እዛ እተመራምር ጥቕሲ እዚኣ ኸምዚ ትብል፦ “ኣብ ኣውራጃኻ ጭቈና ድኻ ዀነ ጥሕሰት ፍትሕን ጽድቅን እንተ ርኢኻ፡ ብዛዕባ እቲ ነገር ኣይትገረም። እቲ ላዕለዋይ ብዓል ስልጣንሲ፡ ካብኡ ብዚልዕል ይጥመት እዩ፣ ገና ኻባታቶም ዝለዓሉ እውን ካልኦት ኣለዉ።”—መክ. 5:8።

ብሰብኣዊ ኣረኣእያ፡ እዚ ቓል እዚ ነቶም መንግስታዊ ስልጣን ዘለዎም ሰባት ጽቡቕ ገይሩ ይገልጾም እዩ። ክንዮኡ እንተ ሓሲብና ግና፡ ብዛዕባ የሆዋ ሓደ ሓቂ የመሓላልፈልና እዩ፣ እዚ ሓቂ እዚ ድማ የጸናንዓናን የተባብዓናን እዩ።

መክብብ 5:8 ብዛዕባ ሓደ ንድኻ ዚጭቍንን ፍትሒ ዚኸልእን ገዛኢ ትገልጽ እያ። እቲ ገዛኢ እቲ፡ ካብኡ ዝለዓለ መንግስታዊ ስልጣን ዘለዎ ሰብ ይዕዘቦ ኸም ዘሎ ኺዝክር ይግባእ። ካብቲ ዝለዓለ ብዓል ስልጣን እቲ ዝለዓለ ስልጣን ዘለዎም ካልኦት እውን ኪህልዉ ይኽእሉ እዮም። እቲ ዜሕዝን ግና፡ ኣብ ሰብኣውያን መንግስትታት፡ ኵሎም እዞም ገዛእቲ ብልሹዋት ኪዀኑ ይኽእሉ እዮም። እቶም ተራ ህዝቢ ኸኣ ኣብ እተፈላለየ ጽፍሒ ኣደዳ ዘይፍትሓዊ ተግባር ይዀኑ እዮም።

ኰይኑ ግና፡ ኵነታት ተስፋ ኣልቦ እኳ እንተ መሰለ፡ የሆዋ ‘ንላዕለዎት ሰበ ስልጣን ኸም ዚጥምቶም’ ምፍላጥና የጸናንዓና እዩ። ናብ ኣምላኽ ክንጠርዕን ጾርና ናብኡ ኽንድርብዮን ንኽእል ኢና። (መዝ. 55:22፣ ፊል. 4:6, 7) ከመይሲ፡ ነዚ ንፈልጥ ኢና፦ “ኣዒንቲ የሆዋስ፡ ስለ እቶም ልቦም ምሉእ ብምሉእ ናብኡ ዝዀነ ብርታዐኡ ምእንቲ ኼርኢ፡ ኣብ ብዘላ ምድሪ እየን ዚዞራ።”—2 ዜና 16:9።

ስለዚ፡ መክብብ 5:8 ነቲ ኣብ ሰበ ስልጣን መንግስቲ ዘሎ ናይ ሓቂ ዅነታት፡ ማለት ወትሩ ንሰበ ስልጣን ላዕለዋይ ብዓል ስልጣን ከም ዘለዎም ተዘኻኽረና እያ። ልዕሊ ዅሉ ግና፡ የሆዋ ኻብ ኵሉ ዝለዓለ ስልጣን ከም ዘለዎ ኽንሓስብ ተኽእለና እያ። ሕጂ ንሱ በቲ ንጉስ መንግስቲ ኣምላኽ ዝዀነ ወዱ የሱስ ክርስቶስ ኣቢሉ ይገዝእ ኣሎ። እቲ ንዅሉ ዚዕዘብ ኵሉ ዚኽእል ኣምላኽ ምሉእ ብምሉእ ፍትሓውን ቅኑዕን እዩ፣ ወዱ እውን ከምኡ እዩ።