ኣሞጽ ኣራይ ዳዕሮ ድዩ ነይሩ ወይስ ቀርጣፍ ዳዕሮ፧

ኣብ ታሽዓይ ዘመን ቅ.ክ. እቲ ኻህን ኣምልኾ ምራኽ ዝነበረ እኩይ ኣማስያ ንነብዪ ኣሞጽ ኣብ እስራኤል ምንባይ ንኼቋርጽ ኣዘዞ። ኣሞጽ ግን “ኣነስ ጓሳ ኣሓን ኣራይ [“ቀርጣፍ: NW] ዳዕሮን ነበርኩ . . . መጓሰ ኣባጊዕ ክኽብክብ ከሎኹ: እግዚኣብሄር ወሰደኒ: እግዚኣብሄርውን: ኪድ እሞ ንህዝበይ እስራኤል ተነበየሉ: በለኒ” ኢሉ ብምምላስ ተቓወሞ። (ኣሞጽ 7:14, 15) እወ: የሆዋ ንኣሞጽ ነብዪ ዀይኑ ኼገልግል ልኢኽዎም እዩ፣ ካብ ርእሱ ኣይኰነን ተበጊሱ። ኰይኑ ግን: ኣሞጽ “ቀርጣፍ” ዳዕሮ እየ ኺብል ከሎ እንታይ ማለቱ እዩ፧

እታ በዚ መገዲ እዚ እተተርጐመት ናይ እብራይስጢ ቓል ኣብ ትርጕም ሓዳስ ዓለም ሓንሳእ ጥራይ እያ እትርከብ። ኣብ ካልእ ትርጕማት መጽሓፍ ቅዱስ “ኣራይ:” “ሓረስታይ:” “ተኸናኻኒ:” “ኣብቋሊ:” ወይ “ሓላው” ዳዕሮ ተባሂላ ተተርጒማ ኣላ። ይኹን እምበር: እታ ኢኮኖሚክ ቦታኒ እትበሃል መጽሔት: እታ ቓል ነቲ ሓረስታይ ዳዕሮ ዚገብሮ ፍሉይ ተግባር ስለ እተመልክት: እቲ ቕኑዕ ትርጕማ “ወጋኢ” ኪኸውን ከም ዘለዎ ትሕብር።

ንፍረ ዳዕሮ ምቕርጣፍ ወይ ምውጋእ: ማለት ነቲ ፍረ ቝሩብ ምብሳዕ: ካብ ጥንቲ ኣትሒዙ ኣብ ግብጽን ቆጵሮስን ኣጸቢቕካ ይፍለጥ ነበረ። ሕጂ ኣብ ዘመናዊት እስራኤል ካልእ ዓይነት ዳዕሮ ተተኺሉ ብምህላዉ: ምውጋእ ወይ ምቕርጣፍ ኣይስርሓሉን እዩ። ይኹን እምበር: ኣሞጽ ኣብ ዝነበረሉ እዋን እቲ ሽዑ ኣብ እስራኤል ዚዓቢ ዝነበረ ዳዕሮ ኻብ ዘርኢ ግብጺ ዝመጸ ብምንባሩ: እስራኤላውያን ይቕርጥፉ ነበሩ።

ነቲ ፍረ ዳዕሮ ምውጋኡ ማይ ከም ዚስሕብ ዚገብሮ ምዃኑ ፍሉጥ እዩ። ብዘይካዚ: ኢተሊን ዚበሃል ጋዝ ብብዝሒ ኸም ዚፈሪ ብምግባር: ነቲ ፍረ ቐልጢፉ ኸም ዚበስል ይገብሮ፣ እዚ ድማ ዝዓበየን ዝመቀረን ፍረ የፍሪ። ብተወሳኺ: እቲ ፍረ ቐልጢፉ ስለ ዚበስል: እቶም ባልዕ ዝዀኑ ዕኮት ነቲ ፍረ ኣየበላሽውዎን።

ኣሞጽ ጓሳን ቀርጣፍ ዳዕሮን ብምንባሩ ኻብ ትሑት ደረጃ ዝመጸ እኳ እንተ ዀነ: ንጸላእቱ ግን ኣይፈርሆምን። ኣብ ክንዳኡ: ነቲ መልእኽቲ ፍርዲ የሆዋ ብትብዓት ኣብ ልዕሊ እስራኤል ኣወጀ። እዝስ ነዞም ሎሚ ብብዙሓት ዘይፍቶ መልእኽቲ ዚእውጁ ዘለዉ ኣገልገልቲ ኣምላኽ ከመይ ዝበለ ሰናይ ኣብነት ኰን እዩ!—ማቴዎስ 5:11, 12፣ 10:22