ዘይሃስስ ጦብላሕታ
ዘይሃስስ ጦብላሕታ
ኣብ ነፍሲ ወከፍ ዓመት ናይ የሆዋ መሰኻኽር ኣብቲ ዝነብርሉ ሃገር ክርስትያናዊ ኣሰምብሊታትን ዓበይቲ ኣኼባታትን ንምግባር ይተኣኻኸቡ ኢዮም። ብመንፈሳዊ ሃናጺ ዝዀነ መምርሒ ንምርካብን ሕውነት ንምስትምቓርን ኢዮም ከምዚ ዝገብሩ። እንተዀነ ግን ኣብቲ ኣኼባታቶም ዝርአ ኻልእ ነገራት እውን ናብቲ ኣኼባ ንዝመጹ ሓደስቲ ሰባት ዘይሃስስ ጦብላሕታ ኽገድፈሎም ይኽእል ኢዩ።
ንኣብነት ኣብ ሓምለ 1999 ኣብ ሞዛምቢክ ዝርከቡ ብኣሽሓት ዝቝጸሩ ናይ የሆዋ መሰኻኽር ንሰለስተ መዓልቲ ዝጸንሐ “ናይ ኣምላኽ ትንቢታዊ ቃል” ዘርእስቱ ዝሃንጽ ኣውራጃዊ ኣኼባ ገበሩ። ካብቶም ተኣከብቲ ንመጀመርታ ግዜኦም ኣብ ዓቢ ኣኼባ እተኻፈሉ ብዙሓት ሰባት ነይሮምዎም። እዞም ሰባት እዚኣቶም በቲ ኻብ መድረኽ ዝሰምዕዎ ዝርርብ ጥራይ ዘይኰነስ በቲ ኣብኡ ዝረኣይዎ ነገራት እውን ተመሲጦም ኢዮም።
ኣብ ናይ ኣሰምብሊ ኣደራሽ ማፑቶ እተኻፈለት ሓንቲ ሰበይቲ ኸምዚ በለት:- “ኣብ ህይወተይ ከምዚ ዝኣመሰለ ባህ ዘብል ቦታ ርእየ ኣይፈልጥን! እቲ ዓይኒ ምድሪ ሳሙናን መስትያትን ኣለዎ: ጽሩይ ከኣ ኢዩ። ዝበኣሱ ቘልዑ ዘይብሉ ሰላም ዝሰፈኖ ሃዋሁ ኢዩ ነይሩ። ምድፍፋእ እውን ኣይነበረን! ሕጉሳት መንእሰያት ዘተባብዕ ዕላል ከዕልሉ ሰሚዐ ኢየ። ኵሉ ሰብ ብግቡእ ተኸዲኑ ብምምጽኡ እውን ገሪሙኒ ኢዩ። ኣብ ዝቕጽል እዋን: ንደቀይ ሒዘዮም ክመጽእ ኢየ: ንበዓል ቤተይ ድማ ኣብ ከምዚ ዝኣመሰለ ዓቢ ኣኼባ ኽንካፈል ከም ዘሎና ኸእምኖ ኢየ።”
እወ: እቲ ናይ የሆዋ መሰኻኽር ዘርእይዎ ቕንዕና: ንጽህና: ከምኡውን ጽሬት ሰባት የስተውዕልሉ ኢዮም። ንናይ የሆዋ መሰኻኽር ፍሉያት ዝገብሮም ግን እንታይ ኢዩ፧ ነቲ ኻብ መጽሓፍ ቅዱስ ዝማሃርዎ ነገራት ኣብ ግብሪ ንምውዓል ካብ ልቦም ስለ ዝጽዕሩ ኢዩ። ኣብዚ ዓመት እዚ ኣብ ዓድኻ ኣብ ዝግበር ዓቢ ኣኼባ ወይ ኣብቲ ኣብ ከባቢኻ እትርከብ ጉባኤ ዝግበር ሰሙናዊ ኣኼባታት ብምክፋል ንምንታይ ነዚ ብዓይንኻ ዘይትርእዮ፧
[ኣብ ገጽ 32 ዘሎ ስእሊ]
ዛምብያ
ኬንያ
ሞዛምቢክ