ሓድነት ዘለዋ ዓለም ክትህሉ ትኽእል ድያ፧

ዓለምና ኣብ ድርኵኺት ሰላም ድያ ዘላ ወይስ ኣብ ጠርዚ ጥፍኣት፧ ንኽልቲኡ ሓሳባት ዚድግፍ ዜእምን መርትዖታት ኪቐርብ ዚኽእል ይመስል።

በቲ ሓደ ሸነኽ: ገሊኦም መራሕቲ ዓለም: ዓለምለኻዊ ሰላም ኪብጻሕ ዚከኣል ሸቶ ኸም ዝዀነ ይዛረቡ እዮም፣ ከምዚ ዚብሉሉ ምኽንያት ከኣ እቲ ኻልእ ኣማራጺ ንኽትሓስቦ ዜፍርህ ስለ ዝዀነ እዩ። በቲ ኻልእ ሸነኽ: እዚ ዚስዕብ ሕቶታት የርዕዶም እዩ:- ኣየኖት ሃገራት እየን ጃምላዊ ጥፍኣት ኬምጽእ ዚኽእል ኣጽዋር ዘለወን፧ ኪጥቀማሉ ይኽእላ ድየን፧ እንተ ተጠቒመናሉ እንታይ እዩ ኪኸውን፧

ታሪኽ ከም ዚሕብሮ ኻብ ጥንቲ ኣትሒዙ ውድድርን ጽልእን ንሓድነት ዕንቅፋት ኪኸውን ጸኒሑ እዩ: ሃይማኖት ከኣ ነዚ ጸገም ኣብ ክንዲ ዚፈትሖ: ኬጋድዶ እዩ ጸኒሑ። ጄምስ ኤ. ሆት ዚበሃል ጋዜጠኛ: “ዝዀነ ይኹን ንሰባት ዚኸፋፍሎም ነገር ጽልኢ ኼመንጩ ይኽእል እዩ: ሃይማኖት ከኣ ሓደ ኻብቲ ኣዝዩ ዝሓየለ ኸፋፋሊ ነገር እዩ” ኢሉ ጸሓፈ። ብተወሳኺ ድማ: “ሃይማኖት ንሰባት ‘ሕያዎት’ ይገብሮም እዩ ዚብል ሓፈሻዊ እምነት እኳ እንተሎ: ንገሊኦም ሰባት ዜስካሕክሕ ተግባራት ከም ዚፍጽሙ ዝገብሮም ምዃኑ ርኡይ እዩ” በለ። ስቲቨን ዋይንበርግ ዚበሃል ደራሲ: ተመሳሳሊ ኣረኣእያ እዩ ዘለዎ። “ሕያዎት ሰባት እከይ ንኺገብሩ: ሃይማኖት የድልዮም” ኢሉ ጸሓፈ።

ዓለምና ሓድነት ኪህልዋ ዚኽእለሉ ገለ ተስፋ ኣሎዶ፧ እወ! ቀጺልና ኸም እንርእዮ ግን: ምንጪ ሓድነት ዓለም: ሰብ ወይ ሰብ ዘቘመን ሃይማኖታት ኣይኰናን።

[ኣብ ገጽ 3 ዘሎ ስእሊ]

ዓለም ከም ሓንቲ ኽትፍንጀር ቀሪባ ዘላ ቦምባ ድያ፧