ሓላፍነት ዚስምዖም ሰባት ቁም ነገረኛታትን እሙናትን እዮም። እተዋህቦም ዕዮ ብግዜኡ ይውድኡ እዮም።

ቈልዑ ዓቕሞም ድሩት ክነሱ፡ ሓላፍነት ዚስምዖም ንምዃን ግና ኪምሃሩ ይኽእሉ እዮም። ፓረንቲንግ ዊዝኣውት ቦርደርስ ዘርእስታ መጽሓፍ ከም እትገልጾ፡ ቈልዓ ዓመትን ሰለስተ ወርሕን ምስ ገበረ፡ ወለዱ ዚብልዎ ኺገብር ይጅምር፣ ዓመትን ሽዱሽተ ወርሕን ምስ ገበረ ኸኣ ወለዱ ዚገብርዎ ዘበለ ኺገብር ይደሊ። እታ መጽሓፍ ኣስዕብ ኣቢላ ኸምዚ ትብል፦ “ኣብ ሓያሎ ባህልታት ወለዲ ነቲ ደቆም ንምሕጋዝ ዘለዎም ክእለት፡ ምናዳ ኻብ ደቂ ሓሙሽተ ኽሳዕ ደቂ ሸውዓተ ኣብ ዚዀኑሉ እዋን ይስሕልዎም እዮም፣ ኣብዚ ዕድመ እዚ ዚርከቡ ቘልዑ ድማ ኣብ ብዙሕ ዕዮታት ገዛ ብብቕዓት ይሕግዙ እዮም።”

ኣብ ገሊኡ ቦታታት፡ ብዙሓት መንእሰያት ካብ ቤቶም ወጺኦም ብርእሶም ኪነብሩ ይፍትኑ እሞ ኸይሰለጦም ምስ ተረፈ ናብ ኣዲኦምን ኣቦኦምን ይምለሱ ኣለዉ። ኣብ ገሊኡ መዳያት፡ እቶም መንእሰያት ብኸመይ ገንዘብ ከም ዜካውኑ፡ ቤት ከም ዜመሓድሩ፡ ወይ መዓልታዊ ሓላፍነታቶም ከም ዚፍጽሙ ስለ ዘይተማህሩ እዩ ኸምኡ ዚኸውን።

ስለዚ፡ ውሉዳት ዓብዮም ሓላፍነታት ምእንቲ ኺስከሙ፡ ካብ ሕጂ እንተ ኣሰልጠንካዮም ይሓይሽ። ሃው ቱ ረይዝ ኣን ኣዳልት ዘርእስታ መጽሓፍ፡ “ደቂ ዓሰርተው ሸሞንተ ኽሳዕ ዚዀኑ ጽግዕተኛ ጌርካ ኽትሕዞም፡ ድሕሪኡ ናብ ናይ ሓቂ ዓለም ክትጕሕፎም ኣይትደልን ኢኻ” ትብል።

ዕዮ ገዛ ሃቦም።

ስርዓት መጽሓፍ ቅዱስ፦ “ኣብ ኵሉ ዓይነት ከቢድ ዕዮ ጥቕሚ ኣሎ።”—ምሳሌ 14:23።

ቈልዑ ምስ ወለዶም ኰይኖም ኪዓይዩ ይደልዩ እዮም። ስለዚ፡ ኣብ ቤት ዕዮታት ብምሃብ፡ ነዚ ተፈጥሮኣዊ ዝንባለኦም ክትጥቀመሉ ትኽእል ኢኻ።

ገሊኦም ወለዲ ኸምኡ ኺገብሩ ኣይደልዩን እዮም። ትምህርቲ ዝኣተዉ ደቆም መዓልቲ መዓልቲ ናይ ትምህርቶም ብዙሕ ዕዮ ቤት ስለ ዘለዎም፡ ከይነኽብደሎም ኢሎም ይሓስቡ እዮም።

ይኹን እምበር፡ ኣብ ቤት ዚውሃብ ዕዮ ንቘልዑ ዕዮ ተቐቢልካ ምዝዛሙ ስለ ዚምህሮም፡ ኣብ ቤቶም ዚዓይዩ ቘልዑ ኣብ ትምህርቶም ዕዉታት ንምዃን ዝያዳ ኣጋጣሚ ኣለዎም። ፓረንቲንግ ዊዝኣውት ቦርደርስ ዘርእስታ መጽሓፍ ከምዚ ትብል፦ “ደቅና ብንእስነቶም ተሳትፎ ኺገብሩ ዘለዎም ህንጥዮት ዕሽሽ እንተ ኢልናዮ፡ ኣበርክቶ ምግባር ኣገዳሲ ኣይኰነን ዚብል ሓሳብ እዮም ዜሕድሩ። . . . ካልእ ሰብ ኪገብረሎም እውን ኪጽበዩ ይጅምሩ።”

እዚ ሓሳብ እዚ ኸም ዚሕብሮ፡ ኣብ ገዛ ምዕያይ ንቘልዑ ኣህለኽቲ ዘይኰነስ ኣበርከትቲ፡ ወሰድቲ ዘይኰነስ ወሃብቲ ይገብሮም እዩ። ቘልዑ ኣብ ቤት ዚዓይዩ እንተ ዀይኖም፡ ኣብ ስድራ ቤቶም ኣኽቢርካ ዚርአ ቦታ ኸም ዘለዎም ይግንዘቡ እዮም፣ ነቲ ዕዮ እውን ሓላፍነት ይስምዖም እዩ።

 ውሉዳትካ ንጌጋታቶም ሓላፍነት ኪወስዱ ሓግዞም።

ስርዓት መጽሓፍ ቅዱስ፦ “ኣብ መጻኢኻ ጥበበኛ ምእንቲ ኽትከውንሲ፡ ምኽሪ ስማዕ፡ ተግሳጽ እውን ተቐበል።”—ምሳሌ 19:20።

ውሉድካ ኺጋገ ኸሎ፡—ንኣብነት፡ ንብረት ካልእ ሰብ እንተ ኣባላሽዩ፡— ኣይትሸፍነሉ። ቈልዑ ንዚመጾም ሳዕቤናት ኪቕበሉ ይኽእሉ እዮም፣ ኣብዚ መዳይ እዚ፡ ይቕረታ ኺሓትት፡ ምናልባት እውን ኪኽሕስ የድልዮ ይኸውን።

ቈልዑ ብጌጋታቶምን ብውድቀታቶምን ሓላፍነት ዚስከሙ እንተ ዀይኖም፡ ከምዚ ዚስዕብ ብምግባር ትምህርቲ ይዀኖም እዩ፦

• ብቕንዕና ጌጋታቶም ኪእመኑ

• ጌጋታቶም ንኻልኦት ከይልጥፉ

• መመኽነይታ ኸየቕርቡ

• ኣድላዪ ኪኸውን ከሎ፡ ይቕረታ ኺሓትቱ