ፍሉይ ህዝባዊ መደረ

ንደቂ ሰብ ኪገዝእ ብቕዓት ዘለዎ መን እዩ፧

እንታዋይ ገዛኢ እዩ

• ቍጠባዊ ጸገም ብምፍታሕ: ንሰባት ኣኺሉ ዚተርፍ ምግብን ብሉጽ ኣባይትን ንኬቕርብ ውሕስነት ኪኣቱ ዚኽእል፧

• ባህርያዊ ሓደጋ ዓጊቱ: ሰባት ብሱናሚ: ብህቦብላ: ወይ ብምንቅጥቃጥ ምድሪ ኸይጕድኡ ኺገብር ዚኽእል፧

• ንዅሉ ሕማማት ኬጥፍእ: ነቶም ብዕድመ ዝደፍኡ እውን ናብ ንእስነት ኪመልስ ዚኽእል፧

• ንዅሉ ዂናት ኣወጊዱ ንተገዛእቱ ኣብ ሰላምን ደሓንን ዘለዎ ሃዋህው ኬንብር ዚኽእል፧

• ንኢኮሎጂ: ማለት ነቲ ሓድሕዳዊ ዝምድና ህይወታውያንን ከባቢኦምን ናብ ፍጹም ሚዛኑ መሊሱ: ንምድሪ ናብ ገነት ኪቕይራ ዚኽእል፧

ነዚ ተጠቒሱ ዘሎ በረኸት ኬምጽእ ዚኽእል ሓደ ገዛኢ ጥራይ እዩ ዘሎ። እዚ ገዛኢ እዚ መን እዩ፧ እዛ ሕቶ እዚኣ: ኣብቲ “ንደቂ ሰብ ኪገዝእ ብቕዓት ዘለዎ መን እዩ፧” ዚብል ህዝባዊ መደረ ኽትምለስ እያ። እዚ ኣብ መጽሓፍ ቅዱስ እተመስረተ መደረ: ኣብ መላእ ዓለም ኣብ ልዕሊ 230 ሃገራት ኪወሃብ እዩ። ኣብ መብዛሕትኡ ቦታታት: ኣብ ኣዳራሻት መንግስቲ ናይ የሆዋ መሰኻኽር ሰንበት 6 ሚያዝያ 2008 እዩ ኺወሃብ። ኣብ ከባቢኻ ዚነብሩ ናይ የሆዋ መሰኻኽር ተሓጒሶም ነቲ ሰዓትን ኣድራሻን ኪነግሩኻ እዮም። ኣብኡ ንኽትርከብ ብኽብሪ ንዕድመካ።