እዚ ሓሳብ እዚ፡ ንታሪኽ ሰብኣዊ ኣገዛዝኣ ብልክዕ እዩ ዚገልጾ። ሰብኣዊ ኣገዛዝኣ፡ በቲ ዜጋጥም ዘሎ ማእለያ ዘይብሉ መከራን ስቓይን ተሓታቲ እዩ። ኣብ ኵሉ ዘመናት፡ ካብ ቅንዕና ተበጊሶም ፍትሒ ዝሰፈኖ ሕብረተሰብ ኪምስርቱ ዚደልዩ ዝነበሩ ሰባት፡ ብሰንኪ ስስዐን ብልሽውናን ጻዕሮም ፈሺሉ እዩ። ስለምንታይ፧ ብልሽውና ኽሳዕ ሕጂ ዚቕጽል ዘሎ ስለምንታይ እዩ፧ ብሰንኪ እዚ ዚስዕብ ሰለስተ ጐዳኢ ጽልዋታት እዩ።

መጽሓፍ ቅዱስ፡ ‘ኵላትና ትሕቲ ሓጢኣት ምዃንና’ ብንጹር ይገልጽ እዩ። (ሮሜ 3:9) ሓጢኣት ልክዕ ከም ሓደ ዘይሓዊ ተወርሶኣዊ ሕማም፡ ‘ኣባና ሓዲሩ እዩ ዘሎ።’ ንኣሽሓት ዓመታት ድማ ልክዕ ከም ንጉስ ኣብ ልዕሊ ደቂ ሰብ ‘ይገዝእ’ ኣሎ። ‘ሕጉ’ ኸኣ ብቐጻሊ ኣባና ይዓዪ እዩ። ብዙሓት ሰባት ብምኽንያት ሓጥእ ዝንባለ፡ ኣብ ጥቕሚ ርእሶም ጥራይ የተኵሩ እዮም፣ ወይ ከኣ ንኻልኦት ብምጕዳእ ስጋዊ ሃብቲ ኼጥርዩ ወይ ስልጣን ኪሕዙ ይጽዕሩ እዮም።—ሮሜ 5:21፣ 7:17, 20, 23, 25።

መለለዪ ዓለምና፡ ስስዐን ጥቕሚ ርእስኻ ጥራይ ምድላይን ኰይኑ ኣሎ። ኣብ ከምዚ ዓይነት ሃዋህው ዚነብሩ ገሊኦም ሰባት፡ ካብ ካልኦት ፍሉያት ኪዀኑ ይኸብዶም እዩ። በቲ ስስዐ ዝመልኦ ህርፋን ተደሪኾም ድማ፡ ጽምኢ ስልጣን የሕድሩ። ካብቲ ብሓቂ ዜድልዮም ንላዕሊ ዝዀነ ገንዘብን ንብረትን ኬጥርዩ ይምነዩ። እቲ ዜሕዝን ግና፡ ነዚ ዅሉ ንምርካብ፡ ቀጠፍጠፍ ዚብሉ ምዃኖም እዩ። ነቲ ጐዳኢ ጽልዋ ኣብ ክንዲ ዚጻረርዎ፡ ‘ክፉእ ንምግባር ደድሕሪ እቶም ብዙሓት እዮም ዚስዕቡ።’—ዘጸኣት 23:2።

እቲ ዓለወኛ መንፈሳዊ ፍጡር ዝዀነ ሰይጣን፡ ‘ንብዘላ ዓለም የስሕታ ኣሎ።’ (ራእይ 12:9) ንደቂ ሰብ ኣብ ትሕቲ ቝጽጽሩ ገይሩ፡ ነቲ ንሱ ዚደልዮ ነገራት ኪገብሩ እዩ ዚደሊ። ነቲ ሓደ ሰብ ስጋዊ ምሾትን ሃብትን ንምርካብ ኪህልዎ ዚኽእል ባህርያዊ ባህጊ ብውሕልነት ብምጥቃም፡ ነቲ ሰብ መታለሊ ኸም ዚኸውን ኪገብሮ ይኽእል እዩ።

ይኹን እምበር፡ ሰይጣን፡ ልክዕ ከምቲ ኣብ ምርኢት ብገመዳት ዚንቀሳቐስ ባምቡላ ኸም ድላዩ ኺጻወተልና ይኽእል እዩ ማለት ድዩ፧ ነቲ መልሲ ኣብ እትቕጽል ዓንቀጽ ክንርእዮ ኢና።