ከም ጓሂ፡ ሕርቃን፡ ወይ ቅሬታ ዝኣመሰለ ኣሉታዊ ስምዒታት ይቈጻጸረካ ድዩ፧ ከምኡ ዚስምዓካ እንተ ዀይኑ፡ ንግዜኻ ወይ ንሓይልኻ ስለ ዚጽንቅቖ ነቲ ብሓቂ ዜገድስካ ነገራት ንኸይትገብር ዕንቅፋት ኪዀነካ ይኽእል እዩ፧ እሞኸ፡ እንታይ ኢኻ ኽትገብር እትኽእል፧ *

ንጉስ ዳዊት እተፈላለየ ዓይነት ስምዒታት፡ ከም ጭንቀትን ጓህን እውን ከይተረፈ፡ ኣሕሊፉ እዩ። ንጸገማቱ ተጻዊሩ ኺነብር ዝሓገዞ እንታይ እዩ፧ ዳዊት ንነገራት ኣብ ኢድ የሆዋ እዩ ዚገድፎ ነይሩ። (1 ሳሙኤል 24:12, 15) ንስምዒታቱ እውን ከይተረፈ ይጽሕፎ ነይሩ እዩ። ናይ እምነት ሰብ ስለ ዝነበረ ኸኣ፡ ደጋጊሙ ይጽሊ ነበረ። *

ኣብታ ኣብ መእተዊ ዘላ ዓንቀጽ ከም እተጠቕሰ፡ ግሪጎሪ ብጭንቀት ይሳቐ እዩ። “ጭንቀተይ ካብ መጠን ንላዕሊ እዩ ነይሩ፣ ክቈጻጸሮ ድማ ኣይክእልን እየ ነይረ” ኸኣ በለ። ጸኒሑ ደኣ እሞ ብኸመይ እዩ ኺቈጻጸሮ ኽኢሉ፧ ንሱ ኸምዚ ብምባል ይገልጽ፦ “ሚዛነይ ምእንቲ ኽሕሉ፡ ነቲ ብዓልቲ ቤተይን ፈተውተይን ዚገብሩለይ ዝነበሩ ደገፍ ተቐበልክዎ። ናብ ሓኪም ብምኻድ ከኣ ብዛዕባ ዅነታተይ ተወሳኺ ፍልጠት ኣጥረኹ። ኣብ ኣነባብራይ ለውጢ ምስ ገበርኩ፡ ኵነታተይ ንዓይ ኣብ ክንዲ ዚቈጻጸረኒ፡ ኣነ ንዅነታተይ ክቈጻጸሮ ኸም ዝኸኣልኩ፡ ኪስምዓኒ ጀመረ። ኣብዚ ግዜ እዚ እውን እንተ ዀነ ኽጭነቕ ከለኹ፡ ንጭንቀተይ እንታይ ከም ዜለዓዕሎ ይርድኣኒ እዩ፣ ብኸመይ ክቈጻጸሮ ኸም ዚኽእል ከኣ እፈልጥ እየ።”

ኣሉታዊ ስምዒት ንህይወትካ ይቈጻጸራ እንተ ኣልዩ፡ ነዚ ዚስዕብ ፈትኖ፦

• ንስምዒታትካ ኣብ ጽሑፍ ኣስፍሮ።

• ንመቕርብካ ወይ ንፈታዊኻ እንታይ ከም ዚስምዓካ ንገሮ።

• ንርእስኻ ኽትግስጻ ፈትን። ‘እዚ ኣሉታዊ ስምዒት እዚ ኺስምዓኒ፡ ብሓቂዶ ብቑዕ ምኽንያት ኣሎኒ እዩ፧’ ኢልካ ሕሰብ።

• ጭንቀትን ሕርቃንን ቅሬታን ሒዝካ ኣይትንበር። ንሓይልኻ ዝያዳ ሃናጺ ኣብ ዝዀነ ነገራት ከተውዕሎ ጽዓር። *

ቀንዲ ነጥቢ፦ መብዛሕትኡ ግዜ፡ ኣሉታዊ ስምዒት ዚመጸና ብሰንኪ ዅነታትና ዘይኰነስ፡ ብሰንኪ እቲ ብዛዕባ ዅነታትና ዘሎና ኣመለኻኽታ ኪኸውን ይኽእል እዩ።