ብ500 ቛንቋታት ዚዝርጋሕ ብስራት

ኣብ ሩዋንዳ ውግእ ሓድሓድ እናተኻየደ ኸሎ፡ ውሑዳት ተርጐምቲ ንብረቶም ሓዲጎም ካብ ዓዶም ሃደሙ። ኰይኑ ግን፡ ነተን ብኢድ ዝተሓዛ ኮምፕዩተራቶም ኪማልእወን ክኢሎም እዮም፡ ሒዞምወን ከኣ ናብ ሰፈር ስደተኛታት ከዱ። ስለምንታይ እዮም ከምኡ ገይሮም፧ በተን ኮምፕዩተራት ገይሮም ኣብ መጽሓፍ ቅዱስ ንእተመስረተ ጽሑፋት ናብ ቋንቋ ኪንያሩዋንዳ ምእንቲ ኺትርጕሙ እዮም።

ኣብ ደቡባዊ ምብራቕ እስያ እትነብር ሓንቲ መንእሰይ፡ ድኻምን ሙቐትን ይስምዓ፡ መብራህቲ ብተደጋጋሚ እናጠፍአ ድማ የሸግራ እኳ እንተ ነበረ፡ ኣብ ኮምፕዩተራ ምትርጓም ቀጸለት። ዕላማኣ እንታይ እዩ ነይሩ፧ እቲ ዚሕተመሉ መዓልቲ ስለ ዝቐረበ እያ ኸምኡ ዝገበረት።

እዞም ተርጐምቲ እዚኣቶም፡ ገለ ኻብቶም ኣብ ልዕሊ 190 ቦታታት ዚዓዩ 2,300 ዝዀኑ ወለንተኛታት እዮም። ዕድሚኦም ካብ 20 ኽሳዕ 90 ዚበጽሕ ኰይኑ፡ ሰባት ብ500 ቛንቋታት ካብ መልእኽቲ መጽሓፍ ቅዱስ ምጽንናዕ ምእንቲ ኺረኽቡ ደኺመ ኸይበሉ ኣበርቲዖም እዮም ዚዓዩ።—ራእይ 7:9።

ብእተፈላለየ ቛንቋታት ምትርጓም

ኣብዚ ቀረባ ዓመታት፡ ናይ የሆዋ መሰኻኽር ዚገብርዎ ዕዮ ትርጕም ተራእዩ ብዘይፈልጥ ደረጃ ወሲኹ እዩ። ንኣብነት፡ ብ1985 ግምቢ ዘብዐኛ ኣብ ሓደ እዋን ብ23 ቋንቋታት ጥራይ ትሕተም ነበረት፣ እዚ ኸኣ ኣብቲ እዋን እቲ ዜደንቕ ዓወት እዩ ነይሩ። ኣብዚ እዋን እዚ ግን ብ176 ቋንቋታት እያ እትሕተም ዘላ፣ ኵሉ ሕታማት ድማ ኣብ መላእ ዓለም ዘለዉ ኣንበብቲ ተመሳሳሊ ሓበሬታ ምእንቲ ኼጽንዑ ኣብ ሓደ እዋን እዩ ዚዳሎ።

ግምቢ ዘብዐኛ ጥራይ እያ ዳርጋ 50 ብዚኸውን ቋንቋታት ብዘይ ምቍራጽ እትሕተም። ስለምንታይ፧ ናይ ንግዲ ኣብያተ ማሕተም፡ ኣብቲ ኸባቢ ብዚዝረብ ቋንቋ ኺሓትማ ብዙሕ ፍቓደኛታት ኣይኰናን። ኣብ መላእ ዓለም ዘለዉ ናይ የሆዋ መሰኻኽር ግን፡ ቃል ኣምላኽን ኣብ መጽሓፍ ቅዱስ እተመስረተ ጽሑፋትን ኣብቲ ዜድሊ ዘበለ ቦታ ምእንቲ ኺበጽሕ ብፍታው ውጽኢት ይገብሩ እዮም።—2 ቈረንቶስ 8:14, 15።

ሰባት ንመልእኽቲ መጽሓፍ ቅዱስ ብቛንቋኦም ኪሰምዕዎ ኸለዉ ኣኽቢሮም ይርእይዎ እዮም። ንኣብነት፡ ኣብ ቀረባ ግዜ፡ ጽሑፋት መጽሓፍ ቅዱስ በቲ ኣብ ኒከራግዋ ዚርከብ ዳርጋ 200,000 ብዝዀኑ ሰባት ዚዝረብ ቋንቋ ሚስኪቶ ተሓቲሙ እዩ። ሓንቲ ሰበይቲ መጽሓፈይ ናይ መጽሓፍ ቅዱስ ዛንታታት * ዘርእስታ መጽሓፍ ኪወሃባ ሓተተት፣ እዛ መጽሓፍ እዚኣ ኽትወሃባ ኸላ ድማ ሓደ ፓስተር ይርኢ ነበረ። ነዛ ጽብቕቲ መጽሓፍ እዚኣ ምስ ረኣያ፡ ኪወስዳ ደለየ። ነታ መጽሓፍ እንተ ሂባቶ 20 ኪሎ ግራም ቡን ከም ዚህባ እኳ እንተ ነገራ፡ እታ ሰበይቲ ግን ኣበየት።

 ኣብዚ ዝሓለፈ ዓሰርተታት ዓመታት፡ ኣብ መጽሓፍ ቅዱስ እተመስረተ ጽሑፋት ብ15 ኣቢሉ ዚኸውን ቛንቋታት መክሲኮ ተተርጒሙ እዩ፣ እዚ ኸኣ ንቛንቋታት ማያ፡ ናዋትል፡ ትሶትሲል ዜጠቓልል እዩ። ዓሰርተ ዓመት ኣብ ዘይመልእ እዋን፡ ኣብታ ዓዲ ብቛንቋ እቶም ደቀባትን ብቛንቋ ምልክትን ዚግበር ጉባኤታት ናይ የሆዋ መሰኻኽር ካብ 72 ናብ ልዕሊ 1,200 ደየበ። ናይ የሆዋ መሰኻኽር ንመልእኽቲ መጽሓፍ ቅዱስ ኣብ ኣልባብ ሰባት ይተኽልዎ እዮም፣ ነቲ ዘርኢ ሓቂ ዜብቍሎ ግን ኣምላኽ እዩ።—1 ቈረንቶስ 3:5-7።

ብ80 ቛንቋታት እተዳለወ ዘመናዊ ትርጕም መጽሓፍ ቅዱስ

ኣብዚ ቐረባ ዓመታት፡ ናይ የሆዋ መሰኻኽር ናይ ቅዱሳት ጽሑፋት ትርጕም ሓዳስ ዓለም ብምሉእ ወይ ብኸፊል ብ80 ቛንቋታት ንምድላው ጻዕሪ ገይሮም እዮም። እዚኸ እንታይ ፍረ ኣፍረየ፧ ሓደ ኣብ ደቡብ ኣፍሪቃ ዚነብር ናይ የሆዋ ምስክር፡ ብዛዕባ እቲ ብቛንቋ ጽዋና እተዳለወ መጽሓፍ ቅዱስ ከምዚ በለ፦ “ከመይ ዝበለ ዜደንቕ መሳርሒ ዀን እዩ! ንቓል ኣምላኽ ዘሎኒ ሞሳ ኸም ዚውስኽ ኪገብሮ እዩ። እቲ እተተርጐመሉ መገዲ ቐሊልን ባህ ዜብልን እዩ።” ቋንቋ ጾንጋ ዜንብብ ኣብ ሞዛምቢክ ዚነብር ሰብ ከኣ፡ “ኣብ መጽሓፍ ቅዱስ እተመስረተ ጽሑፋት ብዘይ መጽሓፍ ቅዱስ፡ ልክዕ ከም ዝናም ዘይብሉ ነጐዳን በርቅን ማለት እዩ። ትርጕም ሓዳስ ዓለም ብቛንቋ ጾንጋ ምስ ወጸ ግን እቲ ዝናም ዘነመ” በለ።

ነቲ ኣብ መጽሓፍ ቅዱስ ዚርከብ ብስራት ዚትርጕሙን ዚዝርግሑን ሰባት፡ ንሓደ ጥንታዊ ትንቢት እዮም ብዜደንቕ መገዲ ዚፍጽሙ ዘለዉ። የሱስ ክርስቶስ ነዚ ትንቢት እዚ ኺንበ ኸሎ፡ “እዚ ወንጌል መንግስቲ ኸኣ ንምስክር ኵሎም ኣህዛብ ኣብ ብዘላ ዓለም ኪስበኽ እዩ፡ ሽዑ መወዳእታ ይመጽእ” በለ።—ማቴዎስ 24:14።

[እግረ-ጽሑፍ]

[ኣብ ገጽ 25 ዘሎ ግራፍ]

(ምሉእ ትሕዝቶ እንተ ደሊኻ፡ እተሓትመ ጽሑፍ ርአ)

ትርጕም ሓዳስ ዓለም

ብምሉእ ወይ ብኸፊል ዚርከብ

1950 1*

1970 7*

1990 13*

2000 36*

2010 80*

ካልእ ጽሑፋት

1950 88*

1960 125*

1970 165*

1980 190*

1990 200*

2010 500*

ቍጽሪ ቛንቋታት

[ኣብ ገጽ 24,25 ዘሎ ስእሊ]

ዳርጋ 2,300 ዝዀኑ ወለንተኛታት ንጽሑፋት መጽሓፍ ቅዱስ ናብ 500 ቛንቋታት ይትርጕሙ

በኒን

ስሎቨንያ

ኢትዮጵያ

ብሪጣንያ