ዜና ዓለም ክትሰምዕ ከለኻ፡ ሓድሓደ እዋን ብስም ሃይማኖት እኩይ ነገራት ኪግበር ከሎ ርኢኻ ትኸውን። ኣብ ቅድሚ እቲ ናይ ሓቂ ኣምላኽ ተቐባልነት ዘለወን ሃይማኖታት፡ ኵለን ኣይኰናን። (ማቴዎስ 7:15) ብሓቂ እምበኣር፡ መብዛሕትኦም ደቂ ሰብ ተታሊሎም እዮም ዘለዉ።—1 ዮሃንስ 5:19 ኣንብብ።

ይኹን እምበር፡ ኣምላኽ ነቶም ጽቡቕን ሓቅን ዝዀነ ነገራት ዚፈትዉ ቕኑዓት ሰባት የስተብህለሎም እዩ። (ዮሃንስ 4:23) ንኸምዚኦም ዝበሉ ሰባት ድማ፡ ካብቲ ቓሉ ዝዀነ መጽሓፍ ቅዱስ እቲ ሓቂ ንኺፈልጡ ይዕድሞም ኣሎ።—1 ጢሞቴዎስ 2:3-5 ኣንብብ።

የሆዋ ኣምላኽ፡ ካብ እተፈላለያ ሃይማኖት ንዝመጹ ሰባት፡ ብዛዕባ ሓቂ ንኺፈልጡን ንሓድሕዶም ንኺፋቐሩን ብምምሃር የሕብሮም ኣሎ። (ሚክያስ 4:2, 3) ስለዚ፡ ነቶም ንናይ ሓቂ ሃይማኖት ዚስዕቡ ሰባት፡ ነቲ ንሓድሕዶም ዚተሓላለዩሉ መገዲ ርኢኻ ኸተለልዮም ትኽእል ኢኻ።—ዮሃንስ 13:35 ኣንብብ።

ናይ ሓቂ ኣምለኽቲ፡ እምነቶምን ኣነባብራኦምን ኣብ መጽሓፍ ቅዱስ እተመስረተ እዩ። (2 ጢሞቴዎስ 3:16) ንስም ኣምላኽ እውን የኽብርዎ እዮም። (መዝሙር 83:18፡ NW) ብዘይካዚ፡ መንግስቲ ኣምላኽ፡ እንኮ ተስፋ ደቂ ሰብ ምዃና ይእውጁ እዮም። (ዳንኤል 2:44) ነቲ የሱስ ዝሓደጎ ኣብነት ብምስዓብ ንብጻዮም ሰናይ ግብሪ ስለ ዝገብሩ እውን፡ ‘ብርሃኖም የብርሁ እዮም።’ (ማቴዎስ 5:16) ስለዚ፡ ናይ ሓቂ ክርስትያናት፡ በቲ ንጐረባብቶም ብዛዕባ ብስራት መንግስቲ ኣምላኽ ንኺነግርዎም ኢሎም ካብ ቤት ናብ ቤት ዚገብርዎ ምብጻሕ ኪልለዩ ይኽእሉ እዮም።—ማቴዎስ 24:14፣ ግብሪ ሃዋርያት 5:42፣ 20:20 ኣንብብ።