ሕቶታት ካብ ኣንበብቲ

 ካብ ወለዲ: ሓዲኦም ናይ የሆዋ ምስክር: እቲ ሓደ ኸኣ ካልእ እምነት ዝስዕብ ምስ ዝኸውን ንውሉዳት ብዛዕባ ምምሃር ዝመጸ እንታይ ቅዱስ ጽሑፋዊ መምርሒ ተዋሂቡ ኣሎ፧

ናይ መርዓ ብጻዩ ናይ የሆዋ ምስክር ዘይኰነ ወላዲ ብዛዕባ ንውላዱ ምምሃር ዝምልከት ክልተ መሰረታዊ ቅዱስ ጽሑፋዊ ስርዓታት መምርሒ ክዀኖ ይኽእል ኢዩ። እቲ ሓደ “ካብ ንሰብሲ ንኣምላኽ ምእዛዝ እዩ ዚግባእ” ዝብል ኢዩ። (ግብሪ ሃዋርያት 5:29) እቲ ኻልኣይ ድማ “ከምቲ ክርስቶስ ርእሲ ማሕበሩ ዝዀነ: . . . ሰብኣይ ከኣ ርእሲ ሰበይቱ እዩ” ዝብል ኢዩ። (ኤፌሶን 5:23) እዚ ኻልኣይ ስርዓት ነተን ሰብኡተን ናይ የሆዋ መሰኻኽር ዝዀኑ ኣንስቲ ጥራይ ዘይኰነስ: ነተን ናይ የሆዋ መሰኻኽር ዘይኰኑ ሰብኡት ዘለዉወን ኣንስቲ እውን ዝምልከት ኢዩ። (1 ጴጥሮስ 3:⁠1) ሓደ ናይ የሆዋ ምስክር ወላዲ (ወላዲት) ንደቁ ኽምህር ከሎ ነዚ መሰረታዊ ስርዓታት እዚ ኸመይ ገይሩ ብሚዛናዊ መገዲ ኣብ ግብሪ ኸውዕሎ ይኽእል፧

እቲ ሰብኣይ ናይ የሆዋ ምስክር እንተደኣ ዀይኑ: ንስድራ​ቤቱ ብመንፈስ ዀነ ብስጋ ናይ ምሕላይ ሓላፍነት ኣለዎ። (1 ጢሞቴዎስ 5:⁠8) እታ ዘይኣማኒት ኣደ ምስቶም ደቃ ዝያዳ ግዜ እተሕልፍ እኳ እንተዀነት: እቲ ናይ የሆዋ ምስክር ኣቦ ግን ንደቁ ኣብ ቤቱ መንፈሳዊ ስልጠና ብምሃብ ከምኡውን ናብቲ ስነ⁠-​ምግባራዊ ትምህርትን ጽቡቕ ዕርክነትን ዝርከቦ ክርስትያናዊ ኣኼባታት ብምውሳድ ዘድልዮም ትምህርቲ ኽህቦም ኣለዎ።

እታ ዘይኣማኒት ሰበይቱ ናብቲ እተምልኸሉ ቦታ ኽወስዶም ኣሎኒ ወይ እምነተይ ክምህሮም ኣሎኒ እንተ በለትከ፧ ሕጊ ናይታ ሃገር ከምዚ ኽትገብር ይፈቕደላ ይኸውን። እቶም ቈልዑ ነቲ እተምልኾ ኸምልኹ ወይ ከየምልኹ ዝገብርዎ ውሳነ ብዓቢኡ ኣብቲ ናይቲ ኣቦ መንፈሳዊ ኣመሃህራ ኢዩ ዝምርኰስ። እናዓበዩ ምስ ከዱ ኸኣ ኣቦኦም ዝሃቦም መንፈሳዊ ትምህርቲ ነቲ ኣብ ቃል ኣምላኽ ዘሎ ሓቂ ንኽስዕቡ ዝሕግዞም ክኸውን ይግባእ። እቲ ኣማኒ ሰብኣይ: ውሉዳቱ ኣብ ሓቂ ጸኒዖም ደው ክብሉ ኽርእዮም ከሎስ ክሳዕ ክንደይ ኰን ኢዩ ዝሕጐስ!

በቲ ሓደ ሸነኽ ከኣ እታ ኣደ ጥራይ ናይ የሆዋ ምስክር እንተደኣ ዀይና: ነቲ ናይ ርእስነት ስርዓትን ነቲ ንዘለኣለማዊ ህይወት ደቃ ዝትንክፍ ጕዳይን ብሚዛናዊ መገዲ ኽትሕዞ ይግባእ። (1 ቈረንቶስ 11:⁠3) መብዛሕትኡ እዋን ንደቃ ስነ⁠-​ምግባራውን መንፈሳውን ትምህርቲ እንተ ሃበቶም እቲ ዘይኣማኒ ሰብኣይ ኣይቃወምን ኢዩ። ኣብቲ ህዝቢ የሆዋ ዝገብርዎ ኣኼባታት ከኣ ከምዚ ዝኣመሰለ ትምህርቲ ኢዩ ዝወሃብ። እታ ኣደ ንሰብኣያ: ደቆም ካብቲ ማሕበር የሆዋ እትህቦ ሃናጺ ትምህርቲ ብዙሕ ጥቕሚ ኸም ዝረኽቡ ኸተረድኦ ትኽእል ኢያ። ኣብዛ ብስነ⁠-​ምግባር እናተበላሸወት እትኸይድ ዘላ ዓለም ንነብር ስለ ዘሎና: ናይ መጽሓፍ ቅዱስ ስነ⁠-​ምግባራዊ ስርዓታት ኣብ ኣልባብ ደቃ ኸተስርጽ ከም ዘድሊ ብሜላ ኸተጕልሓሉ ትኽእል ኢያ።

ይኹን እምበር: እቲ ዘይኣማኒ ሰብኣይ ንደቁ ናብቲ ናይ ኣምልኾ ቦትኡ ብምውሳድን እምነቱ ድማ ብምምሃርን ሃይማኖቱ ኽስዕቡ ግዲ ይብል ይኸውን። ወይ ከኣ እቲ ኣቦ ንዅሉ ሃይማኖታት ዝጻረር ይኸውን እሞ ደቁ እውን ዝዀነ ይኹን ሃይማኖታዊ ትምህርቲ ኸይወሃቦም ይእዝዝ ይኸውን። ርእሲ ስድራ​ቤት ከም ምዃኑ መጠን: ነዚ ውሳነ እዚ ኣብ ምግባር ዝመጸ ብቐዳምነት ተሓታቲ ንሱ ኢዩ። a

እታ ኣማኒት ሰበይቲ ህይወታ ዝወፈየት ክርስትያን ከም ምዃና መጠን ንርእስነት ሰብኣያ እናኣኽበረት: ከምቲ ናይቶም “ንሕናስ ነቲ ዝርኤናዮን ዝሰማዕናዮን ምዝራቡ ኽንሐድግ ኣይኰነልናን እዩ” ዝበሉ ሃዋርያ ጴጥሮስን ዮሃንስን  ዝነበሮም ኣረኣእያ ኽህልዋ ይግባእ። (ግብሪ ሃዋርያት 4:⁠19, 20) ንመንፈሳዊ ዅነታት ደቃ ኻብ ዘለዋ ሓልዮት እተላዕለ: ስነ⁠-​ምግባራዊ መምርሒ ንኽትህቦም ኣጋጣሚታት ተናዲ ኢያ። ንኻልኦት ብዛዕባ ሓቂ ንምምሃር ሓላፍነት ኣለዋ: ደቃ ኸኣ ካብዚኣቶም ፈሊኻ ክርኣዩ የብሎምን። (ምሳሌ 1:⁠8፣ ማቴዎስ 28:⁠19, 20) ሓንቲ ናይ የሆዋ ምስክር ኣደ ኣብ ከምዚ ዝኣመሰለ መዋጥር እንተ ኣትያ ንደቃ ብኸመይ ክትምህሮም ትኽእል፧

ከም ኣብነት ነቲ ኣብ ህላወ ኣምላኽ ዘለዋ እምነት ክንወስዶ ንኽእል ኢና። እታ ናይ የሆዋ ምስክር ኣደ: በዓል ቤታ ስለ ዘይፈቅድ ብስሩዕ መገዲ ንደቃ መጽሓፍ ቅዱስ ኣይትምህሮምን ትኸውን። በዚ ምኽንያት እዚ ንደቃ ብዛዕባ የሆዋ ምንጋር ፈጺማ ትገድፎ ማለት ድዩ፧ ኣይፋልን። ዘረባኣን ተግባራታን ብዛዕባ ፈጣሪ ዘለዋ እምነት የንጸባርቕ ኢዩ። ደቃ ኣብዚ ጕዳይ እዚ ሕቶታት ከም ዝህልዎም ኣየጠራጥርን ኢዩ። በቲ ሃይማኖታዊ ናጽነታ ተጠቒማ ኣብ ፈጣሪ ዘለዋ እምነት ንኽትገልጸሎም ድሕር ክትብል የብላን። መጽሓፍ ቅዱስ ክትምህሮም ወይ ወትሩ ናብ ኣኼባታት ክትወስዶም እኳ እንተ ዘይከኣለት: ብዛዕባ የሆዋ ኣምላኽ ግን ፍልጠት ከተካፍሎም ትኽእል ኢያ።​—⁠ዘዳግም 6:⁠7

ሃዋርያ ጳውሎስ ብዛዕባ እቲ ሓደ/ሓንቲ ናይ የሆዋ ምስክር ምስ ዘይኣማኒት/ዘይኣማኒ ናይ መርዓ ብጻይ ክህልዎ ዘለዎ ርክብ ከምዚ ኢሉ ጸሓፈ:- “እቲ ዘይኣማኒ ሰብኣይ በታ ሰበይቱ ተቐዲሱ እዩ: እታ ዘይኣማኒት ሰበይቲውን በቲ ሓው ተቐዲሳ እያ እሞ: ከምኡ እንተ ዘይከውንሲ: ውሉድኩም ርኹሳት ምዀኑ ነይሮም: ሕጂ ግና ቅዱሳን እዮም።” (1 ቈረንቶስ 7:14) የሆዋ ብምኽንያት እቲ ኣማኒ ነቲ ሓዳር ቅዱስ ገይሩ ኢዩ ዝርእዮ: እቶም ውሉዳት እውን ኣብ ቅድሚ የሆዋ ቅዱሳት ኢዮም። እታ ናይ የሆዋ ምስክር ሰበይቲ: ደቃ ሓቂ ምእንቲ ኽርድኦም ንምሕጋዝ ዝከኣላ ዅሉ ኽትገብር ኣለዋ: ነቲ ናይ መወዳእታ ፍረ ግን ኣብ የሆዋ ኢያ እትገድፎ።

እቶም ውሉዳት እናዓበዩ ክኸዱ ኸለዉ: ኣብቲ ኻብ ወለዶም እተመሃርዎ ትምህርቲ ተመርኲሶም እንታይ ኣቕዋም ከም ዝወስዱ ይውስኑ ኢዮም። ምስቲ “እቲ ኻባይ ነቦኡን ነዲኡን ዜፍቅር ንኣይ ኣይበቅዕን እዩ” ዝብል ቃላት የሱስ ተሰማሚዖም ውሳነ ይገብሩ ይዀኑ። (ማቴዎስ 10:⁠37) “ኣቱም ውሉድ: . . . ንወለድኹም ብጐይታ ተአዘዝዎም” ዝብል ትእዛዝ እውን ተዋሂብዎም ኣሎ። (ኤፌሶን 6:⁠1) ብዙሓት መንእሰያት ካብ ወለዶም ምጽራር እናኣጋጠሞም ክነሱ: ካብቶም ናይ የሆዋ መሰኻኽር ዘይኰኑ ወለዶም ንላዕሊ ‘ንኣምላኽ ክእዘዙ’ ወሲኖም ኢዮም። እቲ ናይ የሆዋ ምስክር ወላዲ ደቁ ምጽራር እናኣጋጠሞም ከሎ ንየሆዋ ኸገልግሉ ኸም ዝወሰኑ ኽርኢ ኸሎስ ክሳዕ ክንደይ ኰን ኢዩ ዝሕጐስ!

[እግረ-ጽሑፍ]