ኣብ ዓለም ዘለዉ ብዙሓት ሰባት፡ ፍሉይ መሰል ኪውሃቦም፡ ሓለፋ ኺግበረሎም፡ ወይ ፍሉይ ኣተሓሕዛ ኺግበረሎም ከም ዚደልዩስ ኣስተብሂልካዶ፧ ብዙሕ ነገር ረኺቦም ኬብቅዑ፡ ዝያዳ ኸም ዚግብኦም እዮም ዚኣምኑ። እዚ ኣተሓሳስባ እዚ፡ ኣብቲ መለለዪ ናይ ዳሕሮት መዓልትታት ዝዀነ ፍትወት ርእስን ዘይምምስጋንን ዝሰረተ እዩ።—2 ጢሞ. 3:2።

ካብ ቀደም ኣትሒዞም ፈተውቲ ርእሶም ዝዀኑ ሰባት ነይሮም እዮም። ንኣብነት፡ ኣዳምን ሄዋንን ባዕሎም ጽቡቕን ክፉእን ኪመርጹ ወሰኑ፣ እዚ ድማ ሕማቕ ሳዕቤን ኣስዓበ። ድሕሪ ዘመናት ከኣ፡ ዑዝያ ንጉስ ይሁዳ ኣብ ቤተ መቕደስ ኣትዩ ዕጣን ኪዓጥን መሰል ዘለዎ ዀይኑ ተሰምዖ፣ በዚ ኸምዚ ግና ዓብዪ ጌጋ እዩ ፈጺሙ። (2 ዜና 26:18, 19) ፈሪሳውያንን ሰዱቃውያንን እውን ዘርኢ ኣብርሃም ስለ ዝዀኑ ጥራይ ፍሉይ ሞገስ ኣምላኽ ከም ዚግብኦም ኣመኑ።—ማቴ. 3:9።

ፈተውቲ ርእሶም ብዝዀኑን ርእሰ ውዳሰ ብዚደልዩን ሰባት ኢና ተኸቢብና ዘለና፣ ኣረኣእያኦም ከኣ ኪጸልወና ይኽእል እዩ። (ገላ. 5:26) ፍሉይ መሰል ኪህልወና ኸም ዘለዎ፡ ወይ ፍሉይ ኣተሓሕዛ ኺግበረልና ኸም ዚግባእ ምሕሳብ ክንጅምር ንኽእል ኢና። እሞ ደኣ ኸመይ ጌርና ኢና ነዚ ኣተሓሳስባ እዚ ኸነወግዶ እንኽእል፧ ቅድም ቀዳድም፡ ከም ናይ የሆዋ ዓይነት ኣረኣእያ ኽንሕዝ ኣሎና። ኣብዚ መዳይ ድማ፡ ክልተ ስርዓታት መጽሓፍ ቅዱስ ኪሕግዘና ይኽእል እዩ።

 የሆዋ እንታይ ከም ዚግብኣና ይውስን። ገለ ኣብነታት እስከ ንርአ፦

• ኣብ ስድራ ቤት፡ ሰብኣይ ካብ ሰበይቱ ኣኽብሮት ይደሊ እዩ፣ ሰበይቲ ድማ ካብ ሰብኣያ ፍቕሪ ትደሊ እያ። (ኤፌ. 5:33) ኣብ መንጎ ኣንጻር ጾታ ዚህሉ ዓይነት ፍቕሪ፡ ኣብ ሰብ ሓዳር ጥራይ እዩ ኺሕጸር ዚግባእ። (1 ቈረ. 7:3) ወለዲ ኻብ ውሉዳቶም ተኣዛዝነት ይጽበዩ እዮም፣ ውሉዳት ድማ ካብ ወለዶም እኹል ፍቕርን ደገፍን ኪረኽቡ ይግባእ።—2 ቈረ. 12:14፣ ኤፌ. 6:2።

• ኣብ ጉባኤ፡ እቶም ብትግሃት ዚሰርሑ ሽማግለታት ኣኽብሮት ይግብኦም እዩ። (1 ተሰ. 5:12) ኰይኑ ግና፡ ኣብ ልዕሊ ኣሕዋቶምን ኣሓቶምን ኪጕይተቱ መሰል የብሎምን።—1 ጴጥ. 5:2, 3።

• ኣምላኽ ንሰብኣውያን መንግስትታት ካብ ተገዛእቶም ግብሪ ኺጠልቡን ክብሪ ኺረኽቡን መሰል ሂብዎም እዩ።—ሮሜ 13:1, 6, 7።

የሆዋ ብፍቕሪ ተደሪኹ ኻብቲ ዚግብኣና ንላዕሊ ይህበና እዩ። ሓጢኣት ስለ ዝወረስና፡ ሞት ጥራይ እዩ ዚግብኣና ነይሩ። (ሮሜ 6:23) ኰይኑ ግና፡ የሆዋ በቲ ብተኣማንነት ዜርእየና ፍቕሩ ተደሪኹ ብዙሕ በረኸት ሂቡና ኣሎ። (መዝ. 103:10, 11) ኵሉ እቲ ኻብኡ እንረኽቦ በረኸት ወይ ፍሉይ መሰል ስለ ዚግብኣና ዘይኰነስ፡ ብጸጋኡ ኢና እንረኽቦ።—ሮሜ 12:6-8፣ ኤፌ. 2:8።

ኣረኣእያ ዓለም ከይጸልወካ ተጠንቀቕ። ከይተፈለጠና ሓለፋ ኻልኦት ከም ዚግብኣና ጌርና ኽንሓስብ ንኽእል ኢና። የሱስ ብምሳሌ እቶም ሓሓደ ዲናር ዚኽፈሉ ሰብ ውዕለት ኣቢሉ፡ እዚ ኣተሓሳስባ እዚ ኸመይ ገይሩ ብቐሊሉ ኺምዕብል ከም ዚኽእል ኣርእዩ እዩ። ገሊኦም ካብቶም ሰብ ውዕለት ኣንጊሆም ስራሕ ጀመሩ፣ ኣብ ትሕቲ ብርትዕቲ ጸሓይ ድማ ኪዓይዩ ወዓሉ። ገሊኦም ግና፡ ሓንቲ ሰዓት ጥራይ ሰርሑ። እቶም ቀዳሞት ጕጅለ ኸኣ ብዙሕ ስለ ዝዓየዩ፡ ዝያዳ ዓስቢ ዚረኽቡ መሰሎም። (ማቴ. 20:1-16) የሱስ በዛ ምሳሌ እዚኣ ኣቢሉ፡ ሰዓብቱ በቲ ኻብ ኣምላኽ ዚውሃቦም ዘበለ ኺዓግቡ ኸም ዘለዎም ሓበረ።

ኣመስጋኒ ደኣ ኹን እምበር፡ ይግብኣኒ በሃሊ ኣይትኹን። (1 ተሰ. 5:18) ንሃዋርያ ጳውሎስ ምሰሎ፣ ንሱ ስጋዊ ደገፍ ንምርካብ መሰል እናሃለዎ ኽነሱ፡ ካብቶም ኣብ ቈረንቶስ ዝነበሩ ኣሕዋቱ ኸምኡ ኣይሓተተን። (1 ቈረ. 9:11-14) ንዅሉ እቲ ዚውሃበና በረኸት ከነማስወሉ ደኣ እዩ ዘሎና እምበር፡ ‘ይግብኣኒ እዩ’ ኢልና ኽንሓስብ የብልናን።

 ትሕትና ኣማዕብል። ሓደ ሰብ ካብቲ ዚግብኦ ኣዕዚዙ ዚሓስብ እንተ ዀይኑ፡ ካብቲ ዘለዎ ንላዕሊ ኸም ዚግብኦ ኺመስሎ ይኽእል እዩ። ትሕትና ነዚ መርዛም ኣተሓሳስባ እዚ ትፍውሰልና እያ።

ነብዪ ዳንኤል ሰናይ ኣብነት ትሕትና ይዀነና እዩ። እተወልደሉ ቤተ ሰብን ጽቡቕ ትርኢቱን ኣእምሮኣዊ ብልሓቱን ካልእ ክእለታቱን፡ ፍሉይ ኣተሓሕዛ ወይ ፍሉይ መሰል ከም ዚግብኦ ገይሩ ኸም ዚሓስብ ኪገብሮ ምኸኣለ ነይሩ። (ዳን. 1:3, 4, 19, 20) ይኹን እምበር፡ ዳንኤል ብትሕትና ተመላለሰ፣ ሳላ እዛ ባህርይ እዚኣ ድማ ኣብ ቅድሚ የሆዋ ፍቱው ኰነ።—ዳን. 2:30፣ 10:11, 12።

እምበኣር፡ ነቲ ሎሚ ኣብዛ ዓለም እዚኣ ሰፊኑ ዘሎ ኣብ ፍትወት ርእስን ኣብ ውዳሰ ርእስን ዘተኰረ መንፈስ ንንጸጎ። ኣብ ክንዳኡስ፡ በቲ የሆዋ ብጸጋኡ ዚህበና በረኸት ንተሓጐስ።