ነገራት እትገብርን ኢኻ፣+ንስኻ በይንኻ ኣምላኽ ኢኻ።+
11 ኦ የሆዋ፡ ብዛዕባ መገድኻ ምሃረኒ።+
ብሓቅኻ ኽመላለስ እየ።+
ስምካ ኽፈርህሲ፡ ንልበይ ሓደ ግበረለይ።*+
12 ኦ የሆዋ ኣምላኸይ፡ ብዅሉ ልበይ እውድሰካ ኣለኹ፣+ንዘለኣለም ከኣ ንስምካ ከኽብሮ እየ።
13 እቲ ብተኣማንነት እተርእየኒ ፍቕርኻስ ዓብዪ እዩ፣ንህይወተይ* ድማ ካብ መዓሙቝ መቓብር* ኣድሒንካያ ኢኻ።+
14 ኦ ኣምላኽ፡ ተዳፈርቲ ተንሲኦምኒ፣+ጭፍራ ጨካናት ድማ ንህይወተይ* ይደልይዋ ኣለዉ፣ግድኻ እውን የብሎምን።*+
15 ኦ የሆዋ፡ ንስኻ ግና መሓርን ርሕሩሕን* ኣምላኽ፡ንቝጥዓ ደንጓይን ብዓል ብዙሕ ብተኣማንነት ዚርአ ፍቕርን ተኣማንነትን* ኢኻ።+
16 ናባይ ኣብል እሞ ሞገስካ ኣርእየኒ።+
ንጊልያኻ ብርታዐኻ ሃቦ፣+ንወዲ ግዝእትኻ ድማ ኣድሕኖ።
17 ኦ የሆዋ፡ ረዳእየይን መጸናንዕየይን ኢኻ እሞ፡እቶም ዚጸልኡኒ ርእዮም ኪሓፍሩስ፡ምልክት* ሕያውነትካ* ኣርእየኒ።
እግረ ጽሑፍ
^ ወይ፡ “ደኒንካ ስማዕ።”
^ ወይ፡ “ንነፍሰይ።”
^ ወይ፡ “ዚውከል።”
^ ወይ፡ “ነፍሰይ ናባኻ እየ ዘልዕል።”
^ ወይ፡ “ንነፍሲ ጊልያኻ ኣሐጕሳ።”
^ ወይ፡ “ሰናይን።”
^ ወይ፡ “ዘይተኸፋፈለ ልቢ ሃበኒ።”
^ ወይ፡ “ንነፍሰይ።”
^ ወይ፡ “ንዓኻ እውን ኣብ ቅድሚኦም ኣይገበሩኻን።”
^ ወይ፡ “ንነፍሰይ።”
^ ወይ፡ “ጸጋውን።”
^ ወይ፡ “ሓቅን።”
^ ወይ፡ “መርትዖ።”
^ ወይ፡ “ሰናይካ።”
