ንተስፋ ምቝራጽ ብኸመይ ክትዋጽኣሉ ትኽእል፧

ተስፋ ዝቘረጽካ ዲኻ፧ ኣብዚ ዘየተኣማምንን ህውከት ዝመልኦን ግዜ ብዙሓት ሰባት ተስፋ ይቘርጹ። ገሊኣቶም ስራሕ ስለ ዘይብሎም: ገሊኣቶም ድማ ዘጋጠሞም ሓደጋ ብዜምጽኣሎም ሳዕቤን ተስፋ ይቘርጹ። ገሊኣቶም ከኣ ናይ ስድራቤት ጸገማት: ከቢድ ሕማም: ወይ ጽምዋ ስለ ዜጋጥሞም ዓቕሎም ይጸቦም።

ተስፋ ዝቘረጽካ እንተደኣ ዄንካ: ካበይ ኢኻ ሓገዝ ክትረክብ እትኽእል፧ ኣብ መላእ ዓለም ዚርከቡ ሚልዮናት ሰባት ነቲ ቓል ኣምላኽ ዝዀነ መጽሓፍ ቅዱስ ብምንባቦም ምጽንናዕ ረኺቦም እዮም። ንሳቶም በተን “ኣምላኽ: ኣቦ ጐይታና የሱስ ክርስቶስ: ኣቦ ምሕረትን ኣምላኽ ኵሉ ምጽንናዕን: ይባረኽ: . . . ብጸበባና ዘበለ ዜጸናንዓና ንሱ እዩ” ዚብላ ቓላት ሃዋርያ ጳውሎስ ይጸናንዑ እዮም። (2 ቈረንቶስ 1:3, 4) ንስኻኸ ነዚኣን ንኻልኦት ጥቕስታትን ንምንታይ ካብ መጽሓፍ ቅዱስካ ዘይተንብበን፧ ከምዚ ምግባር ‘ኬጸናንዓካን ኬበርተዓካን’ እዩ።—2 ተሰሎንቄ 2:17

ምስቶም ንየሆዋ ዜገልግሉ ብምሕባር እውን ንተስፋ ምቝራጽ ክንዋጽኣሉ ንኽእል ኢና። ምሳሌ 12:25 “እቲ ኣብ ልቢ ሰብ ዝሐደረ ጓሂ ንእኡ ይጸቕጦ: ሰናይ ቃል ግና ባህ የብሎ” ትብል። ኣብ ክርስትያናዊ ኣኼባታት ምስ እንእከብ “ንነፍሲ ጥዑምን ነዕጽምቲ ኸኣ ጥዕና” ዝዀነ “ሰናይ ቃል” ኢና እንሰምዕ። (ምሳሌ 16:24) ኣብ ኣደራሽ መንግስቲ ኣምላኽ ናይ የሆዋ መሰኻኽር ዚግበር ኣኼባ ተኣኪብካ: እቲ ኣኼባ ኽሳዕ ክንደይ ዜጸናንዕ ምዃኑ ንምንታይ ባዕልኻ ዘይትርኢ፧

ጸሎት ሓይሊ ስለ ዘለዎ: ምጽላይ እውን ሓገዝ ኪዀነካ እዩ። ናብራኻ ዜጨንቐካ እንተደኣ ዀይኑ: ናይ ውሽጢ ስምዒትካ ነቲ ‘ሰማዕ ጸሎት’ ንገሮ። (መዝሙር 65:2) እቲ ፈጣሪና ዝዀነ የሆዋ ኣምላኽ ካባና ንላዕሊ ገይሩ እዩ ዚርድኣና። ከም ዚሕግዘና ድማ ክንተኣማመን ንኽእል ኢና። ቃሉ “ጾርካ ናብ እግዚኣብሄር ደርብዮ: ንሱ ኺድግፈካ እዩ። ንጻድቕ ሰንከልከል ኪብል ከቶ ኣይሐድጎን” ኢሉ የተስፉ። (መዝሙር 55:22) እወ: “እቶም ንእግዚኣብሄር ዚጽበዩ ግና ሓይሎም ይሕደስ” እዩ።—ኢሳይያስ 40:31

የሆዋ ኣምላኽ ንተስፋ ምቝራጽ ንኽንዋጻኣሉ ዜድልየና ሓገዝ ኣዳልዩልና እዩ። እሞኸ ክትጥቀመሉ ዲኻ፧